沙薑雞腳, 海鮮醬豬扒, 蕃茄薯仔肉片湯

哩個五一假期, 同左媽咪提前慶祝母親節, 又同左老爺佢地飲茶, 仲帶豐豐去過公園打千秋, 好似唔係好多街去, 但係又日日都出左街, 都算過得幾充實啦.  哩排煮少左飯呀, 因為好懶, 揍豐豐都好攰架, 佢近排又唔知點解扭計左, 我地放假想瞓晏 D都唔得, 佢辰咁早就醒左喊, 但係飲完水, 換完片又要再瞓, 一想瞓就扭計, 真係好攰呀.  不過哩個假期都煮左一餐架.

五一假期食譜: 沙薑雞腳, 海鮮醬豬扒, 蕃茄薯仔肉片湯

沙薑雞腳

材料: 雞腳兩磅, 沙薑粉 2包, 薑片

調味料 A: 1/3包沙薑粉, 鹽, 胡椒粉, 麻油, 凍滾水少許

做法:
1. 雞腳切去腳指, 加薑片出水 (凍水落雞腳), 盛起用開水沖至涼, 隔水待完全涼透.
2. 雞腳放入保鮮袋, 加入一包沙薑粉, 雞粉, 胡椒粉, 拌勻後放入雪櫃醃數小時.
3. 準備雞湯, 加入凍水, 2/3包沙薑粉, 雞粉, 鹽, 糖, 胡椒粉, 麻油拌勻, 加入雞腳, 煮約 15分鐘, 熄火合上蓋焗 20分鐘, 盛起隔水.
4. 加入調味料 A拌勻.  即成.

小貼士:
1. 沙薑粉要用凍水開才易溶解.

海鮮醬豬扒

材料: 豬扒, 海觧醬

做法:
1. 豬扒用生抽, 老抽, 糖, 胡椒粉醃 30分鐘, 加麻油, 油, 生粉拌勻再醃 30分鐘.
2. 先煎熟豬扒, 盛起.
3. 將醃豬扒剩餘醃料加入海鮮醬及水拌勻, 落鑊煮滾, 加入豬扒快速拌勻.  即成.

蕃茄薯仔肉片湯

材料: 蕃茄, 薯仔, 肉片, 薑片

做法:
1. 蕃茄切角, 薯仔去皮切角.
2. 肉片用生抽, 糖, 胡椒粉, 油, 生粉略醃.
3. 水滾放蕃茄薯仔薑片, 滾後轉慢火煲 30分鐘, 加肉片再煲 15分鐘, 加鹽調味.  即成.