何首烏桑寄生茶

聽人講何首烏係有烏髮嘅功效, 有朋友話佢一星期飲一次, 又真係冇咩白頭髮, honey成日叫我煲俾佢飲下, 之前買左盒何首烏好耐都冇時間煲, 尋日朝阿仔瞓左有 D得閒, 就去煲下啦.

何首烏桑寄生茶

材料: 何首烏, 桑寄生, 圓肉, 蛋

猴頭菇螺頭煲雞

聖誕節真係開心, 有 party, 有禮物, 同屋企人朋友一齊聚一聚, 交換禮物, 食下野, 真係好開心, 今年仲多左 BB, 佢有好多好多禮物呀!!

今年平好夜帶埋 BB一齊去子夜彌撒, 係佢第一次去 church, 抱住佢去神父面前受神父祝福, 希望 BB平平安安.

聖誕夜我地冇去街呀, 因為帶住 BB真係唔係好方便出去同人迫, 租左兩套碟, 買左我成年冇食過嘅魚生同埋其他食物, 臨急煲下湯, 同 honey喺屋企食野撐枱腳.

Boxing Day同班好朋友 BBQ, 一班小朋友個個都收到好多禮物, 大豐收呀!

哩個聖誕好快樂呀!

聖誕老火湯 - 猴頭菇螺頭煲雞

Merry Christmas @2010

給最愛兒子的說話

無意中喺youtube聽番曾路得唱嘅<給最愛女兒的說話>, 對岩岩做左媽咪嘅我感覺同以前唔同左. 

豐豐, 哩首歌嘅歌詞同樣係媽咪 ~ 給最愛兒子的說話

給最愛女兒的說話 - 主唱 : 曾路得 獨白 : 鄭丹瑞

http://www.youtube.com/watch?v=UN8nK3DSZFI

緊握緊握的一雙小手
教我有著太多感受
你現在或是不解這一番心意
留在你童年以後

活著活著是永遠尋求
每個際遇要安心靜候
算了吧 人成長總有一些起跌
長路裡有我在背後

喜歡的不代表佔有
替彼方想多一想世情易接受
如感迷途不要徬徨
嘆息收起望以後

路上路上或挫折重重
每每挫敗也許不易受
要記住事事如不可以不必強求
難受處一定有

獨白:
親愛的女兒,今日我要講嘅,
你可能永遠都唔會明白,
點解當父母認為愛你愛得過份嘅時候,
你會覺得我哋愛你愛得唔夠,
假如有一日,當你流住眼淚,
埋怨爸爸媽媽太唔了解你.
當你煩燥不安的時候,
請你靜一靜,想一想.
然後,希望你明白,希望你容忍,
希望你繼續,愛你嘅爸爸,愛你嘅媽媽.

喜歡的不代表佔有
替彼方想多一想
世情易接受
如感迷途不要徬徨
嘆息收起望以後

路上路上或許多引誘
愛意決定你想施或受
這段話 寶寶很想你聽多幾遍
能共你心伴奏

BB日誌 - 話咁快豐豐就兩個月啦

不經不覺豐豐都兩個月零一星期啦, so far我覺得佢都幾好揍, 好少無 la la大喊, 通常都會知佢扭咩.  哩兩日發覺豐豐識得笑啦, 唔係無意識嗰種笑, 而係同佢玩佢會笑呀, 見到佢笑真係好開心呀, 佢又好鐘意人地同佢傾計, 每次同佢傾計, 佢都定定咁望住你, 條頸仔開始硬啦, 成日頭鄂鄂咁. 

仲有 3個星期左右我就要返工啦, 代我個 temp又忽然話搵到第二份工唔做啦, 成個月冇人理我 D野, 我返到去真係有排執手尾啦, 諗起都真係好唔想咁快返工, 真係好唔捨得日日對住豐豐嘅日子呀!

豐豐, 媽咪 love you so much!

BB日誌 - 豐豐雙滿月宴

尋晚係豐豐嘅雙滿月宴, 其實只係屋企人加埋契媽們食一餐飯, 雖然冇大事鋪張, 不過都好開心呀

.  豐豐好叻呀, 成晚咁多唔同嘅人抱都冇扭計, 抵讚

!  豐豐, Mami 同Baba 祝豐豐快高長大, 身體健康, 你係我地嘅寶貝豬呀, 希望豐豐永遠都咁乖乖啦!

金針雲耳蒸雞, 油鴨煲, 紅蔘鹿茸燉烏雞

自從BB出左世之後, 真係冇晒時間, 都已經好耐冇開爐煮野啦.  尋日星期日, 見有 honey幫手湊仔, 我就開爐煮番餐飯啦.  BB又好乖喎, 由開始煮, 食埋, 洗埋野, 佢都冇扭計喎, good.

BB日誌 - 豐豐滿月啦

時間過得真係快, 我個寶貝仔豐豐已經滿月啦.  豐豐有出世紙, 有個 official嘅名, 拎左出世紙之後第一次去健康院, 當嗌咪叫豐豐個名嘅時候, 覺得好搞笑呀!

終於過左一個月, 豐豐已經有4.53kg, 健康院嘅姑娘話進度好好呀, 我好滿足, 即係證明我揍得好好啦, wakakaka... 多左個仔, 而家日日都唔夠瞓, 有時真係餵緊奶都差 D瞓著, 雖然豐豐唔算難揍, 不過始終有唔乖嘅時候, 又眼瞓佢又唔聽話, 都幾忟憎架, 但係當 BB笑一下, 真係咩都唔記得晒架.

BB日誌 - BB出左世啦

我個寶貝仔喺 37週3日出左世啦, 因為胎水偏少, 醫生提議催生, 落左 3次催生藥, 差唔多10個鐘都未開到 1度, 於是醫生話要開刀, 半身麻醉, 聽到 BB喊嘅時候, 我好感動, BB終於出世啦.

BB喺 2010年10月13日, 晚上 9:27, 喺伊利沙伯醫院出世, 重 3.19kg.

我的生日@2010

今年嘅生日好特別呀, 因為今年陀住 BB.  honey今年好好呀, 安排左全日嘅節目, 一早 book晒枱, 仲有埋 schedule添, 前一日仲送左紮花去我公司, 好耐冇收過花啦, hehe.

生日嗰日一早要去見王醫生先, 王醫生仲叫我唔好食咁多野, 因為佢話 BB有 D重喎, 但係我就食左成日囉, hoho. 

睇完醫生, 搭車入赤柱, 好耐冇去啦, 天氣唔錯, 原本話會落雨都冇落, 仲有 D風, 好舒服呀.  喺一間望到海景嘅餐廳食 lunch, 食左 pizza, 意粉, 湯, 仲有好好味嘅甜品.  之後周圍行下, 喺海邊坐下, relax下, 好爽呀!  經過 Jenny Bakery, 聽講佢地 D曲奇好好味, 於是買左兩罐, 真係超鬆化, 好好味喎.

時間差唔多, 要返出去尖沙咀啦, 我地去左 ISquare, 本來 honey訂左間食吉列豬扒嘅餐廳, 不過我地去到, 見到佢 D menu同環境, 覺得麻麻地, 於是都係決定食其他野, 好隨便就入左一間中菜館, 哩間應該係出名食蟹, 不過我又唔係好食得, 而且 D蟹好貴呀, 我地最後都冇叫蟹.  食完去食甜品, 跟住就返屋企啦. 

今年嘅生日過得好滿足呀

BB日誌 - 第18篇

BB已經 37週啦, 足月啦, 唔知 BB想幾時出世呢.  媽咪我臨尾竟然病左, 要睇醫生食藥, 好彩唔係好嚴重.  返多一星期就開始放假啦, 希望 BB等我開始放假先出世啦.  爹地好期待 BB出世呀, 成日摸住媽咪個肚, 問 BB有冇郁.  BB你要乖, 順順利利出世, 唔好要媽咪辛苦咁耐呀!!

Happy Birthday to Mami @2010

媽咪嘅生日, 又係我地一家人聚首一堂嘅時候啦, 今次我地去左金滬庭食, 食左超多野, 有片皮鴨啦, 沙窩雲吞雞啦, 酸辣湯啦, 小籠包啦, 水煮魚啦... 多到我都唔記得lu, 埋單 800蚊左右, 今次有 4份人夾錢, 好平呀.  我仲買左想試好耐嘅東海堂流心蛋糕添, 真係唔錯喎.

哩間菜館 D野都幾好味, 不過最衰係 D枱, 我地 8個人要坐長枱, 比較迫, 最入嗰 D人基本上係冇得郁, 圓枱要 12個人先有, 仲有, 係要 6人以上先可以訂枱.

金滬庭京川滬菜館將軍澳新都城中心二期UG085-087號舖
Tel: 2625 9889
http://www.openrice.com/restaurant/sr2.htm?shopid=41125

正宗印度餐

前一兩個星期, 我同 honey去荔枝角一間影樓影大肚相, 影完之後岩岩係中午, honey就帶左我去食一間佢之前已經推介過嘅一間印度餐廳食 lunch, 佢話間餐廳應該轉左老闆, 不過食嘅野都差唔多.  星期六 1點左右, 間餐廳都係得一兩枱客, 一入到去就聞到好香嘅印度香料味.  我地叫左兩個 set lunch, 一個茄汁雞, 一個咖哩雞, 我覺得咖啡雞唔夠辣, 不過同平時食嘅咖哩真係唔同, 香好多, 而 honey推介嘅茄汁雞好好味, 送飯或者薄餅都 very good.

Sohal Indian Restaurant
長沙灣道638號長盛豪苑地下D舖
Tel: 2242 6088
http://www.openrice.com/restaurant/sr2.htm?shopid=17365

BB日誌 - 第17篇

BB已經 36週啦, 時間過得好快呀, BB好快就出黎同我地見面啦. 

BB衫仔已經洗好, 床仔已經鋪好, 走佬袋都執得 7788.  好多人問我緊唔緊張, 我其實唔係好緊張, 亦都唔想諗咁多, 順其自然啦. 

不過今朝去見完王醫生, 我就真係開始有 D緊張啦, 是關兩星期前, BB重 2.6KG, 醫生話 size正常, 今日 36週, BB重 2.9KG, 醫生話 size大呀, 寫左封信俾我拎去 QE.  醫生話唔關我食得多事, 我嘅體重依然未過 20磅, 唔通 BB真係咁吸收?  突然間覺得 BB可能真係會早出世呀.

好正的海南雞飯

之前有一個星期六, 一早起身去QE聽完講座, 然後去王醫生度檢查, 咁岩喺銅鑼灣, 我就提議帶 honey去世貿嘅海南少爺食海南雞飯, 我都未食過架, 係一次無意之中上網睇到人地話好味.  我地去到都已經差唔多兩點, 不過仍然要等位.  我地叫左一個海南雞套餐同一個肉骨茶套餐, 海南雞真係好正呀, 超嫩得黎又熟晒, 唔會見血, 岩晒 honey, 配埋雞油飯, 真係好好好好味呀!  肉骨茶都好重藥材味架.  Lunch 嘅 last order 係2:30, 差 D趕唔切呀.

海南少爺
地址: 銅鑼灣告士打道280號世貿中心3樓311號舖
電話: 2111 3166
http://www.openrice.com/restaurant/sr2.htm?shopid=46909

BB日誌 - 第16篇

8月28號去王醫生度做檢查, BB大約 31週, 重約 1.8kg, 王醫生話 BB個頭大左一週, 係大頭 B, 我話梗係遺傳爹地啦, 不過 BB個頭唔好再大咁多啦, 媽咪生嘅時候好辛苦架.

上星期去完 QE聽講座, 行左去永安, 點知咁岩大減價, D BB野好平呀, 入貨好時機 .

個肚好大好重啦, 依然係好頂住, 仲有本來一直冇咩抽筋, 近哩一兩個星期成日抽筋 .  以前可以 10秒之內瞓著, 唔知點解而家明明好眼瞓, 都要磨一陣先瞓得著.

我嘅體重依然 keep住冇咩大升, 而家重約 16磅.

豆醬蒸黃花魚, 鹽焗雞翼, 芫荽魚片皮旦湯

遲來的晚餐食譜.

豆醬蒸黃花魚

材料:
黃花魚

做法:
1.  黃花魚洗淨抹乾, 放上薑絲及豆醬, 大火隔水蒸 10分鐘, 倒去蒸魚水, 加水熟油豉油糖.  即成.

鹽焗雞翼

材料:
雞翼

醃料:
雞粉, 胡椒粉, 鹽, 沙薑粉, 糖, 生粉, 麻油

做法:
1.  雞翼洗淨抹乾, 用醃料醃過夜.
2.  焗盤鋪上鍚紙, 灑上油, 焗爐 180度預熱.
3.  將雞翼排在焗盤上, 入爐 180度焗 25分鐘.  即成.

芫荽魚片皮旦湯

材料:
芫荽, 魚片, 皮旦, 薑片

做法:
1.  芫荽用水加鹽浸 15分鐘, 洗淨, 魚片切片, 用胡椒粉及鹽略醃, 皮旦切粒.
2.  大火滾起加芫荽及薑片, 滾後轉中火, 25分鐘後加魚片及皮旦, 再滾約 5分鐘.  即成.

乾蔥柱侯炆雞, 椒鹽煎乾蝦

乾蔥柱侯炆雞

材料:
雞件, 乾蔥, 蒜頭, 薑片

做法:
1.  雞件用雞粉, 胡椒粉, 生粉略醃.
2.  先爆香乾蔥, 蒜頭, 薑片, 再加雞件略炒.
3.  加水至蓋過雞件, 加入柱侯醬, 生抽, 糖, 麻油.
4.  炆至收水, 試味.  即成.

椒鹽煎乾蝦

材料:
中蝦

做法:
1.  先剪去蝦腳, 洗淨抹乾.
2.  落油將蝦兩邊煎至熟, 加香茅椒鹽炒勻.  即成.

悲傷的7月14

尋日發生左一件相信全香港嘅人都會唔開心嘅事, 就係康泰一個旅行團喺菲律賓被搶手挾持, 最後流血結終, 聽到哩個新聞真係好振驚, 好傷心, 個心好唔舒服, 本來開開心心去旅行, 點知會發生哩 D事... 希望受傷嘅人快 D康復, 死者嘅家人亦都快 D從悲傷中走出黎啦.  願天上的主保佑及照顧佢地.

蒸海南雞, 蕃茄煮三文魚扒

哩個星期天氣好差呀, 日日都要袋定把遮返工, 一時遮太陽, 一時遮雨, 真係玩死啦.

快 D post番星期一煮嘅餸先, 買左現成醃好嘅海南雞返黎蒸, 同埋整左蕃茄煮三文魚扒.

凍魚, 可樂燒烤骨

星期日食乜餸? 咪就係凍魚同可樂燒烤骨囉.

可樂燒烤骨

材料:
一字排 (切約 1寸厚)

汁料:
可樂 1罐, 燒烤汁, 蒜茸

做法:
1.  一字排先飛水, 用水洗淨.
2.  蒜茸起鑊, 落一字排略煎, 加入可樂及水至蓋過一字排, 細火炆至林.
3.  加入燒烤汁拌勻.  即成.

凍魚

材料:
木棉魚 (大眼雞) 連皮

做法:
1.  魚大火隔水蒸 10分鐘.  待涼, 即成, 可加普寧豆醬調味.

豆醬蒸雞翼, XO醬豆角炒肉碎

我已經開始食下 D涼野啦, 天氣咁熱, 而且 BB都已經有番咁上下大, 可以清下 BB D胎毒啦.  美其名就幫 BB清胎毒, 其實係自己想食咋, hehe, 我開始食西瓜, 涼粉等等, 真係好爽呀.  媽咪買左個小西瓜俾我地, 起晒沙, 勁甜勁好味呀!! 

星期一公司好靜, D同事一係出左 trip, 一係病左, 我都好準時放工返屋企煮飯食.  之前成日聽人講用普寧豆醬煮餸, 我都買左樽試下, 普寧豆醬雜貨舖有得買架, 我去大百佳反而搵唔到, 老板娘話有兩種, 一種係長頸樽, 平 D, 但係冇咩豆醬味, 得個咸字, 而我買嘅係矮樽, 貴少少.  我用佢黎整左豆醬蒸雞翼, 蒸左出黎好香, 雞翼仲好滑添呀, 另外整左一碟用黎送飯岩晒嘅 XO醬豆角炒肉碎, 兩碟餸都食清光啦.

豆醬蒸雞翼

材料:
雞翼

醃料:
薑汁, 普寧豆醬, 生抽, 老抽, 糖, 生粉, 麻油, 油, 美極, 酒

做法:
1.  雞翼洗淨抹乾, 用醃料醃過夜.
2.  水滾大火蒸 25分鐘.  即成.

XO醬豆角炒肉碎

材料:
豆角, 肉碎

做法:
1.  豆角切成細條, 用水浸 15分鐘, 之後用滾水煮至略軟身, 待乾備用.
2.  肉碎用生抽, 老抽, 糖, 生粉, 麻油, 油, 酒, 略醃, 加水拌勻至輕身.
3.  先炒肉碎至 8成熟, 加入豆角拌勻, 加入 XO醬及雞粉調味.  即成.

燒汁洋蔥豬頸肉, 鹽燒三文魚骨

星期日係休息日, 冇去街啦, 只係出左去食下 lunch, 買下餸咁, 下晝去左散步.  晚餐整左燒汁洋蔥豬頸肉同埋鹽燒三文魚骨.  上星期整左三文魚頭, 覺得冇咩肉, 今次試下三文魚骨, 又幾好喎, 今次又用左唔同調味料, 另有一番風味.  食完飯, 我同 honey仲兩個人食左半個哈蜜瓜添.

燒汁洋蔥豬頸肉

材料:
洋蔥 1個
急凍豬頸肉片 1盒 (已切成柳)

做法:
1.  洋蔥切條.  豬頸肉用薑汁, 燒汁, 生抽, 糖, 生粉, 麻油, 油, 酒, 略醃, 加水拌勻至輕身.
2.  先將洋蔥炒至軟身, 盛起.  煎豬頸肉至熟, 加入洋蔥及燒汁, 快手炒勻.  即成.

鹽燒三文魚骨

材料:
三文魚骨

醃料:
薑汁, 胡椒粉, 香草, 黑胡椒, 味椒鹽, 鹽小許

做法:
1.  三文魚洗淨, 印乾水.
2.  兩邊加入醃料略醃.
3.  焗爐預熱 240度.  將三文魚骨放上已鋪錫紙及灑油的焗盤上, 焗 15分鐘.  即成.

BB日誌 - 第 15篇

星期六去完 QE 聽講座, 覺得唔錯, 今次係教點樣產後護理同埋點同 BB沖涼等等, 內容都幾豐富架.  之後去左會展 BB展, 原本其實都冇打算去, 因為怕多人, 不過有同事送左兩張免費飛俾我, 所以就去八下啦.  都真係好多人呀.  結果我地喺入面大約兩個鐘, 都洗左成千蚊呀, 買左 D CD, BB床嘅掛飾, BB用濕紙巾, 棉花球等等, 其實都唔知平唔平架, 不過岩就買囉.  我地走嘅時候仲多人, 入場都要排隊呀.

28週啦, 時間過得好快, 個肚而家好大好頂呀, 大過 daddy個大肚腩啦, 連腳甲都已經剪唔到, 終於都係要戰戰兢兢俾 daddy幫我剪, 好彩冇流血咋.  上星期去私家檢查, 醫生話進展良好, BB大細正常, 醫生仲好好免費用 3D照左一次 BB俾我地睇, 我就睇到 BB側面, 用手仔遮住左少少面仔, 醫生話 BB隻手仔都有 D肉喎, hehe, 醫生話遲 D先照 3D會靚 D清楚 D, 而家唔好晒錢.  Daddy完全冇想像力, 竟然一 D都睇唔到 BB個樣.

28週, 重左約 14-15磅.

自製燻蹄

星期一食左前一日整定嘅燻啼啦, 都唔錯, 幾好味, 不過如果可以調較到好味嘅醬汁點黎食, 就仲好啦.

自製燻蹄

材料:
急凍咸豬手 1隻

做法:
1.  咸豬手先出水 15分鐘.
2.  落水煲 1小時, 用筷子試插入豬手最厚位置, 如能夠穿過, 即可取出待涼.
3.  用小刀去骨, 用保鮮紙包實, 放入雪櫃定形, 取出切片.  即成.

小貼士:
1.  可將咸豬手煲湯, 1小時後取出, 去骨後將骨放回湯內繼續煲, 注意, 咸豬手已有咸味, 湯必須要試味後才決定是否需要再調味.

咕嚕雞球, 椒鹽三文魚頭, 霸皇花咸豬手湯

真係就黎熱死啦, 熱到冇晒心機, 仲熱到病病地添, 幾時先挨完哩個夏天呀?

見天氣咁悶熱, 胃口都唔係幾好, 所以就試下整咕嚕雞球, 酸酸甜甜, 都幾開胃架, 不過哩個餸都幾煩, 真係要 weekend得閒先可以整.  另外, 三文魚有好多 omega3, 岩 BB呀, 於是整左椒鹽三文魚頭, 不過個三文魚頭好似冇咩肉咁.  之前一早買左隻急凍咸豬手放左喺冰霜好耐, 想試整燻蹄, 不過一直都冇整, weekend終於的起心肝整左啦, 仲順便煲左個霸皇花咸豬手湯, 燻蹄就今晚食.

椒鹽三文魚頭

材料:
三文魚頭一個

做法:
1.  三文魚頭開邊, 去鰓洗淨抹乾水, 加入味椒鹽及胡椒粉醃 1-2小時.
2.  焗爐 240度預熱, 將三文魚放上已鋪鍚子及灑油的焗盤上, 焗 25分鐘.  可唧檸檬汁.  即成.

咸蛋皮蛋肉碎粥, 叉燒炒銀針粉

星期六去完藝術中心, 途經星光大道嘅時候, 見有個小妹妹一路行一路叫媽媽, 我地冇為意, 再行前一陣, 有個內地女人好急, 間中叫住個名, 我地估佢梗係唔見左個女, honey於是走上去問佢, 果然係, honey就帶佢返轉頭搵, 我企埋一邊等, 過左 10幾分鐘, honey返黎, 佢話搵唔到個小妹妹, 佢帶個女人去搵左保安員幫佢.  唔知最後點呢, 希望搵得番啦.  如果係我喺個陌生地方唔見左個小朋友, 都唔知點算好呀.  唔通維港嘅景色真係咁吸引?

星期日之晚餐: 咸蛋皮蛋肉碎粥, 叉燒炒銀針粉

BB日誌 - 第14篇

BB, 星期六爹地同媽咪去左藝術中心睇展覽, 爹地話要培養 BB有藝術細胞喎, 哈哈.  我地去睇左畫展, BB又感唔感受到呢!

26週, 冇再抽筋, 不過個胃好似成日都頂住咁, 唔多舒服.

雲吞沙薑雞拼澳門蝦子麵

打風啦, 真係好希望可以打得成 8號, 有突如其來嘅假期 (不過最重要係要 office hours之內啦, 如果唔係就唔好打啦), 有時覺得望打風好衰, 因為好多人會因為打風好慘, 但係作為一個打工仔黎講, 唔洗返工真係好吸引喎.

尋日煮左澳門買番黎嘅蝦子麵做 dinner, 煮左雲吞沙薑雞拼澳門蝦子麵, 簡單一餐都唔錯架.

鹵水拼盤, 白飯魚乾, 潮州粥

是日晚餐: 鹵水拼盤, 白飯魚乾, 潮州粥.

我個鹵水拼盤好豐富架, 有雞腎, 豆腐, 雞翼, 豬腸, 腩肉同埋蛋.  鹵水汁我用現成鹵水汁.  用真空煲黎整, 好林好入味呀!  白飯魚乾用黎送粥, good!

黑糖香蕉杯仔蛋糕

黑糖香蕉杯仔蛋糕出爐啦!  好香黑糖味呀!  天氣咁熱, 喺屋企開冷氣整蛋糕真係最好嘅選擇.

黑糖香蕉杯仔蛋糕

材料 (12杯)
熟香蕉 2隻, 蛋 2隻, 黑糖 120克, 牛油 85克, 泡打粉 1茶匙, 低筋粉 200克, 鹽少許

做法:
1.  牛油放室溫至軟.  蛋也放室溫.  熟香蕉壓成茸.  焗爐 170度預熱.
2.  將牛油打至軟, 分 2-3次加入黑糖, 拌均至軟.
3.  蛋打均續隻加入, 拌勻.
4.  加入香蕉茸拌勻.
5.  篩入低筋粉, 泡打粉和鹽, 拌勻至沒有粉粒.
6.  將蛋糕糊倒入杯仔紙模至 8成滿.  放入焗爐 170度焗 25分鐘.  即成.

木槺布甸

首先要講下就係 P小姐嘅 BB仔已經出左世啦, 好開心呀, 希望 BB快高長大啦.

好耐之前已經想整木槺布甸, 但係 honey話唔好, 佢話木槺食得架咩, 一定唔好食啦, 真係俾佢激死.  不過上次喺澳門食過之後, 佢話好味, 所以我就試整啦.  其實都真係好易做架, 不過要續層續層整就煩左少少啦.  我整緊嘅時候, honey指住 D餅碎問係咩黎, 我話我整 D木槺俾你食呀 wakakaka.

木槺布甸

材料 (4杯)
瑪莉餅 9塊, 淡忌廉 300克, 煉奶 70克, 可可粉 1湯匙, 雲尼拿香油數滴

做法:
1.  瑪莉餅放入保鮮袋, 用麵粉棒壓爛, 盡碎, 加入可可粉拌勻, 備用.
2.  淡忌廉打起至 7成, 加入煉奶和雲尼拿香油, 打至企身.
3.  放入一層忌廉在杯內, 篩入一層餅碎, 再加一層忌廉, 如此類推, 直至最後一層是餅碎.
4.  放入雪櫃冷藏.  即成.

小貼士:
1.  餅碎要篩入忌廉, 因未必能壓成木槺狀, 可用攪拌機磨碎.

BB日誌 - 第13篇

之前買嘅 BB車尋日送黎啦, 爹地好興奮咁拆箱呀, 仲要媽咪幫佢影底相添, BB梗係好鐘意架車啦, 爹地拆箱嘅時候喺度郁郁下, 梗係同爹地一樣咁興奮啦.  哩架 BB車好易開關, 好方便呀.

25週, 冇再抽筋, yeah!!  到目前為止重左 12-13磅, 暫時進度良好, 繼續加油.

白飯魚乾蒸肉餅, XO醬翠玉瓜炒雞柳

今日同朋友 P小姐傾電話, 佢話我聽佢聽日就入院生 BB啦, 我好登佢緊張呀, 希望佢聽日順順利利, 生個健健康康嘅 BB啦.

天氣真係超熱, 日日都有酷熱警告, 我就黎頂唔順啦, 好想帶埋部冷氣出街.  不過就算係熱, 我都好想煮下野食, 雖然煮完個身好似跌左落水咁全身濕晒.

尋晚煮左 D好簡單嘅餸, 用喺澳門買番黎嘅白飯魚乾蒸肉餅, 然後加碟 XO醬翠玉瓜炒雞柳, 加埋媽咪靚湯, 兩餸一湯, 呀, 仲有健康嘅紅米飯添.

白飯魚乾蒸肉餅

材料:
白飯魚乾, 免治豬肉, 薑絲

做法:
1.  白飯魚乾用水浸軟, 瀝乾水份.
2.  免治豬肉用多生抽, 小老抽, 糖拌勻, 再加入生粉, 油, 麻油拌勻.  然後續少加入水份, 直至豬肉變得輕身.
3.  臨蒸前加入少許酒, 將豬肉倒入已塗油的碟內.
4.  放上白飯魚乾, 加上少許薑絲, 隔水蒸 15分鐘.  即成.

XO醬翠玉瓜炒雞柳

材料:
翠肉瓜, 雞脾肉, XO醬

做法:
1. 翠肉瓜切件.  雞脾肉去皮切成柳, 加生抽, 老抽, 糖, 胡椒粉, 生粉, 麻油, 油略醃.
2. 先煎雞柳, 至 7成熟後加入翠肉瓜炒熟, 可加少許水, 最後加入 XO醬炒勻.  即成.

巴斯光年蛋糕 (Happy Birthday to K & C)

尋日星期六, 未夠 9點已經出左門口, 一早去 QE聽講座, 再去銅鑼灣做檢查, 之後又去旺角行街買野, 夜晚再返銅鑼灣同朋友食飯, 好攰呀, 返到屋企都已經 10點幾啦, 所以今日真係要喺屋企好好休息啦, 俾對腳抖下.

尋晚去左皇室堡食飯, 同我嘅好朋友 K小姐, 仲有契女 Chloe慶祝生日, Chloe媽仲訂左個好得意嘅巴斯光年蛋糕, 不過個蛋糕靚就靚, 質感就真係一般啦.

兩日一夜澳門食食食之旅

今年有左 BB, 冇得搭飛機去旅行, 哩有近近地去下澳門啦. 

兩日一夜, 星期日出發, 成個旅程都係食完再食, 出奇地返黎冇增磅, 可能食得多, 又行得多, 出汗又多.  天氣好熱, 不過又 ok, 唔係好悶熱嗰種, 喺香港反而仲辛苦. 

第一日, 精力充沛, 搭船去澳門, 豪華位好闊落, 仲有簡單食物供應.  去到酒店, upgrade去海景房, 間房唔錯, 個景好靚, 仲可以睇到日落添.  第一日行程豐富, 行左一日都唔覺得好攰. 

第一天行程:
上環港澳碼頭出發 --> 搭 shuttle 去十六蒲酒店 check in --> 議事亭黃枝記 (雲吞麵, 蝦子撈麵) --> 添發 (煲仔翅) --> 喜臨門麵家 (手信蝦子麵) --> 洪韾椰子店 (椰子雪糕, 椰汁) --> 街邊阿伯檔 (手信白飯魚仔乾) --> 榮記豆腐 (豆腐, 豆腐花, 細雜餸) --> 返酒店沖涼休息 --> 黃枝記老店 (水蟹粥, 乾炒肉絲伊麵) --> 大三巴 --> 葡 tart --> 豬扒包 + 桂味荔枝茶 --> 外賣權記豬骨粥 + 勤記綠豆沙 --> 返酒店休息

唔知點解就算幾靚嘅酒店, D床同枕頭都係會令人瞓得唔好, 第 2日我同 honey都冇咩精神, 冇咩 mood四圍行.  我地去左漁人碼頭, 咁岩有個展覽, 因為想涼下冷氣而入左去, 其中一個 booth, 係講關於懷孕, honey仲試穿 20磅嘅大肚裝, 感受下陀住 BB嘅感覺, 好搞笑呀.

第二天行程:
酒店早餐 --> 返酒店房 hea --> 執野 check out --> 搭的士去亞利咖哩屋 (周打魚湯, 血鴨, 咖哩雞, 麥烤餅, 木槺布丁) --> 西灣湖邊休息 --> 搭的士去漁人碼頭 --> 展覽 --> 雪糕 --> 行去碼頭搭酒店 shuttle --> 明記牛雜 --> 佛笑樓 (焗馬介休, 焗葡國雞, 石岐乳鴿) --> 咀香園 (手信杏仁餅, free 鳳凰卷) --> 鉅記 (手信鳥結糖, 花生糖, 魷魚絲) --> 甜香園 (椰汁荔枝南瓜爽) --> 返酒店拎野 --> 搭 shuttle去碼頭

成個旅程我最懷念水蟹粥, 真係超好味, 本來唔應該食蟹嘅我, 真係唔可以忍到口呀, 破例一次咁多啦.

BB日誌 - 第12篇

上星期六, 23週的一個早上, 臨起身之前抽筋呀, 我最驚嘅抽筋都係要發生, 大叫老公, 好彩好快冇事.  我要努力做產前運動, 唔想再抽筋啦. 

So far身體都冇咩野, 媽咪同 BB都好健康.  個肚好似大左好多, 開始有少少 "論盡", 不過哩一個月都冇咩增磅.  前幾日去健康院做檢查, 醫生話 BB冇咩問題, 好正常.  BB而家日日都有郁黎郁去呀.

意大利朱古力蛋糕, 薑汁豆漿

尋日放左一日假, lunch同屋企人去左飲茶, 之後返左屋企, 開行冷氣整蛋糕.  屋企 D材料要清倉啦, 如果唔係就過期架啦, 所以我整左 honey好鐘意嘅意大利朱古力蛋糕, 之後整埋薑汁豆漿, 媽咪教我可以放隻蛋一齊煲, 糖心蛋薑汁豆漿, 正.  休息下睇下雜誌就已經過左一個下晝啦.  今日雖然要返工, 不過今日 summer Friday, 都開心啦, 之後就連放 4日啦, yeah~~~~

意大利朱古力蛋糕 (二德惠課程)

朱古力布甸蛋糕
材料: 牛油 40克, 黑朱古力 40克, 低筋粉 20克, 糖 60克, 蛋 1隻

做法:
1.  牛油和朱古力隔熱水坐溶.  蛋糕模掃油及灑糖.  焗爐 180度預熱.
2.  蛋及糖用電打蛋器打至淡黃色, 加入牛油及朱古力溶液拌勻.
3.  篩入低筋粉, 用手動打蛋器拌勻.
4.  倒入蛋糕模, 放入焗爐 180度焗 12分鐘.  待涼備用.

朱古力慕斯
材料: 淡忌廉 30克, 黑朱古力 60克, rum酒 1湯匙, 淡忌廉 150克, 魚膠粉 3克, 水 30克

做法:
1.  30克淡忌廉加朱古力隔熱水坐溶, 加 rum酒.
2.  魚膠粉加水開溶, 隔熱水坐溶至完成溶開.
3.  150克淡忌廉打至 8成.
4.  倒入朱古力溶液和魚膠水, 拌勻.
5.  倒入朱古力布甸蛋糕, 放入雪櫃雪至凝固.

淋面朱古力
材料:  朱古力 60克, 牛油 15克, 牛奶 38克

做法:
1.  朱古力加牛油隔熱水坐溶.
2.  加入牛奶快手拌勻.
3.  快速淋上朱古力慕斯面.
4.  放入雪櫃片刻.

餅面裝飾
材料:  白朱古力

做法: 
1.  隔水坐溶白朱古力, 放入唧袋唧出線條.  即成.

芝士焗茄子, 薯仔雞翼, 蕃茄粟米肉片湯

今日有兩個隊友 last day呀, 有少少失落添, 以後就冇人同我一齊呻啦,  每個人一生中都會出現好多過客, 有 D會做左朋友, 有 D可能哩一世都未必再見, 不過我相信係將來某年某月某日, 突然間諗起佢地, 都仍然會好懷念大家共同有過嘅片段, 希望喺同一天空下, 大家都可以過得安好啦.

講番煮野食啦, 我上網搵左個芝士焗茄子食譜, 星期一試整過, 好好味呀, 我其實都係第一次整茄子咋.  加多碟薯仔雞翼同埋蕃茄粟米肉片湯, 兩餸一湯, good.

芝士焗茄子 (食譜參考自<小窩是日晚餐> http://www.baby-kingdom.com/?uid-24207-action-viewspace-itemid-19787)

材料:
茄子 1條, 洋蔥半個, 蒜茸 1湯匙, 雞蛋 1隻, 芝士 1片或芝士碎

調味:
雞湯半杯, 茄汁 1湯匙, 鹽少許, 胡椒粉少許, 香草適量

做法:
1.  茄子洗淨, 用鹽水浸 15分鐘, 切條備用.  洋蔥切粒.  雞蛋打勻.
2.  先爆香蒜茸和洋蔥, 加入茄子略炒, 再加調味炒勻, 熄火後放上焗盤.
3.  塗上蛋液, 芝士片切條鋪面, 放入已預熱 180度的焗爐焗 8分鐘.  即成.

咸魚雞粒炒飯, 蠔油生菜, 高鈣鯊魚骨燉烏雞

星期一, 繼續落雨, 要返工, 老闆出完 trip, 真係好唔想返工呀.

尋日星期日, 喺屋企煮飯仔, 又試下整 D未整過嘅餸, 除左冰鎮豬手係買嘅, hehe, 話時話, 個冰鎮豬手好好味呀, 我留番條骨遲 D要黎煲湯, 呵呵.  仲有我至愛嘅咸魚雞粒炒飯, 我由細到大都好鐘意食咸魚架, 我細個嘅時候係可以一餐飯剩係得咸魚做餸架, 唔好以為冇錢先食咸魚青菜, 媽咪話咸魚貴過新鮮魚架, 不過咸魚真係冇咩益, 而家小食多滋味啦.  放假最好就係煲下湯, 我用左屋企有嘅湯包, 加埋紅蘿蔔同烏雞, 整左高鈣鯊魚骨燉烏雞湯, 加埋個蠔油生菜, 搞掂啦.

麥提沙夾心曲奇, 果醬曲奇

上回講起整曲奇, 已經冇整幾個月啦, 點解忽然又有 mood整呢?  因為我有兩個同事就黎走啦, 我好想送 D野俾佢地, 諗左好耐都唔知送咩好, 最後就決定整曲奇啦, 親手整嘅曲奇應該有心思卦.  今次哩兩款曲奇, 麥提沙夾心曲奇同果醬曲奇我都係第一次整咋, 都好滿意呀, 最衰屋企唔夠材料, 如果唔係我都想整多 D俾其他人試下架.  我好鐘意哩兩款曲奇呀, 好易整, 連攪拌機都唔洗用, 洗少好多野呀, 岩晒我哩 D懶人, 呵呵.

麥提沙夾心曲奇 (食譜參考自網友雪兒's blog <http://hk.myblog.yahoo.com/leisure-girl/article?mid=1663>)

材料 (可做約 15塊曲奇)
低筋粉 130克, 粟粉 30克, 糖霜 30克, 牛油 80克, 麥提沙一包

做法:
1.  牛油放室溫至軟.  麥提沙壓碎備用.  焗盤鋪上牛油紙.  焗爐 170度預熱.
2.  將粉類及糖篩入牛油, 搓成粉糰.
3.  粉糰分成小份, 壓平後包入麥提沙碎, 小心包好整形.
4.  放入焗爐 170度焗 35分鐘.  出爐後放在架上待涼.  即成.

果醬曲奇 (食譜參考自妙趣曲奇 by Joanne Poon)

材料 (可做約 18塊曲奇)低筋粉 100克, 牛油 50克, 糖霜 50克, 蛋黃 1隻, 蛋白 1隻, 杏仁碎或杏仁片 (個人認為杏仁碎效果較好), 果醬

做法:
1.  牛油放室溫至軟. 
2.  牛油加入糖霜拌勻, 混入蛋黃.
3.  篩入低筋粉, 拌勻成麵糰, 放入雪櫃雪 15分鐘.
4.  焗盤鋪上牛油紙.  焗爐 190度預熱.
5.  麵糰取出, 做成約 2cm小球, 蘸上蛋白及杏仁, 放在焗盤上.
6.  用母指在中間輕輕壓下指印位, 可放入雪櫃片刻以定形, 取出放入焗爐 170度焗 10分鐘.
7.  將餅取出, 在指印位擠上果醬, 再焗 3分鐘.  即成.

白飯魚煎蛋, 蝦醬蒸豬肉

嘩, 好香好香呀, 咩咁香, 就係焗緊曲奇嘅香味呀, 已經幾個月冇焗啦, 不過相就要遲 D先 post出黎, 因為之前有 D相都仲未 post呀, 冇辦法啦, 太懶啦.

今日係星期六, 都唔知點解平時返工就超唔想起身, 但係放工想瞓晏 D都唔係咁易, 好早就會醒啦, 真係衰.  今日落左成日雨呀, 雖然落雨唔好, 不過天氣又冇咁熱冇咁辛苦.

哩兩個餸係星期一整架, 因為要返工, 所以都好簡單整左白飯魚煎蛋同蝦醬蒸豬肉.  前排天氣好熱, 真係冇咩心機煮野食呀, 有時煮完都真係唔想食啦.

曲奇出爐啦, 下次再寫啦!

BB日誌 - 第11篇

近排身邊有好多關於 BB嘅消息呀, 周圍越黎越多 BB啦, 真係開心.

時間真係過得快, 我地嘅 BB已經 5個月多 D啦, 而家好開心咁周圍去睇 BB野.  BB而家日日都會郁呀, 尤其夜晚當佢媽咪我好 relax嘅時候, 有時爹地同佢講故仔佢都會郁黎郁去.  我開始有 D腳腫, D鞋好窄啦, 睇黎都要去買過 D新鞋啦.

岩岩過左嘅星期二係 honey生日, 代 BB同爹地講聲 "生日快樂!"

雪耳煲雪梨, 白菜仔炒豬頸肉, 藥膳蒸雞

今日天氣好悶熱, 又濕咁, 個人都唔多舒服, 星期六下晝最好嘅節目就係開住冷氣瞓晏覺, 真係好正呀!

上個星期未 post D 相上黎, 而家補番數啦.  哩 D係上星期六同日整架, 有雪耳煲雪梨, 白菜仔炒豬頸肉同埋藥膳蒸雞.  Honey勁鐘意個藥膳蒸雞, 其實係去百佳買雞送嘅藥膳料黎蒸架, 不過而家好似冇得送 lu.

BB日誌 - 第10篇

今朝一早 honey就同我一齊去 QE聽講座, 接住去王醫生度做檢查.  BB今次唔多合作呀, 趴喺度, 睇得唔清楚呀, 不過今次照都仲喺仔.  前幾日開始我終於 feel到 BB郁啦, 好似有 D氣泡喺入面 bloo bloo 咁, 特別係夜晚食完飯, 沖完涼好舒服咁坐喺度嘅時候最明顯 feel到.  不經不覺已經 20週, 過左一半啦, 好 enjoy陀住 BB呀.

雙色椒炒雞柳, 冬菇海蔘燴菠菜

又落雨啦, 天氣涼左 D, 冇咁焗, 不過成日落雨都真係幾麻煩.  今晚 honey要開 OT呀, 仲未返, 好悶呀!

星期一煮左乜? 就係雙色椒炒雞柳同埋冬菇海蔘燴菠菜.  要去睇電視啦, 寫住咁多先.

BB日誌 - 第9篇

已經 18週啦, 仲未 feel到 BB郁喎, 真係好心急又好期待呀!

BB, 我知道爹地一定好錫你, 你聽唔聽到爹地每晚都講故事俾你聽呀?

鯽魚赤小豆湯, 洋蔥豬扒, 清炒菜心

Summer Fridays開始啦, 真係好開心, 星期五可以放 3點, 感覺上同放半日冇咩分別.  第一次 Summer Friday, 我放左工去左搵 Alley.  同 Alley玩其實都幾忙架, 佢冇時停, 畫完畫就睇圖書, 一時又要睇 dvd, 一時又玩泥膠.  我同 Alley睇圖書嘅時候, 有件好搞笑嘅野發生, 話說本圖書揭到一頁, 係講條海豚被魚網纏住, 好唔開心, 流左一滴眼淚, 喺哩個時候, Alley突然跑開左, 好奇怪唔知佢走去邊, 隔左一陣, 佢拎住個廁紙返黎, 原來佢要同圖書入面嘅海豚抹眼淚, 嘩哈哈, 笑死我, 估唔到佢會咁.

今朝難得 honey都好早起左身, 我地落街食完早餐就去散步.  天氣好濕, 又悶熱, 都幾辛苦架, 行完返黎就落雨啦, 真係好彩. 

今晚煮乜餸, 我煲左去濕去水腫嘅鯽魚赤小豆湯, 整左洋蔥豬扒同埋清炒菜心, 仲第一次用紅米黎煮飯添.

洋蔥豬扒

材料:
梅頭豬扒, 洋蔥

醃料:
(A)  生抽, 老抽, 糖, 喼汁, 蛋白
(B)  油, 麻油, 生粉

做法:
1.  豬扒用刀背揼鬆, 加醃料(A)醃最少半小時, 之後加入醃料(B)再醃最少 15分鐘.
2.  洋蔥切件, 炒香洋蔥, 加老抽及糖, 炒勻後盛起.
3.  將豬扒煎熟, 盛起切件.
4.  洋蔥及豬扒回鑊, 加剩下的醃豬扒汁, 加少許水, 炒勻後上碟.  即成.
小貼士:
1.  醃豬扒的時候長一點, 可更入味

BB日誌 - 第8篇

前幾日去左 QE度檢查, 一早起身, 送左 honey出門口返工, 我就斯斯然落街食左個早餐, 之後就搭既巴士去 QE, 今次 honey冇一齊去, 因為都知 QE檢查冇咩做, 又冇得照 ultra sound, 冇謂浪費 D假期啦.  我去到 QE, 嘩, 好多人, 首先 check小便, 量血壓同磅重, 之後就等姑娘報告番上次抽血嘅結果, 一切正常, 跟住就係等等等, 最後終於見到醫生, 幫手個助產士好好人.  唔知點解個醫生好似咩都唔清楚咁, check BB心跳仲要同助產士 confirm係我嘅心跳定 BB嘅心跳, 真係好奇怪囉.  最終由去到 QE到走用左兩個鐘, 下次會去健康院檢查啦.

見預左全日都唔返工, 我一個人去左行街, 首先去左花園街, 買左小小 BB野, 襪仔同口水肩, 跟住去左好耐冇去嘅旺角中心, 一入去就見到有件 BB衫好得意, 於是買左啦, 之後行行下見到一間賣孕婦裝, 都幾平而且幾多款, 又買左幾件.  行到有 D攰就返屋企 lu.

BB日誌 - 第7篇

不經不覺 BB已經喺我肚入面有 17週啦, 前一個星期去王醫生度做檢查, 仲照埋結構, 醫生話 BB好好呀, 仲睇到 BB係男仔添, honey梗係好開心啦, BB最緊要健健康康咁出世.  BB都好鍚我呀, 我暫時都總算陀得幾舒服, 只係有時夜晚會覺得有 D腰骨痛.  而家晚晚會聽音樂, 胎教嘛, 希望 BB第日出世乖乖就好啦.  差唔多到有胎動嘅日子, 好期待呀!

椰子燉雞湯, 焗海鮮飯

尋晚整左一餐我自己好滿意嘅晚餐, 有椰子燉雞湯同埋焗海鮮飯.  椰子煲雞我諗我 10年前整過一次, 本來今次係媽咪煲, 但係佢掛住揍孫, 所以俾晒 D材料我自己返屋企煲, 我第一次自己劏雞, 仲去埋雞皮, 搞左我好耐, 平時我通常會叫超市 D阿姐幫我搞掂晒, 不過個湯真係好清甜, 我同 honey一晚已經飲晒啦.  另外焗海鮮飯, 就係有一次喺大家樂, honey叫左哩個飯, 話好好味, 我就膽粗粗話, 車, 我都識整啦, 所以就試下啦, 其實都好易, 冇咩難道架.

椰子燉雞湯

材料:
椰子砌塊
雞一隻去皮
紅蘿白半條砌件
薑兩片
瘦肉

做法:
1.  雞同瘦肉出水.
2.  所有材料放入燉盎, 加入滾水, 隔水燉 3小時, 飲前下鹽調味.

香辣醬油雞翼, 咖哩粉絲蝦煲

我有時真係唔係好明 D人, 自己買嘅係 cheap機票, 又成日投訴哩樣投訴嗰樣, 又話人地 assign D位幾唔滿意, 大佬, 你估你坐 first class咩, 不如自己買架私人飛機啦, 鐘意坐邊就坐邊, 唔好再煩我啦唔該.

尋晚又喺屋企煮飯仔啦, 試左兩個未整過嘅餸, 又出奇地好味喎, honey仲話今次整嘅香辣醬油雞翼係整咁多次雞翼最好味添呀, 叫我多 D整喎.  我自己就好鐘意個咖哩粉絲蝦煲, D粉絲索晒 D汁, 好鬼好味呀, 不過唔好意思, 個食譜我好耐之前上網搵, print左出黎, 我搵唔番個食譜來源啦, 希望原創者唔好介意啦.

香辣醬油雞翼 (食譜參巧自 <小烤箱美食> by 方智敏)

材料:
雞翼 10隻
洋蔥絲 半個

醃料:
鹽 1茶匙, 鮮露 1茶匙, 糖 1湯匙, 生粉 1茶匙, 老抽 1/2茶匙, 橄欖油 1湯匙, Tabasco 1茶匙, 黑胡椒碎適量, 胡椒粉適量

做法:
1. 雞翼用檸檬汁撈勻, 5分鐘後清洗, 出水.
2. 加入醃料拌勻, 放心雪櫃醃 2小時.
3. 焗爐 210度預熱, 在焗盤上放上洋蔥絲, 再放上雞翼, 焗 20分鐘.  即成.

咖哩粉絲蝦煲

杉料:
蝦 6隻, 粉絲 1包, 菜 (我用了白菜仔), 洋蔥絲 半個, 咖哩粉 2茶匙, 上湯 2杯, 水 1杯, 蒜茸 1茶匙, 乾蔥 1粒 (切粒), 薑 數片, 紅辣椒 1 隻 (去籽切絲), 蔥粒 適量

做法:
1.  粉絲用水浸軟.  菜洗摘好.  蝦剪去頭部尖刺, 去腳, 用水沖洗乾淨, 用少許鹽拌勻.
2.  落油, 下薑片, 蒜茸, 乾蔥和咖哩粉炒香, 加入洋蔥絲, 炒香後加入菜炒勻, 倒入上湯和水, 煮滾後加粉絲, 中火煮 10分鐘.
3.  蝦加上面, 加蓋煮至蝦變橙色.
4.  試味後加上紅辣椒絲和蔥粒.  即成.

咸雞脾魚腐上海湯麵

岩岩個 weekend冇喺屋企煮飯呀, 星期六同媽咪慶祝母親節, 星期日去左一日街, 行到腳仔軟, 估唔到我地早成個禮拜慶祝母親節, 酒樓已經勁多人, 仲要已經係食套餐, 真係唔係幾抵, 不過算啦, 一家人食飯都好開心架, 仲有小小開心果 Alley, 真係氹到我地鬼咁開心.

星期一又係煮麵食呀, 冇辦法啦, 我近排唔多鐘意食飯呀.  今次整嘅咸雞脾魚腐上海湯麵, 其實我係參巧大家樂最近嘅咸雞魚腐魚湯米線架, 食過覺得好味, 所以試下整囉.  我見有心心魚腐, 貪得意買黎試下, 不過真係好一般, 好彩主角咸雞脾好好味, 補番數咋.

咸雞脾

材料:
新鮮雞脾兩隻

做法:
1.  洗淨雞脾, 用大約 2-3茶匙鹽搽勻雞脾, 醃過夜.
2.  大火水滾後, 隔水蒸 20分鐘.  即成.