就黎放復活節加清明節 5日長假啦, 我印象中都真係好少連續 5日公眾假期, 返多兩日工咋, 加油呀!!
尋晚嗰餐食得太飽啦, 飽到郁唔到, 連 blog都冇寫, 而家補番啦. 魚湯其實我星期日已經煲左啦, 不過冇飲到, 留番尋晚飲, 其實我一直都怕煲魚湯, 因為我好耐之前煲過一次, honey話鯹喎, 我自己又唔覺, 所以我一直都冇再煲, 不過魚湯真係好好飲架, 於是我再挑戰多一次, 今次連 honey都話好飲呀, 原本可以飲兩日嘅一煲湯, 我地竟然一次飲晒, 你話點可以唔飽呢, 我地之前仲眼寬肚窄, 驚唔夠食, honey仲煎左幾隻蛋添. 魚湯真係超好味, 飲多 D皮膚都靚 D架.
蕃茄薯仔豆腐魚湯
材料:
蕃茄 2個, 薯仔 2個, 豆腐 1盒, 大眼雞 1斤 (有 4條)
做法:
1. 準備一煲滾水, 加 4片薑.
2. 魚留皮, 洗淨抹乾, 用 4片薑起鑊煎香兩面, 之後立刻放入滾水內繼續大火煲.
3. 將蕃茄及薯仔一同放入湯內, 大滾後轉慢火煲 1小時.
4. 加豆腐, 再煲 10分鐘, 落鹽調味. 即成.
小貼士:
1. 煎魚時不要經常反魚, 會易爛, 要將一面煎好, 才轉另一面.
蠔油花膠炆雞
材料:
花膠, 雞件
醃料:
薑茸連汁, 生抽, 老抽, 蠔油, 糖, 胡椒粉, 油, 麻油, 生粉
做法:
1. 花膠浸發後用薑蔥出水, 洗淨剪件.
2. 雞用醃料醃 20分鐘.
3. 先將雞爆香, 加水至蓋過雞, 中火炆至收汁, 試味再自行調較味道. 即成.
小貼士:
1. 可將幾次花膠分量一次過浸發及出水, 之後分開一份份, 放入冰箱, 食前解凍即可.
今日中午我同 honey去左中環四季酒店參加 B小姐嘅結婚典禮, 佢嘅婚禮好簡單, 不過好溫馨, 儀式之後仲有 light buffet供應, 其實都唔 light架啦, 都有好多野食. 其實我都只係唔夠一星期知道 B小姐今日結婚, 知道嘅時候都幾 surprise, 因為之前聽 B小姐講都好似冇打算結婚, 可能始終女仔啦, 應該都希望有自己嘅家庭既. 祝 B小姐同佢 honey白頭到老, 永結同心啦.
哩幾日 honey忽然頂唔順自己個大肚腩, 開始跑番步啦, 佢話想食粥, 所以今日又煲下粥啦. 今晚餐飯係我同 honey夾手夾腳整, 我煲粥同醃豬扒, honey負責煮餸, 今次 D豬扒好好味呀, 相信因為我醃得好味囉.
香煎蒜茸豬扒
材料:
梅頭豬扒
醃料:
(A) 生抽, 老抽, 糖, 喼汁, 蒜茸,
蛋白
(B) 油, 麻油, 生粉
做法:
1. 豬扒用刀背揼鬆, 加醃料(A)醃最少半小時, 之後加入醃料(B)再醃最少 15分鐘.
2. 將豬扒煎熟. 即成.
小貼士:
1. 醃豬扒的時候長一點, 可更入味.
挨左一個星期, 終於到 weekend啦, 不過今日冇去街, 同屋企人食完 lunch之後去左超級市場買野, 跟住就返屋企瞓晏覺, 正, 今晚都係叫外賣食咋. 見屋企仲有金桶牛油, 於是就整左雲石牛油蛋糕, 不過可能我整個可可味多左, 雲石效果唔夠出, 仲有就係唔記得落雲呢拿香油, anyway啦, 都好好味!
雲石牛油蛋糕
(食譜參考自 <可可夢的甜蜜窩> http://coco_mydream.mysinablog.com/index.php?op=ViewArticle&articleId=1318331)
材料: (長型蛋糕盤)
牛油 100克
糖 100克
蛋 2隻
雲呢拿香油 2-3滴
低筋粉 70克
低筋粉 2湯匙
泡打粉 1湯匙
可可粉 2湯匙
做法:
1. 牛油和蛋放回室溫. 焗爐 180度預熱. 蛋糕盤鋪上牛油紙.
2. 牛油待軟後打至鬆軟, 加糖打至淡黃色.
3. 蛋打散後分兩次加入攪伴, 加入雲呢拿香油拌勻.
4. 篩入70克低筋粉及泡打粉, 快手拌勻.
5. 將麵糊分兩份, 一份加入低筋粉 2湯匙拌勻, 另一份加入可可粉拌勻.
6. 將兩種麵糊輪流分次倒入蛋糕盤, 最後用湯匙在麵糊中繞一圈.
7. 輕拍數下放出空氣. 放入焗爐 180度焗 35分鐘. 取出待涼切件, 即成.
小貼士:
1. 用牙簽斜插入蛋糕中心測試蛋糕, 若牙簽沒有沾上粉漿, 即蛋糕已熟.
2. 兩種麵糊不要拌得太勻, 否則做不出雲石效果.
都唔知點解, 平日就朝朝唔願起身, 但係 weekend就會一早自然醒, 真係好想可以瞓晏 D... 話咁快 weekend又過啦, 聽日又要好唔願意咁起身返工.
今晚煲雞粥同炒米粉呀!
雞粥
材料:
米, 雞件
做法:
1. 米洗好, 用水加少許油, 浸半小時.
2. 雞件用生抽, 老抽, 糖, 胡椒粉, 生粉, 麻油, 油, 薑絲醃半小時.
3. 米連水加入煲內, 加水, 大火煲滾, 之後轉中大火煲約 1小時, 期間約 15-20分鐘攪一攪.
4. 之後加入雞件, 再煲半小時, 加蔥粒及鹽調味. 即成.
炒米粉
材料:
米粉, 午餐肉, 叉燒, 椰菜, 甘荀
做法:
1. 米粉用熱水加少許油浸軟, 其他材料切條/絲備用.
2. 先炒午餐肉及叉燒, 盛起.
3. 之後炒椰菜和甘荀, 炒軟後加米粉炒勻, 加入午餐肉及叉燒.
4. 逐小加入雞湯, 炒至乾身, 加生抽調味. 即成.
終於等到今日去見王醫生啦, 真係又緊張又擔心, 今日仲要等左好耐先見到王醫生. 好好彩, 照到BB心跳啦, 嗰一刻真係好開心好興奮呀. BB今日係7W4D, 同計日期差唔多, 預產期係11月1號, BB而家有1.23cm. 王醫生話BB個心跳得好快, 好健康呀, 個size都幾好呀, 暫時放心晒啦.
哩排都係keep住食飽就會作嘔, 一時冇胃口, 一時又好肚餓, 仲好易攰添.
哩幾日返工好唔如意呀, 老闆發左顛, 蠻不講理, 我地哩 D小薯仔只有硬食, 好激氣好唔開心, 所以星期一煮嘅餸都冇心情 post出黎, 真係要提升下自己嘅 EQ先得.
咸魚蒸肉餅
材料:
梅香咸魚一片
免治豬肉 (我買了約 $10)
薑絲
做法:
1. 豬肉加生抽, 老抽, 糖醃 15分鐘.
2. 加生粉, 油, 麻油拌勻, 逐小加水攪至肉碎變輕身.
3. 蒸前加酒拌勻.
4. 碟塗油, 放入肉碎, 中間放上薑絲, 再放上咸魚.
5. 水滾大火蒸 15分鐘. 即成.
小貼士:
1. 用半肥瘦梅頭豬肉自己剁碎會更好.
2. 蒸的時間要視乎材料分量.
豆腐粉絲豚肉煮娃娃菜
材料:
蒸煮豆腐, 粉絲, 火窩豬肉片, 娃娃菜
做法:
1. 粉絲浸軟, 剪開. 豆腐切大件. 娃娃菜洗摘.
2. 豬肉片用生抽, 老抽, 糖, 生粉, 油, 麻油略醃.
3. 煲滾雞湯加水, 加兩片薑, 先放入粉絲, 再續步放入豬肉片, 娃娃菜同豆腐, 豬肉熟透, 湯滾起. 即成.
二月初二係老豆嘅生日, 我地今日一家人提前同佢出去食飯慶祝, 我地 7大 1B去左 Mega Box嘅德興食火窩, 嗰度環境都唔錯, 任食又唔會話限時限刻, 選擇都幾多, 不過我就嫌佢地嘅湯底略淡囉.
老豆嘅大日子, 我當然要親自整番個蛋糕啦, 今次係我第一次整忌廉蛋糕, 都算唔錯啦, 好軟熟架.
忌廉鮮果蛋糕 (芒果餡)
材料:
清蛋糕 3 片
甜忌廉打起
芒果粒
其他鮮果及杏仁片作裝飾
清蛋糕 6"
(做法參巧自韋太烹飪教室 http://irenechanwai.mysinablog.com/index.php?op=ViewArticle&articleId=1601288 )
材料:
低筋粉 40克
糖 40克
蛋白 2隻
蛋黃 2隻
牛油 / 橄欖油 20克
做法:
1. 雞蛋放回室溫. 蛋糕模鋪上焗爐紙. 焗爐 180度預熱.
2. 蛋白打起, 分 2-3次加入糖, 打至企身.
3. 加入蛋黃, 用橡皮刀快手拌勻.
4. 篩入低筋粉, 用手動打蛋器拌勻.
5. 加入油, 快手拌勻.
6. 倒入蛋糕模, 放入焗爐 180度焗 25分鐘.
7. 出爐後倒扣. 待涼後去面, 切成 3片備用.
組合:
1. 預備一張墊底卡紙, 放上一片蛋糕片, 塗上打起的甜忌廉, 放上芒果粒.
2. 將另一片蛋糕片塗上忌廉, 反轉放在蛋糕上, 再在上面塗上忌廉及放上芒果粒.
3. 將最後一片蛋糕片同樣塗上忌廉, 反轉放在蛋糕上.
4. 將整個蛋糕都塗上忌廉, 抹平滑.
5. 圍邊加上杏仁片, 蛋糕面唧上忌廉及鋪上鮮果作裝飾. 即成.
今日真係好凍呀, 得9度咋, 真係凍到震, 星期六仲著緊短袖衫, 今日既然要著羽絨, 真係想唔病都難.
尋日煮嘅餸而家先 post出黎, 因為尋晚食左飯之後唔係幾舒服呀! 尋晚整左葡國雞, 蒜茸炒小棠菜同埋用個電子燉盎燉左茶樹菇螺片魚唇湯. 炒菜哩 D咁簡單我唔打食譜啦, 懶!
葡國雞
材料:
雞件, 薯仔, 甘荀
汁料:
上湯, 水, 咖哩粉1/2茶匙, 鹽, 糖, 麵粉1湯匙, 椰汁, 淡奶
做法:
1. 雞件用胡椒粉和雞粉略醃.
2. 薯仔和甘荀去皮切件, 用水略浸.
3. 薯仔和甘荀先落鑊略炒, 加雞件炒片刻.
4. 加汁料 (除淡奶), 要蓋過材料, 慢火炆至收水, 加淡奶拌勻. 即成.
小貼士:
1. 要試味去加減汁料分量.
茶樹菇螺片魚唇湯
材料:
茶樹菇, 螺片, 魚唇, 竹絲雞, 瘦肉, 果皮, 蜜棗, 杞子, 薑片
做法:
1. 螺片浸軟, 魚唇浸發後用薑蔥出水, 竹絲雞和瘦肉出水, 其餘材料用水浸 30分鐘.
2. 全部材料放入燉盎內 (除魚唇), 加滾水, 燉 2小時, 放入魚唇再燉 1小時, 下鹽調味. 即成.
小貼士:
1. 魚唇太早燉會融解.
2010年3月8日, 今日係陀BB之後第一次嘔呀, 其實之前都會食飽之後有D反胃咁, 不過真係嘔就第一次啦.
Honey終於俾魔鬼引誘左買 XBOX啦, 不過佢仲未有機會玩, 因為佢正想玩之際, 公司 sever down左, 佢搞左好耐都唔掂, 而家仲要親自出葵涌搞呀, 唔知點解佢公司 D sever咁終於星期日晚先黎 down呢?
好彩食飯嘅時候仲未有問題, 如果唔係佢連飯都食唔到呀!! 見屋企支鎮江醋就快到期, 所以想快 D用左去, 於是整左鎮江骨, 再開埋罐飽汁海螺片配唐生菜添, 真係快靚正!
鎮江骨
材料:
一字排斬件
汁料:
水, 沙糖, 鹽, 生抽, 酒, 鎮江醋, 冰糖
做法:
1. 一字排飛水.
2. 一字排先落鑊略煎香, 加汁料炆至肉林及收水, 約35分鐘. 即成.
小貼士:
1. 一字排不宜選擇太瘦.
2. 要試味再決定加減汁料分量.
鮑汁海螺片配唐生菜
材料:
唐生菜, 罐頭鮑汁海螺片
做法:
1. 唐生菜略浸15分鐘, 洗摘.
2. 滾水加少許油, 加菜煮熟, 加雞粉調味, 盛起.
3. 罐頭海螺片連汁加熱, 放在唐生菜上. 即成.
好無聊嘅星期一, 一返工就已經好想快 D放工. 本來成日都唔係咁忙, 諗住實可以準時走返屋企煮飯啦, 點知想走嘅時候就俾老闆捉住我做 D野, 激死!
怱怱忙忙趕返屋企準備今晚嘅晚餐, 有冬菇孖腸滑雞飯, 蝦醬蒸娃娃菜同埋粟米魚肚羹.
冬菇孖腸滑雞飯
材料:
冬菇, 臘腸, 潤腸, 雞扒
做法:
1. 冬菇浸軟, 去腳 (保留冬菇水), 用生粉"卒"乾淨, 過水, 加生粉及油略醃.
2. 雞扒去皮, 切成雞柳, 加薑汁薑茸, 生抽, 老抽, 雞粉, 酒, 糖, 麻油, 生粉醃半小時.
3. 臘腸潤腸用熱水沖洗.
4. 用電飯煲煮飯, 水要比平時略少 (可用冬菇水), 水開始滾起時, 加冬菇及雞柳. 臘腸潤腸用碟乘起, 放在電飯煲內蒸熟.
5. 飯煮好時, 取出臘腸潤腸, 切片, 放回飯內伴勻. 蓋上電飯煲蓋焗片刻. 即成.
小貼士:
1. 臘腸潤腸先隔起蒸熟, 可免去太多油份.
粟米魚肚羹
材料:
魚肚, 粟米湯, 水, 蛋
做法:
1. 魚肚浸發, 用薑蔥出水, 切粒.
2. 粟米湯加水倒入煲內, 加魚肚, 大火煲滾.
3. 蛋打勻, 一邊倒入湯一邊攪, 加鹽及胡椒粉調味, 加生粉水做成羹. 即成.
蝦醬蒸娃娃菜
材料:
娃娃菜
調味:
雞湯, 糖, 生抽, 麻油
做法:
1. 娃娃菜洗摘, 用水略浸.
2. 娃娃菜鋪在碟上, 倒入調味, 在菜面加上適量蝦醬.
3. 水滾大火隔水蒸15分鐘. 即成.
