炸菜蒸牛肉, 蠔油菜心, 花膠螺片烏雞湯

老公 weekend返左鄉下探佢病重嘅阿爺, 尋晚得我一個人食飯, 我煲左湯等佢落機返黎飲.  唔知大家有冇留意, 我係好少煮牛肉呢?  事關老公唔食牛, 尋日趁佢唔喺度, 拿拿臨整番碟炸菜蒸牛肉食下.

一個人的晚餐: 炸菜蒸牛肉, 蠔油菜心, 花膠螺片烏雞湯

花膠螺片烏雞湯

材料: 花膠, 螺片, 烏雞, 瘦肉, 南棗, 淮山, 杞子, 紅蘿蔔, 粟米, 薑片

做法:
1. 花膠浸發一夜, 用薑蔥出水, 切件.  螺片浸一夜, 切片.  淮山浸一小時.  烏雞及瘦肉分別出水.  南棗去核.  紅蘿蔔及粟米切大件.
2. 將所有材料大火煲滾, 轉慢火煲 2.5小時, 落鹽調味.  即成.