豆醬蒸雞翼, XO醬豆角炒肉碎

我已經開始食下 D涼野啦, 天氣咁熱, 而且 BB都已經有番咁上下大, 可以清下 BB D胎毒啦.  美其名就幫 BB清胎毒, 其實係自己想食咋, hehe, 我開始食西瓜, 涼粉等等, 真係好爽呀.  媽咪買左個小西瓜俾我地, 起晒沙, 勁甜勁好味呀!! 

星期一公司好靜, D同事一係出左 trip, 一係病左, 我都好準時放工返屋企煮飯食.  之前成日聽人講用普寧豆醬煮餸, 我都買左樽試下, 普寧豆醬雜貨舖有得買架, 我去大百佳反而搵唔到, 老板娘話有兩種, 一種係長頸樽, 平 D, 但係冇咩豆醬味, 得個咸字, 而我買嘅係矮樽, 貴少少.  我用佢黎整左豆醬蒸雞翼, 蒸左出黎好香, 雞翼仲好滑添呀, 另外整左一碟用黎送飯岩晒嘅 XO醬豆角炒肉碎, 兩碟餸都食清光啦.

豆醬蒸雞翼

材料:
雞翼

醃料:
薑汁, 普寧豆醬, 生抽, 老抽, 糖, 生粉, 麻油, 油, 美極, 酒

做法:
1.  雞翼洗淨抹乾, 用醃料醃過夜.
2.  水滾大火蒸 25分鐘.  即成.

XO醬豆角炒肉碎

材料:
豆角, 肉碎

做法:
1.  豆角切成細條, 用水浸 15分鐘, 之後用滾水煮至略軟身, 待乾備用.
2.  肉碎用生抽, 老抽, 糖, 生粉, 麻油, 油, 酒, 略醃, 加水拌勻至輕身.
3.  先炒肉碎至 8成熟, 加入豆角拌勻, 加入 XO醬及雞粉調味.  即成.