紅蘿蔔粟米螺片海底椰湯

上星期尾開始有幾聲咳, 驚傳染俾豐豐, 即刻拿拿臨去睇醫生.  聽講海底椰可以止咳, 經過凍肉舖買左 pack急凍嘅試下煲湯.  上網 search過話而家買到嘅都唔係真正嘅海底椰, 冇止咳作用, 不過都可以滋潤下, 於是我煲左紅蘿蔔粟米螺片海底椰湯, 好清甜呀!

紅蘿蔔粟米螺片海底椰湯

材料: 紅蘿蔔一條, 粟米一條, 螺片一片, 元貝 3粒, 急凍海底椰 3粒, 豬展, 薑片

做法:
1. 螺片及元貝浸軟; 紅蘿蔔刨皮切大件; 粟米切件; 豬展出水.
2. 將所有材料大火煲滾 30分鐘, 轉慢火再煲 2小時, 下鹽調味.  即成.