整糕記之足料蘿蔔糕

等我 post埋蘿蔔糕個食譜啦, 哩個係朋友瑪姬喺 msn 教我架, 我試過之後, 改左少少個食譜.  做法好簡單架.

蘿蔔糕 (食譜參考自瑪姬轉述, 再作改良)

材料: (可做 1盤 6"及 1盤 7"蘿蔔糕)
白蘿蔔 3斤 (約 1800克)
粘米粉 300克
蝦米, 臘腸, 膶腸, 臘肉 隨意

調味:
1 茶匙糖
2 茶匙雞粉
少量胡椒粉

做法:
1.  蘿蔔刨絲. 
2.  蝦米, 臘腸, 膶腸, 臘肉切粒, 下鑊炒香 (不用加油), 盛起備用.
3.  蘿蔔絲連水下鑊, 煮至熟, 加調味混和.
4.  熄火, 加入臘味粒拌勻 (可留起部份最後作糕面裝飾), 再加入已過篩的粘米粉攪勻 (如有需要, 可加少許水).
5.  倒入已塗油的糕盤內.  蓋上錫紙.
6.  水滾隔水蒸 45分鐘至 1小時.  加上其餘臘味粒及蔥花, 即成.

小貼士.
1.  小心蒸乾水, 隔一段時間打開蓋檢查, 若缺水, 即要添加滾水.
2.  糕盤上蓋上錫紙, 以防開鑊蓋時流入水蒸氣影響外觀.
3.  用牙簽插入糕內測試, 若牙簽沒有黏上麵漿, 即已熟透.

整糕記之椰汁年糕

我想試整年糕同蘿蔔糕好耐啦, 今日咁岩 honey 好懶, 唔想出街, 所以我就一次過試晒兩樣啦.  兩款糕其實都唔難整, 不過就要花 D 時間去蒸囉.  椰汁年糕真係好簡單, 完全係零難度.  至於蘿蔔糕呢...  係刨蘿蔔真係刨到手軟, 家下隻手仲有 D痺添.

椰汁年糕
(食譜參考自   http://hk.myblog.yahoo.com/louise-sumyee/article?mid=2296)

材料: (可做 1盤 6"年糕)
庶糖片糖 250克
清水 250克
糯米粉 240克
粘米粉 20克
木薯粉 (生粉) 20克
澄麵 20克
椰漿 80克
橄欖油 (或菜油) 1湯匙

做法:
1.  庶糖片糖加水煮溶後待涼備用.
2.  所有粉類過篩, 加入糖水慢慢拌勻.
3.  分數次加入椰漿拌勻至完全沒有粉粒.
4.  加入油至完成混和.
5.  將麵糊倒入已塗油的糕盤內.  蓋上錫紙.
6.  水滾隔水大火蒸 1小時 15分鐘.  趁熱放上紅棗作裝飾.  待涼即成.

小貼士.
1.  小心蒸乾水, 隔一段時間打開蓋檢查, 若缺水, 即要添加滾水.
2.  糕盤上蓋上錫紙, 以防開鑊蓋時流入水蒸氣影響外觀.
3.  用牙簽插入年糕內測試, 若牙簽沒有黏上麵漿, 即已熟透.

得意印模牛油曲奇

今晚同幾個以前 M公司嘅舊同事食飯, 好開心, 傾到都唔捨得走.  我特登尋晚整左 D印模牛油曲奇送俾佢地, 仲係 J小姐嘅囡小柔柔鐘意嘅 Chip & Dale添.  話時話, 我之前真係唔知佢地叫 Chip & Dale

印模牛油曲奇
(食譜參考自   http://shirleyliving.mysinablog.com/index.php?op=ViewArticle&articleId=1522966)

材料: (可做大約 30塊曲奇)
牛油 100克
糖霜 80克
鹽 少許
蛋黃 1個
低筋粉 200克

做法:
1.  牛油及蛋放回室溫.
2.  牛油加糖霜及少許鹽打至淡黃色成軟滑忌廉狀.
3.  加入蛋黃輕輕拌勻.
4.  分數次加入低筋粉拌勻, 搓成粉團.
5.  放入保鮮袋中, 放入雪櫃冷藏 30分鐘.
6.  焗爐 180度預熱.  焗盤鋪上焗爐紙備用.
7.  取出粉團, 用棍輾平約 3mm厚.
8.  用曲奇模印出形狀.
9.  入爐 180度焗約 12分鐘至表面微金黃.
10.  放上鐵架待涼, 即成.

小貼士:
1.  每塊曲奇厚度盡量平均, 否則薄的會較易焗燶.
2.  入爐時間因個別焗爐有所出入, 見曲奇表面呈微金黃色即可取出.
3.  用糖霜代替砂糖, 曲奇會較鬆化.
4.  可用金桶牛油, 會更香牛油味.

香到飛起的香蕉蛋糕

朋友瑪姬話屋企有時有香蕉食唔晒, 等到起晒梅花點.  其實有梅花點嘅香蕉最好就係整香蕉蛋糕.  我以前麻麻地鐘意食香蕉蛋糕, 不過自從整過一次, 就鐘意左個味啦, 尤其係焗緊嘅時候, 真係好香架.

香蕉小蛋糕 (食譜參巧自 <自家製手工蛋糕> by Kae)

材料: (可做 3個小蛋糕, 如圖)
香蕉 1隻 (壓爛成茸)
蛋 1隻
糖 50克
牛油 50克
牛奶 10克
低筋粉 50克
泡打粉 1克

做法:
1.  牛油及蛋先放回室溫.  焗爐 180度預熱.
2.  牛油加糖打至淡黃色.
3.  蛋打散, 分 2-3次加入拌勻.  再加入牛奶及香蕉茸.
4.  加入已篩過的低筋粉混和.
5.  倒入蛋糕紙杯至 8成滿.
6.  入爐 180度焗 30分鐘, 即成.

小貼士:
1.  用手動打蛋器協助, 較易將低筋粉拌勻.
2.  用牙簽斜插入蛋糕中心測試蛋糕, 若牙簽沒有沾上粉漿, 即蛋糕已熟.
3.  若蛋糕面已轉色而蛋糕未熟, 可蓋上錫紙繼續焗.
4.  用較熟的香蕉, 味道會更香.

苦中一點甜のMocha杏仁曲奇

今日約左一班舊同事食飯, 佢地成日問幾時可以試下我整嘅野食, 所以尋日同屋企人飲完茶番黎, 拿拿臨去焗曲奇.  我整左苦中一點甜嘅 Mocha杏仁曲奇, hehe, 點解苦中一點甜?  咪就係因為我用嘅 Nescafe Goldblend 咖啡粉原來都幾苦, 所以整出黎嘅曲奇都有少少苦囉.  下次買D冇咁苦嘅咖啡粉再試過先.

Mocha杏仁曲奇 (食譜參考自 <甜蜜蜜蛋糕話咁易2> by Bowie Yim
材料: (可做大約30塊曲奇)
牛油 75克
糖 75克
蛋 25克 (約半隻蛋)
低筋麵粉 130克
可可粉 10克
咖啡粉 10克
杏仁片 35克

做法:
1.  將已溶融牛油加糖拌勻.  然後再加入蛋液混和.
2.  篩入所有粉類, 搓混.
3.  加入杏仁片, 搓成粉團.
4.  將粉圑用保鮮紙包好, 搓成三角或其他形狀柱體.
5.  放入冰格雪30分鐘定形.
6.  焗爐預熱160度.  焗盤鋪上焗爐紙備用.
7.  將粉團切成0.5cm厚片.
8.  放入焗爐160度焗20分鐘.
9.  出爐後放上鐵架待涼, 即成.

招牌花甲湯米 by 輝記小廚

今晚嘅晚餐由 honey 落廚, 因為今日好晏先飲完茶, 所以諗住食 D 簡單嘅野, 於是 honey 指揮左我去買花甲呀, 菜呀, 梅頭豬肉同米粉, 整左哩個招牌花甲湯米啦.  D 湯勁鮮甜, 豬肉又入味, 真係 ~~ 好好味呀.

焗小小藍莓芝士蛋糕

成日好想整 blueberry 嘅蛋糕, 終於前排買左盒藍莓醬, 可以試整唔同 blueberry 嘅 dessert 啦.  今次整左哩個焗小小藍莓芝士蛋糕, 細細個, 小食多滋味嘛.

唔知大家有冇一個煩惱, 就係每次整完芝士蛋糕 or 朱古力蛋糕, D用具都會漿住晒, 好難食, 建議大家開熱水先沖洗, 咁會比較易洗同乾淨架.

焗藍莓芝士蛋糕 (食譜參考自<自家製手工蛋糕> by Kae)

材料: (可製3.5"蛋糕兩個)
忌廉芝士280克
牛油 18克
糖 40克
蛋 1隻
藍莓果醬 20克
另適量藍莓果醬作餅面裝飾

製法:
1.  焗爐180度預熱, 蛋糕模鋪上焗爐紙備用.
2.  將室溫忌廉芝士加糖打至軟滑.
3.  加入蛋拌勻, 再混和牛油溶液, 最後加入藍莓醬拌勻.
4.  將混合物平均放入兩個蛋糕模至9成高.
5.  放入焗爐180度焗35分鐘.
6.  出爐後待涼, 脫模, 蛋糕面鋪上藍莓醬, 放入雪櫃雪凍, 即成.

小貼士:
1.  蛋糕出爐後不用倒扣, 中間下陷乃是正常, 鋪上藍莓醬遮蓋即可.
2.  兩個小蛋糕模可同時入爐, 其間可互轉位置, 令蛋糕可均勻受熱.

滋味叉燒醬小雞搥

有朋友話想要一D好簡單嘅食譜, 哩碟係我之前整過嘅叉燒醬小雞搥, 真係又簡單又好味架.

特登post出黎俾大家參考下.

叉燒醬小雞搥

材料:
小雞搥 8隻

醃料:
叉燒醬 3湯匙

製法:
1.  小雞搥先用適量檸檬汁拌勻10分鐘, 然後清洗抹乾, 可去除雪味.
2.  用叉燒醬拌勻, 最好醃數小時.
3.  預熱220度焗爐, 焗盤放上錫紙.
4.  小雞搥入爐焗15分鐘, 之後取出塗上蜜糖, 再焗2-3分鐘, 即成.

小貼士:
1.  可在小雞搥上界幾刀, 會更入味.
2.  叉燒醬份量可隨個人口味加減.

甜蜜蜜蜂蜜蛋糕

哩個蜂蜜蛋糕係我嘅舊作, 真係超鬆軟架, 我整過幾次, 屋企人都話good架.

蜂蜜蛋糕

材料:
長型蛋糕模
蛋 3隻
低筋粉 100克
糖 110克
蜂蜜 3湯匙
沙拉油 適量

製法:
1.  先將蛋糕模鋪上焗爐紙, 焗爐160度預熱, 蜂蜜用2湯匙熱水調開.
2.  蛋白打至企身, 期間分2-3次加入糖.
3.  蛋黃一個個加入, 輕輕拌勻, 然後加入蜂蜜水混和.
4.  將已篩好的低筋粉加入拌勻.
5.  將粉漿倒入蛋糕模, 刮平表面.
6.  入爐160度焗40-45分鐘.
7.  焗好後連模具一同放涼, 不用倒扣.
8.  剪好一張跟蛋糕面同大的焗爐紙, 掃上適量沙拉油, 蓋在蛋糕面上, 反轉蛋糕模連蛋糕, 取出蛋糕模, 待蛋糕完全冷卻, 再次反轉蛋糕, 拿掉焗爐紙, 切件即成.

小貼士:
1.  用手動打蛋器代替刮刀, 較易將低筋粉拌勻.
2.  用牙簽斜插入蛋糕中心測試蛋糕, 若牙簽沒有沾上粉漿, 即蛋糕已熟.
3.  若蛋糕面已轉色而蛋糕未熟, 可蓋上錫紙繼續焗.
4.  蜂蜜分量可隨個人口味有所調整.

紅棗五香蒸雞

今日又係星期一啦, 逢星期一我多數會自己煮飯.  因為要返工, 星期一多數整D簡單D嘅餸, 好似蒸咁啦.  今晚就整左紅棗五香蒸雞. 第一次整估唔到都好好味噃, 五香味好香架, 不過如果可以再醃耐D, 就very good啦

紅棗五香蒸雞
(食譜參考自何師奶http://hk.myblog.yahoo.com/KellyandRuby-mami/article?mid=38195)

材料:
雞件, 去核紅棗

醃料:
薑汁+薑茸, 雞粉, 老抽, 糖, 五香粉, 麻油, 生粉

製法:
1. 醃料拌勻雞件, 加去核紅棗, 醃最少30分鐘.
2. 將雞件平放於碟上, 隔水蒸15分鐘即成.

小貼士:
1. 醃雞時間越長會越入味.
2. 蒸雞時間因雞件大小與多少要作適當調較.

結婚一週年紀念之醉人甜蜜蜜蛋糕 (百利甜酒可可芝士凍餅)

今日係我地結婚一週年啦, 時間真係過得快.  結左婚哩一年, 我學識整好多野食啦, 中菜西餐甜點, 樣樣都識少少啦.  整野食真係好開心架, 尤其見到食嘅人讚好味, 真係好有滿足咁架.

以前鐘意整D手作仔, 好似麵粉粘土啦, 耳環咁啦..不過都唔及整野食嘅滿足咁大, 因為可以同人分享嘛, GOOD!!!

今日為左慶祝結婚紀念, 特別整左哩個醉人甜蜜蜜蛋糕, HAHA, 梗係要用番個sweet D嘅名啦.

其實哩個係百利甜酒可可芝士凍餅.  第一次用百利甜酒整蛋糕, 有少少酒香, 加埋滑滑嘅芝士忌廉, 又唔太甜, 真係好味架.

百利甜酒可可芝士凍餅
(食譜參考自<美味DIY> http://www.rthk.org.hk/elearning/dessert/cake_bcheesecake.htm)

材料:
餅底 (6"蛋糕)
消化餅 (大約4-5塊)
牛油30克

餡料
忌廉芝士200克
糖50克
淡忌廉80克
可可粉1湯匙
百利甜酒2湯匙
魚膠粉2茶匙
冷開水60毫升

製法:
1. 消化餅放入保鮮袋, 用麵粉棒輾碎, 倒入碗中, 加入已溶牛油拌勻, 將餅碎放在模底壓平, 放進雪櫃冷藏一小時.
2. 淡忌廉打起備用.
3. 魚膠粉加冷開水拌勻, 隔熱水坐溶.
4. 將忌廉芝士, 糖, 可可粉打成軟滑狀.
5. 將魚膠粉液及打起淡忌廉, 加入(4)混合.
6. 將混好的餡料例入餅模內, 放入雪櫃雪至凝固.
7. 脫模後加上裝飾即成.

小貼士:
1. 可用慕斯模代替蛋糕模, 於模底包上保鮮紙.
2. 脫模時, 可先用風筒吹模邊或用熱毛巾包裹片刻, 會較易脫模.

心心藍莓夾心餅

見到好多人都整個BLOG同其他人分享自己整嘅野食, 我都心思思想番個 hoho ^o^ .  今日整左心心藍莓夾心餅, 睇落好易, 其實都有少少花時間架.  不過honey讚好味, 咩都抵番晒 ^^

心心藍莓夾心餅 (食譜參考自妙趣曲奇 by Joanne Poon)

材料:
麵粉125克
牛油60克
蛋黃一隻
糖霜25克
榛子粉15克

餡料:
藍莓果醬適量

裝飾:
糖霜

製法:
1. 牛油切小粒, 加入已篩好的麵粉, 用手指尖搓入牛油成麵包糠狀.
2. 加入糖霜, 榛子粉及蛋黃, 搓成麵糰, 用保鮮紙包好, 放入冰箱冷藏片刻.
3. 焗爐180度預熱.
4. 將麵糰輾成1/4cm厚, 用餅模印出雙數分量的曲奇 (我用大約5cm的餅模, 可印30塊).
5. 將半數曲奇印出空心 (即15塊).
6. 焗約10分鐘, 待涼.
7. 空心曲奇灑上糖霜.
8. 將適量果醬塗在餅上, 蓋上空心餅, 即成.

貼士:
1. 空心曲奇與餅底曲奇, 適宜分開焗, 否則空心曲奇會易燶.
2. 麵糰盡量輾得均勻.