士多啤梨乳酪芝士蛋糕

有日執下屋企廚房啲野, 發現好多過期野, 有啲仲係過左成半年, 好浪費, 發現雪櫃有盒cream cheese下個月都到期, 於是買左士多啤梨同乳酪整芝士蛋糕.  有一排無整蛋糕, 水準差啲, 不過老公阿仔都依然覺得好味, 哈.

士多啤梨乳酪芝士蛋糕 (6")

材料:
清蛋糕一片
cream cheese 200g
士多啤梨茸 110g
原味乳酪一杯約 140g
糖 60g
魚膠粉 6g
凍滾水 36g
士多啤梨適量 (作裝飾用)

做法:
1. 清蛋糕放入蛋糕模內備用; 魚膠粉加水拌勻, 坐熱水至完全溶解.
2. cream cheese放回室溫至軟, 加入糖打至軟滑.
3. 加入乳酪及士多啤梨茸拌勻
4. 加入魚膠粉水快手拌勻.
5. 將芝士漿倒入蛋糕模, 輕手登數下, 放入雪櫃雪最少1小時, 起模及裝飾, 即成.

小貼士:
1. 起模時可用風筒吹蛋糕模兩圈, 會較易甩模. 
2. 士多啤梨可先切細粒, 再用湯匙將士多啤梨粒壓成茸, 可保留部份果肉, 比用攪拌機更有口感.
3. 可用消化餅碎加牛油作餅底代替清蛋糕.


清蛋糕食譜可參考以下食譜 (參巧自韋太烹飪教室)

材料:
低筋粉 40g
糖 40g
蛋白 2隻
蛋黃 2隻
牛油 / 橄欖油 20g

做法:
1.  雞蛋放回室溫.  蛋糕模鋪上焗爐紙.  焗爐 180度預熱.
2.  蛋白打起, 分 2-3次加入糖, 打至企身.
3.  加入蛋黃, 用橡皮刀快手拌勻.
4.  篩入低筋粉, 用手動打蛋器拌勻.
5.  加入油, 快手拌勻.
6.  倒入蛋糕模, 放入焗爐 180度焗 25分鐘. 
7.  出爐後倒扣.  待涼後去面, 切1片, 將圓周切入約1cm, 備用.

無花果蘋果鱷魚肉湯

豐豐嘅咳好得7788, 而家輪到我同老公啦, 好彩我地都唔算好嚴重, 即刻趁weekend再煲鱷魚肉湯止下咳, 今次加蘋果煲, 個湯好清甜.

無花果蘋果鱷魚肉湯

材料: 無花果, 蘋果, 粟米, 鱷魚肉乾, 南北杏, 瘦肉, 元貝, 薑片

做法:
1. 鱷魚肉乾浸軟, 連瘦肉加薑片出水; 蘋果去芯; 粟米切段.
2. 水滾後放入所有材料, 大火煲半小時, 轉慢火再煲1.5小時, 落鹽調味, 即成.

猴頭菇蟲草花鱷魚肉湯

哩期好興鱷魚肉煲湯, 我一直知對哮喘好好, 聽朋友講原來可以止咳, 對鼻敏感都唔錯喎, 所以我又試下啦, 我用左鱷魚肉乾, 飲落同普通湯差唔多, 好飲.

猴頭菇蟲草花鱷魚肉湯

材料: 猴頭菇, 蟲草花, 鱷魚肉乾, 豬展, 無花果, 紅蘿蔔, 小元貝, 薑片
 
做法:
1.  猴頭菇浸軟, 揸乾水分; 蟲草花浸水數次; 鱷魚肉乾浸軟, 加薑片出水; 豬展出水; 紅蘿蔔刨皮切件.
2.  水煲放入所有材料, 大火煲30分鐘, 放入真空煲數小時, 飲前翻滚, 落鹽調味, 即成.

無花果淮山茨實豬手湯

無花果淮山茨實豬手湯

材料: 無花果乾, 淮山, 茨實, 元貝, 急凍咸豬手, 紅蘿蔔, 薑片

做法:
1. 豬手出水; 紅蘿蔔去皮切件; 其他洗淨.
2. 水滾放入所有材料大火煲30分鐘, 放入真空煲.
3. 飲前煲滾, 有需要落鹽調味, 即成.

西洋菜無花果鴨腎湯

好耐無寫 blog啦, 6月嘅時候離開做左5年嘅公司, 同阿仔過左個暑假, 陪佢開學, 之後公司又叫我返去幫手做part time 3個幾星期, 完左一星期就返新工啦, 而家份新工好好呀, 人工高左, 老闆同事又好好, 好開心好滿意, 希望繼續都係咁好啦, 哩一年對我黎講都好大轉變, 好感恩上天為我安排嘅一切.

冬天啦, 我最鐘意西洋菜湯, 好好味, 最岩冬天飲.  加埋鴨腎夠晒味, 鹽都唔洗落.

西洋菜無花果鴨腎湯

材料: 西洋菜, 鴨腎, 無花果, 果皮, 乾元貝, 豬展, 南北杏

做法:
1.  豬展出水; 果皮浸軟刮囊; 其他洗淨.
2.  水滾放入所有材料, 大火煲30分鐘, 轉慢火煲1.5小時, 有需要落鹽調味, 即成.

薑蔥炒蟹, 馬蹄魷魚蒸肉餅, 三文魚炒蛋

薑蔥炒蟹

材料: 蟹件, 薑片, 蔥段, 辣椒

調味: 水, 生抽, 老抽, 糖, 蒜茸辣椒醬

做法:
1.  蟹肉部份沾上少許生粉.  
2   開鑊落油, 蟹肉部份向下略剪, 加入薑片, 蔥段及辣椒快炒, 加入調味快炒, 合蓋焗約5分鐘.  即成.

馬蹄魷魚蒸肉餅

材料: 肉碎, 馬蹄, 魷魚乾

醃料: 生抽, 老抽, 糖, 生粉, 胡椒粉, 麻油, 水

做法:
1.  馬蹄去皮切細粒; 魷魚乾浸軟切細粒.
2.  馬蹄粒及魷魚粒加入肉碎, 再加醃料拌勻, 略醃.
3.  水滾放入肉餅, 蒸約8分鐘至熟.  即成.

三文魚炒蛋

材料:  三文魚柳, 蛋

做法:
1.  三文魚切粒, 加入鹽同胡椒粉略醃;  蛋發開成蛋漿.
2.  開鑊落油, 放三文魚略炒, 加入蛋漿, 快手炒熟, 熄火灑上蕃茜.  即成.

意大利朱古力蛋糕

好耐好耐無整蛋糕啦, 原本想整芒果蛋糕, 但唔知係咪因為近中秋節, 啲芒果拎晒去整果籃, 竟然周圍都買唔到芒果, 最後整左我最拿手嘅朱古力蛋糕, 雖然咁耐無整, 仲keep到水準架, 豐豐都話好好味.

食譜可參照以往食譜 --- 意大利朱古力蛋糕

莞荽皮蛋斑塊湯米線

有一次同朋友飲茶, 食左個莞荽皮蛋斑塊湯米線好好味, 加上不嬲都幾鐘意飲莞荽皮蛋湯, 於是自己又試下整哩個米線, 夏天唔想食飯, 哩個湯米都係一個唔錯嘅選擇.

莞荽皮蛋斑塊湯米線

材料: 莞荽, 皮蛋, 急凍斑塊, 米線, 薑片, 雞湯,水

做法:
1.  莞荽用水反覆浸至乾淨; 皮蛋切件; 斑塊切件用鹽及胡椒粉略醃.
2.  雞湯+水煲滾, 加入薑片, 莞荽, 中火煲約半小時.
3.  加入米線, 皮蛋及斑塊, 有需要落鹽調味, 即成. 

豐豐搭飛機去 - 台北之行 @2歲10個月

講左好耐嘅family trip終於成行啦, 本來好開心, 點知去到機場發生小插曲, 老豆個台證有問題去唔到呀, 超唔開心, 超失落, 個trip係我一手安排, 令到老豆一場歡喜一場哭, 我覺得好內疚...

雖然如此, 我地最終都完成左個trip, 都玩得好開心.  豐豐第一次搭飛機一啲都唔驚, 遇到氣流大家都嘩嘩聲, 豐豐仲覺得好玩笑到卡卡聲添.  回程時, 豐豐好快瞓左, 飛機上嘅兒童餐無食到, 到落機佢醒左就扭計要食兒童餐.

今次去台北好玩過之前得我地兩公婆去, 多人可以試多啲唔同嘅食物, 仲租車去左十分放天燈添.

好希望好快真正全家一齊去旅行呀.

出發啦,搭飛機啦

必食西門町嘅阿宗麵線

鼎王麻辣火鍋, 任食鴨血好正

台北市立動物園

夜市中撈金魚

上引水產

喺上引水產買左勁多野食返酒店開餐, 生蠔長腳蟹好鮮甜

當然唔少得鼎泰豐小籠包啦

十分瀑布

放天燈, 豐豐都有份寫(畫)

九份嘅牛肉麵, 依然咁好味

野柳地質公園

近黃昏嘅野柳好靚

太和殿, 比鼎王更好味, 麻辣火鍋入面嘅豆腐好味到停唔到口

中正紀念堂

必買手信, 鴨舌, 鴨腎, 豆腐

返香港啦

鮮奶燉蛋

燉蛋蒸蛋煎蛋一直係我弱項, 有朋友教路整燉蛋, 我又再試, 經過一次失敗, 終於成功整到又滑又好味嘅鮮奶燉蛋, 好開心呀!

鮮奶燉蛋

材料: 鮮奶半碗, 糖1-2茶匙, 蛋一隻

做法:
1. 將糖加入鮮奶拌勻, 坐熱水至糖完全溶解, 待涼.
2. 蛋打勻, 過篩, 加入鮮奶糖水中拌勻, 不起泡沫, 蓋上鍚紙.
3. 水滾轉中小火, 燉8分鐘, 即成.

豐豐的第一個畢業禮

豐豐PN班畢業啦, 由初初返學咩都唔識, 到而家識好多野, 咩都識講, 真係好多謝老師同所有教職員嘅教導同埋愛心, 我覺得當初俾佢返PN班哩個決定好正確.  K1會轉去另一間幼稚園啦, 希望去到新學校會好開心, 學識更多嘅野啦.  畢業禮當日, 豐豐同其他同學仔一齊表演, 估唔到佢對住咁多人不單冇喊, 仲記得晒啲動作添, 叻叻!

火腿通粉

簡簡單單又一餐.

花型腸仔包

_{總算成功用麵包機搓粉然後自己整造型包.  食譜參考自<自家製麵包>.}

光波泰式豬頸肉

醃咗豬頸肉BBQ食唔晒, 留番黎波一波, 送公仔麵, 正.

光波泰式豬頸肉

材料: 豬頸肉

醃料: 生抽, 糖, 魚露, 麻油, 蒜茸, 老抽, 指天椒粒

做法:
1.  豬頸肉洗淨抹乾, 用醃料醃過夜.
2.  光波爐高架塗上油, 260度光8分鐘, 反轉光6分鐘, 塗上蜜糖再光2分鐘, 即成.

光波燒排骨

之前驚光波ribs會好鞋, 原來都OK喎, 老公話個醃料好味, 又簡單又正.

燒排骨
材料: 急凍肉排

醃料: 海鮮醬, 叉燒醬, 酒, rosemary, 水少許

做法:
1.  肉排用醃料醃數小時, 過夜更佳.
2.  焗盤掃少許油, 放上肉排, 將剩餘醃料鋪上面.
3.  放入光波爐低架, 260度光10分鐘, 反轉再光10分鐘, 最後2分鐘打開塗上蜜糖.

椰香斑蘭麵包

買左好耐嘅斑蘭香油終於有機會出場啦, 跟網友整左椰香斑蘭麵包, 好味好軟熟.  我覺得綠色深色左啲, 下次可減少斑蘭香油嘅分量.

椰香斑蘭麵包 (食譜參考網友Sandy Ng)
材料:
牛油 15g
鹽 5g
糖 40g
水 40ml
椰漿 150ml
斑蘭香油 3茶匙
高筋粉 250g
酵母粉 3g

做法:
1.  將以上材料順序放入麵包機, set 甜包mode.
2.  完成後取出麵包放上架待涼後切片, 即成.

芝麻豆漿方包

又玩麵包機啦, 今次用自家製豆漿整芝麻豆漿方包, 用佢夾芝士蛋做早餐, yummy.

三文魚大蝦焗飯

星期日同仔一早去左游水, 之後攰到唔想整咁多野, 簡單焗飯加光波燒雞翼就算, 用罐頭做汁, 又方便又好味, 食到lam lam脷.

三文魚大蝦焗飯
材料: 金寶蕃茄濃湯, 三文魚柳, 蝦, 黃椒, 洋蔥, 飯

做法:
1.  黃椒及洋蔥切條; 蝦去殼; 三文魚及蝦用少許鹽及胡椒粉略醃.
2.  黃椒及洋蔥略炒, 盛起備用.
3.  三文魚及蝦煎至7成熟, 盛起備用.
4.  罐頭湯加半罐水煮至滾, 熄花備用.
5.  焗爐預熱180度.
6. 準備玻璃焗盤, 放上飯, 黃椒及洋蔥, 然後三文魚及蝦, 淋上蕃茄汁, 最後鋪上芝士碎.
7. 入爐焗約15分鐘.  即成.

小貼士:
1.  飯改用炒飯更佳.

第一機新鮮麵包出爐了 - 甜麵包

哩期好多人鐘意玩麵包機, 見我妹鐘意手搓麵包多啲, 我就拎左佢部麵包機返屋企玩, 簡單試下跟機甜麵包食譜, 出爐超超超鬆軟, 軟到幾乎切唔到, haha, 新鮮仲暖暖地時食, 好好味呀.

粟米忌廉三文魚通粉

今次用左少少粟米忌廉罐頭湯開水做湯底, 加埋三文魚煮通粉, 最後加蛋花, 又簡單又yummy!

軟綿綿朱古力蛋糕仔

哩個weekend整左兩轉蛋糕, 第一轉cheese cake個樣唔靚仔, 不過好好味, 第二轉整朱古力蛋糕, 靚仔好多, 依舊軟綿綿, 好好味, 一出爐豐豐就搶食, 整左24個一日食晒.

朱古力蛋糕仔
材料:
朱古力 100g
無鹽牛油 30g
蛋 2隻
牛奶 80g
低筋粉 25g
粟粉 20g
糖 55g

做法:
1.  蛋放回室溫, 分開蛋黃及蛋白; 焗爐180度預熱; muffin模放上紙杯仔.
2.  牛油, 朱古力及牛奶坐溶及拌勻, 加蛋黃輕手拌勻.
3.  蛋白分兩次加入糖打發至企身.
4.  加入朱古力溶液輕手拌勻.
5.  篩入粉類, 用手動打蛋器快手及輕手拌勻至無粉粒.
6.  用小匙將粉漿放入紙杯仔至8-9成滿.
7.  放入焗爐下層焗約18-20分鐘, 取出待涼.  即成.

小貼士:
1.  用牙簽插入蛋糕中央如無沾上粉漿即代表熟透.
2.  放入焗爐下層較佳, 以免蛋糕面過熱而爆開.

芝士南瓜三文魚湯烏冬

我實在太鐘意整南瓜俾豐豐食啦, 因為次次佢都食到津津有味, 今次用南瓜煮左個湯, 加埋三文魚同烏冬, 最後加芝士, 豐豐又KO晒.

海鮮喇沙

之前喺賣東南亞食物嘅舖頭買左包喇沙醬料, weekend煮左海鮮喇沙食, 好味過Toast Box, hehe, 仲可以乘機清下冰霜嘅食物.

海鮮喇沙
材料: 喇沙醬料, 椰漿, 豆卜, 米線, 墨魚丸, 銀芽, 帆立貝, 蝦, 蟹柳

做法:

1.  蝦剪去鬚及腳.
2.  喇沙醬加水煮滾, 之後順序加入椰醬, 豆卜, 米線, 墨魚丸, 銀芽, 帆立貝, 蝦及蟹柳, 煮至所有食物熟即成.

小貼士:
1.  我用即食米線, 如非即食米線, 需預先煮熟及過冷河.
2.  豆卜可一開二會更易入味.

芝士南瓜肉碎通粉

芝士南瓜肉碎通粉好味, 就好似麥記嘅芝士扭扭粉咁, 難怪阿仔咁鐘意啦.

海星豬手湯

繼上星期煲左龜板湯, 今個星期煲海星湯, 據說有化啖止咳嘅功效, 個湯嘅果皮味略重, 今次用左隻急凍咸豬手煲, 隻豬手點蒜茸辣椒醬食, 正呀!

海星豬手湯
材料: 海星湯包, 急凍咸豬手, 紅蘿蔔, 粟米

做法:
1.  咸豬手出水15分鐘; 紅蘿蔔刨皮切大件; 粟米切段; 湯包浸水30分鐘.
2.  所有材料放落水, 大火煲30分鐘, 轉慢火再煲1.5小時, 落鹽調味, 即成.

龜板湯, 芝士磨菇汁海鮮焗飯, 光波蒜茸扇貝

星期日煲左龜板湯, 啲湯係黑色架, 豐豐話係咪飲豉油, haha, 雖然係黑色, 不過都幾好味架.  本來想光芝士蒜茸扇貝, 老公話想試新買嘅辣椒油, 結果冇加芝士, 原來加埋辣椒油一齊食好好味架.

龜板湯
材料: 龜板湯包, 西施骨, 紅蘿蔔, 粟米

做法:
1.  龜板湯包材料先浸半小時; 西施骨出水; 紅蘿蔔刨皮切大件; 栗米切段.
2.  所有材料放入水, 大火煲半小時, 轉慢火再煲1.5小時, 落鹽調味, 即成.芝士菠菜磨菇汁海鮮焗飯
材料:  白飯, 磨菇罐頭湯, 菠菜碎, 蝦, 蟹柳, 魚柳, 芝士碎

做法:
1.  蝦去殼; 所有海鮮灑上少許鹽; 魚柳灑上生粉.
2.  先煎海鮮至7成熟, 備用.
3.  磨菇罐頭湯加菠菜碎及少少水煮滾, 備用.
4.  焗盤放上白飯, 淋上菠菜磨菇湯, 再放上海鮮, 最後放上芝士碎.
5.  焗爐180度預熱, 將焗盤放入焗爐, 焗至芝士金黃, 即成.光波蒜茸扇貝
材料:  扇貝, 蒜茸, 鹽

1.  扇貝洗淨, 放上蒜茸及漏少少鹽.
2.  扇貝放入光波爐, 235度光10分鐘, 即成.

芝士菠菜三文魚飯

自從豐豐食大人野之後, 已經好耐無特別整飯俾佢食啦, 有朋友介紹坑口東港城有間有機舖有野生三文魚柳賣, 有日經過買左pack, 一pack 5舊三文魚柳, 無骨, 68蚊, 用佢黎整左哩個飯俾豐豐, 佢ko晒呀.

紅螺頭淮杞雞腳豬尾骨湯, 豆醬豆腐蒸黃花魚, 光波蜜糖芥末烤豬扒

終於試左蜜糖芥末豬扒, 果然係唔錯, 用光波爐整豬扒好正, 火喉岩岩好, 又唔會彈油, 又唔鞋.  我懶, 如果開爐煮個汁再淋上豬扒面應該仲好味.

紅螺頭淮杞雞腳豬尾骨湯
材料:  紅螺頭乾, 淮山, 杞子, 蜜棗, 雞腳, 豬尾骨, 紅蘿蔔, 粟米, 薑片

做法:
1.  紅螺頭浸軟; 雞腳及豬尾骨出水; 淮山浸水半小時, 紅蘿蔔刨皮切件; 粟米切件; 其他洗淨.
2.  將所有材料落水, 大火煲30分鐘, 再轉慢火煲1.5小時, 落鹽調味, 即成.

豆醬豆腐蒸黃花魚
材料: 豆腐, 黃花魚, 薑片, 豆醬, 蔥粒, 滾油, 蒸魚豉油

做法:
1.  黃花魚洗淨印乾, 將薑片放入魚肚內.
2.  豆腐切件, 連魚一齊放上碟, 鋪上豆醬.
3.  水滾後蒸10分鐘, 倒去蒸魚水, 加上蔥粒, 淋上滾油及蒸魚豉油, 即成.

小貼士:
1.  沒有蒸魚豉油, 可用生抽加糖拌勻而成.
2.  蒸魚時間視乎魚的大小而定.

光波蜜糖芥末烤豬扒 (食譜參考自大蚊廚房)
材料:  豬扒

醃料: 生抽, 老抽, 糖, 蛋白, 生粉, 酒

汁料:  蜜糖, 黃芥末醬, 奶, 糖, 鹽少許

做法:
1.  豬扒用刀背拍鬆, 用醃料醃半小時; 汁料拌勻備用.
2.  光波爐底放上錫紙, 再放低架, 205度預熱.
3.  放上豬扒光10分鐘, 反轉塗上汁料, 再光9分鐘, 即成.

海鮮醬蒜茸蒸黃立倉

上星期日帶豐豐出去玩, 途經一個泊左好多船嘅海邊, 見到有個漁家賣魚, 我地又貪得意買左條游水黃立倉, 劏好晒承為25蚊, 本來打算返屋企用蒜頭豆豉蒸, 點知返到去先發現原來無晒豆豉, 又無蔥喎, 靈機一觸以前用過海鮮醬黎蒸魚, 今次都照板煮碗先, 蒸左出黎個味好夾呀.

海鮮醬蒜茸蒸黃立倉
材料: 黃立倉, 蒜茸, 海鮮醬, 蒸魚豉油, 滾油, 薑片

做法:
1.  魚劏好洗淨抹乾, 將薑片塞入魚肚, 魚面塗上海鮮醬, 再放蒜茸.
2.  水滾放上魚蒸10分鐘.
3.  倒去蒸魚水, 淋上蒸魚豉油及滾油, 即成.

小貼士:
1.  蒸魚時間視乎魚的大小而定.
2.  沒有蒸魚豉油可用生抽加少少糖拌勻而成.

光波孜然雞軟骨

買左pack雞軟骨好耐, 係時候要食左去, 尋日是是旦旦落左啲調味料再光波, 好味呀, 送啤酒最岩.

光波孜然雞軟骨
材料: 雞軟骨

醃料: 雞粉, 孜然粉, 胡椒粉, 花椒粉, 糖, 酒

做法:
1.  雞軟骨用檸檬汁醃10分鐘, 再清洗, 以去雪味.
2.  用醃料醃數小時.
3.  高架加有孔盤塗上少許油, 放上雞軟骨, 260度光8分鐘, 反轉再光至香脆, 即成.

燉洋蔥汁

豐豐哩幾日又咳又有鼻水, 尋日仲咳到嘔, 醒起之前聽講燉洋蔥汁可止咳, 岩岩屋企仲有半個洋蔥, 一試無防, 飲左一次又好似真係好啲, 咳少左, 夜晚瞓覺都無乜咳, 哩幾日燉多幾次先, 燉出黎嘅洋蔥汁都幾清甜架.  洋蔥可以殺菌, 好有益, 豐豐BB時食嘅粥仔經常加入洋蔥, 聽朋友講, 西醫都話病時可以食多啲洋蔥, 好有幫助.

燉洋蔥汁
材料: 洋蔥1個

做法:
1.  洋蔥去皮切片, 放在碗內, 碗內不用加水, 隔水燉30分鐘就有少量洋蔥汁, 即成.

小貼士:
1.  燉出來的洋蔥汁只有少量.
2.  成人可連洋蔥一起食, 效果更好.

13年3月北海道之行 - Day 5 札幌

Day 5: 札幌
話咁快就要返香港啦, 去機場前趕去一轉二条市場間近藤昇商店食番多次刺身飯.

搭飛機返到去東京, 喺成田機場食左餐吉列豬扒, 好好味.  之後我地喺機場散盡所有yen, 買晒手信, 我地總共唱左100000 yen, 最後用剩5 yen, yeah!

北海道之行就此完結.

13年3月北海道之行 - Day 4 札幌

Day 4: 札幌 (圓山公園, 北海道神宮 - 圓山動物園 - JR Tower T38展望室)哩日去遠少少去左圓山公園站嗰邊, 其實都唔係遠, 幾個subway站, hehe.  去到圓山公園站, 見到一班小朋友, 個個著住夾那衣, 好可愛呀.  圓山公園站行出黎好似無咩好食, 求其入左KFC食早餐.

圓山公園就喺附近, 入到去真係要嘩一聲, 好靚呀, 成張post card咁, 根據資料入面種左1500棵櫻花樹, 我相信如果所有櫻花樹一齊開花, 一定靚到爆呀, 真係好想好想睇到哩個情景呀.

行行下行左去北海道神宮, 入面好寧靜好舒服, 我去日本都好鐘意參觀啲神舍, 感覺好平靜.

見有時間, 我地去埋圓山動物園, 以為好近啦, 原來都要行一陣架.  圓山動物園真係一個真正嘅動物園, 講得出嘅動物都有, 獅子, 老虎, 北極熊, 企鵝, 猴子, 猩猩, 弧狸, 斑馬, 長頸鹿, 兔仔, 袋鼠, 羊, 駝鳥, 河馬.....真係好勁呀, 不過好可惜, 可能天氣太凍啦, 大部份動物都縮埋瞓覺, 相信夏天去會開心好多.

去完動物園都差唔多3,4點, 喺圓山公園站附近個shopping mall入面一間餐廳食野休息下.

原本食完野想去藻岩山睇夜景, 不過搵唔到條纜車線, 諗諗下睇夜景可以返去JR Tower, 佢有個T38展望室一樣可以360度睇晒札幌嘅夜景, 果然真係值得一去, 好靚.

睇完夜景, 又未肚餓, 我地就行路返去hotel附近, 今次揀左另一間好local嘅居酒屋食串燒, 其實哩個燒鳥本舖正正喺hotel對面, 我地經過好幾次, 估唔到喺札幌最後一晚會去幫襯.  佢個menu又係全日文, 唯有都係亂叫啦, 其中一個串燒, 食落去肥肥地, 望真啲原來係雞pat pat黎架, haha.  原本間居酒屋無其他客人架, 過左一陣, 有個日本男人入左黎, 佢同個waiter知我地由香港黎好似好有興趣, 但佢地英文又唔好, 我地日文又唔得, 用幾個單字英文溝通, 好搞笑, 後來佢仲請我地飲野添呀!  日本人真係好友善.