紅螺頭無花果湯

2012好快成為歷史, 希望唔開心嘅事永遠過去, 好事接種而黎, 最緊要身體健康, 事事順利!

30號同班朋友開PARTY, 一早用真空煲煲落湯, 玩完返黎夜晚有得飲, 哩款湯好甜好好味!

紅螺頭無花果湯

材料: 紅螺頭, 豬展骨, 紅蘿蔔, 無花果, 淮山, 元貝

做法:
1.  豬展骨出水; 淮山用水浸半小時; 紅螺頭浸軟; 紅蘿蔔刨皮切大件.
2.  所有材料大火煲半小時, 放入真空煲, 飲前再大火煲滾, 加鹽調味, 即成.

蜆肉南瓜湯

之前買左個南瓜一直都未食, 尋日用左成個黎煲湯, 一大個南瓜煲到溶晒, 加埋蜆肉, 好鮮甜呀!

蜆肉南瓜湯
材料: 南瓜, 蜆, 雞湯

做法:
1.  蜆先煲至剛開口, 盛起拆肉備用.
2.  南瓜去皮去芯, 切細粒.
3.  先將南瓜加水煲至完全溶解, 加入蜆肉及雞湯, 滾後即成.

蟲草花蘋果湯

自從之前有人教我煲湯落蘋果, 我而家都鐘意, 哩個天氣可以潤下, 代替紅蘿蔔都唔錯.

蟲草花蘋果湯
材料: 蟲草花, 蘋果, 雞, 豬展, 淮山, 魚唇, 無花果乾, 薑片

做法:
1.  雞去皮出水; 豬展出水; 淮山用水浸半小時去硫磺; 蘋果去皮去芯; 蟲草花及魚唇略浸; 其他材料洗淨.
2.  水滾後加入所有材料, 大火煲30分鐘, 轉慢火再煲1.5小時, 落鹽調味, 即成.

飛天禽蟧川貝蘋果湯

轉天氣, 豐豐病完到老公病.  上星期經過百佳見有個湯包幾好, 係飛天禽蟧川貝湯包, 個阿姐煲左一大煲俾人試飲, 好好味呀, 阿姐見豐豐試飲好鐘意, 俾左幾杯仔佢飲.  星期日我都煲左俾老公飲, 加埋蘋果, 聽講可以潤肺, 降燥熱, 化痰止咳, 好岩而家哩個天氣飲.  飛天禽蟧唔係動物, 係一種植物黎架, 唔洗怕, hehe.
飛天禽蟧川貝蘋果湯

材料: 飛天禽蟧, 川貝, 蘋果, 淮山, 無花果乾, 南北杏, 豬展

做法:
1.  豬展出水; 蘋果去芯; 淮山用水浸1小時, 其間換水數次.
2.  將所有材料放落水大火煲30分鐘, 轉慢火再煲1小時, 落鹽調味, 即成.

豐豐上學去 - PN

我個仔大個仔啦, 要返學啦.  我突登請左幾日假陪佢, so far都好乖, 陪左佢4日上堂, 見佢喺學校都好開心, 仲會跟老師一齊跳舞同跟口水尾唱歌, 尋日第一日冇家長陪, 佢都冇喊, 真係叻仔!!  返左幾日學, 唔知係咪正如老師講生活有所改變, 豐豐好痴我, 成日要我抱, 夜晚又發開口夢, 有時又叫媽咪媽咪, 好似瞓得唔係好好咁, 不過問佢返學開唔開心, 佢話開心, 希望佢快啲適應返學嘅生活啦.

豐豐兩歲了

豐豐兩歲啦!!!  今年冇搞生日會, 我地選擇左帶豐豐去佢未去過嘅迪士尼樂園及酒店玩兩日一夜兼食左tea buffet.  豐豐見到mickey同其他卡通人物, 超開心超興奮, 仲周圍去攬住佢地影相, 帶佢去睇米奇show, 佢坐定定睇足全場, 仲一路睇一路拍手, 見到佢玩得咁開心, 我都好開心呀!  一到兩歲, 豐豐好似即刻古惑左, 想mama抱時就會話baba抱會following, mama抱唔會following, 又會話baba攰, mama唔攰, 到想baba抱, 就話baba高, mama唔高.  而家仲會賣口乖, 見我著條裙, 會講mama靚靚, 真係氹死人.  不過有野衰野, 就係邊個話佢唔岩, 佢就話唔要邊個, 成日話唔要mama, 唔要baba.  好快豐豐就返學啦, 踏入一個新嘅階段, 希望佢好鐘意返學啦!

玻璃曲奇

之前見朋友整過玻璃曲奇, 覺得好靚, 不過一直以為好睇唔好食, 星期日有時間, 屋企又岩岩有材料就動手整下啦, 原來都好好味架, 豐豐都話味味呀



玻璃曲奇 (食譜參考自yen幸福廚房)

材料: 牛油100g, 糖粉60g, 雞蛋40g (約一隻蛋少啲), 低筋粉200g, 泡打粉2g, 鹽2g, Fox's果汁糖

做法:
1.  蛋放室溫; 牛油一樣放室溫至軟.
2.  牛油加糖粉及鹽拌勻, 續少加入蛋至完全混合.
3.  (2)篩入低筋粉及泡打粉, 快手拌勻成粉團, 用保鮮紙包好放入冰格雪30分鐘左右.
4.  焗爐160度預熱.  粉團取出略為放軟, 輾平至所需曲奇厚度, 用曲奇模印出曲奇及中間通空.
5.  曲奇放上已鋪牛油紙的焗盤上, 通空位置放上半粒果汁糖, 放入焗爐160度焗約20分鐘或至金黃.
6.  焗盤取出待微涼後將曲奇放在鐵架上至完全涼透.  即成.

小貼士:
1.  蛋及牛油必須先放室溫.
2.  用糖粉代替沙糖, 曲奇會更鬆化.
3.  粉團可預先預備好, 焗前從冰箱取出略為解凍.

光波香茅雞翼

又係光波time, 我最鐘意用光波爐光雞翼, 今次整香茅雞翼, 好yummy!

香茅雞翼

材料: 雞翼

醃料: 生抽, 老抽, 糖, 胡椒粉, 蒜茸, 麻油, 蜜糖少許, 香茅粉

做法:
1.  雞翼用檸檬汁醃片刻, 以去雪味, 洗淨抹乾.
2.  雞翼用醃料醃數小時.
3.  光波爐260度預熱2分鐘, 雞翼放上高架, 低向上, 光10分鐘, 反轉再光8分鐘.  即成.

自家製雜莓果醬

雜莓果醬
<食譜參考自SHIRLEY@原味生活>

材料: 雜莓 (士多啤梨, 藍莓, 紅桑子) 300g, 糖 110g, 檸檬 1/3個

做法:
1. 雜莓洗淨切細粒, 加糖拌勻, 放入雪櫃雪數小時或過夜.
2. 將檸檬汁加入(1), 細火不停慢慢攪拌, 至變成漿, 熄火, 待涼後放入樽內, 放入雪櫃保存.

小貼士:
1. 糖的份量約為雜莓重量的1/3, 可待滾起後試味再加以調整.
2. 注意果醬雪凍後會更杰.
3. 建議用易潔煲, 比較易清洗.
4. 用一個較深的煲, 以免滾瀉.
5. 一般可於雪櫃保存 2星期.

22個月了

22個月啦!  哩一兩個月, 豐豐進步左好多, 識講好多野, 而且唔只局限疊字, 識講BABA搭飛機, 豐豐坐車車.  已經識自己由1數到10, 識大部份A-Z,  有啲英文生字都認得, 例如: clap, yes, wave, ear, eye等等.  屋企人大部份都已經識叫啦, 有時連街或lift入面唔識嘅叔叔EE哥哥都會叫人, 不過當然係心情好嘅時候先咁好口啦.  哩個幾月, 豐豐突然鐘意左bear bear, 佢霸左一隻bear bear當係寶貝, 去到邊都要帶住佢, 半夜扎醒要搵bear bear, 睇電視食飯又要同bear bear一齊坐.  佢而家有句口頭彈, 就係"唔要", 咩都話唔要, 衰豬.

光波蒙古吉列羊

想整左羊架好耐啦, 但因為老公唔食羊, 一直冇機會整, 趁老公去左business trip, 於是光波黎同屋企人分享.  百佳阿姐推介哩隻蒙古吉列羊, 話多啲肉, 冇咁酥, 真係好正呀, 啖啖肉, 早知買多幾件啦.

光波蒙古吉列羊

材料: 吉列羊或羊扒或羊架

醃料: 孜然粉, 雞粉, 生抽, 糖, 胡椒粉, 蒜粉, ROSEMARY香草, 黑胡椒

做法:
1.  羊用醃料醃數小時.
2.  光波爐260度預熱2分鐘, 低架光10分鐘, 反轉再光8分鐘, 即成.

迷你蝴蝶酥

之前買左一包酥皮, 就過期啦, 又諗唔到整咩, 星期日下晝阿仔瞓左, 見得閒拎塊酥皮出黎試整蝴蝶酥, 好簡單就搞掂啦.

迷你蝴蝶酥

材料: 片裝酥皮, 糖, 水(少少)

做法:
1.  酥皮解凍數分鐘至軟身; 焗爐220度預熱.
2.  灑上糖及少少水, 將兩邊輕力卷至中間, 期間一邊卷一邊灑糖及少少水, 卷好後切片, 放上已鋪錫紙的焗盤上.
3.  放入焗爐焗約15分鐘, 期間可將蝴蝶酥反轉.  出爐後放上鐵架待涼, 即成.

小貼士:
1. 記得只灑好少水, 因為水太多, 酥皮會太黏.

彩繪蛋糕卷之鬆弛熊朱古力卷

一直都想學整卷蛋, 因為覺得卷蛋平時比較多機會食, 不過睇過書上網search人地啲食譜, 都唔係好sure究竟個技巧係點, 終於發現團購有Clubcake Kitchen嘅course, 百幾蚊即報名.  學左真係明白好多, 而家準備買定材料同工具自己再整先

10號韋森特襲港

尋晚掛10號風球呀, 真係好勁.  老公去左歐洲business trip, 得番我同豐豐喺屋企, 下晝4點幾提早放工, 返去媽咪度食埋飯就揹住豐豐返屋企, 當時已經係8號啦, 行左未夠3分鐘, 把遮已經吹爛左, 好彩冇咩雨咋, 於是急步行, 豐豐又重, 真係超狼狽.  夜晚喺屋企都感受到出面好大風, 抽氣扇吹到呼呼聲, 好似想飛出黎咁, 又勁大風大雨, 好驚會吹爛啲窗, 搞到我成晚瞓得好差, 今朝起身見窗台有啲入水, 好彩唔算好多, 哩個韋森特真係唔野少呀, 初時仲以為會打唔成, 點知上到10號.

肉醬千層麵, 罐頭忌廉湯, 光波麻辣雞翼

終於試整左千層麵啦, 百德阿姨哩隻幾好, 唔洗pre cook, 好方便, 我地好少食千層麵架, 因為街食嘅千層麵多數係牛肉, 而我老公係唔食既.  除左千層麵, 我開左罐忌廉湯, 今次第一次加左西蘭花同洋蔥一齊煲, 估唔到好好味喎.  仲光波左麻辣雞翼, 好正呀, 我用左麻辣火窩啲醬黎醃咋, 如果有更好味的麻辣醬就仲perfect.

  麻辣雞翼
材料: 雞翼

醃料: 麻辣醬, 雞粉, 生抽少許, 老抽少許, 糖, 胡椒粉, 米酒少許, 生粉, 麻油, 香草, 五香粉

做法:
1.  雞翼用檸檬汁醃5分鐘, 然後洗淨抹乾水, 用醃料醃數小時或過夜.
2.  光波爐260度預熱兩分鐘, 放上雞翼 (面向下), 光8分鐘, 反轉再光6分鐘.  即成.

小貼士:
1.  檸檬汁可去雪味.
2.  光波時間視乎雞翼大小而有所改變
肉醬千層麵
材料: 千層麵(no pre cook), 肉碎, 洋蔥, 鮮茄濃湯一罐, 芝士碎, 蕃茜碎

做法:
1.  肉碎用基本醃料醃一會.
2.  炒香洋蔥, 加肉碎炒至半熟, 加入罐頭湯及少許水煮滾, 盛起備用.
3.  焗盤先塗油, 加入一層肉醬及芝士碎, 放上一塊千層麵, 如此類推, 最後一層是肉醬, 放上芝士碎及灑上蕃茜碎.
4.  焗爐180度預熱, 放入千層麵焗25分鐘.  即成.

小貼士:
1.  焗盤要用高身盤, 我用左長形蛋糕模.

第一次搭船去長洲@20個月

7.1我地冇去遊行, 選擇左去長洲一日遊.  假期嘅長洲好多人, 我同老公都好多年冇入長洲啦, 同以前唔同左, 多左好多舖頭同餐廳.  打風過後天氣非常好, 藍天白雲, 又曬又熱.  豐豐第一次搭船, 去程我地搭左快船, 好大浪, 豐豐話驚驚, 扭計要走, 好彩快船真係好快.  哩日過得好開心, 豐豐都玩到好攰, 尋晚自己喺床仔一覺瞓天光, 希望以後可以帶豐豐去多啲地方玩啦.

光波豬柳芝士漢堡

一連3日假期, 原本以為會打風破壞左, 點知個風黎得快又走得快, 星期六一起身已經除晒所有風球, 哩3日仲要好好天, 好曬又好熱.  尋日一早起身, 喺屋企整左個簡單早餐 - 豬柳芝士漢堡加朱古力奶, 好好味, 老公話好食過M記添

老公生日飯@尚膳

補番post老公餐生日飯先.  因為正日要做節, 所以前一日同佢出去食飯預祝生日, 近近地揀左我地公司附近食, 哩間尚膳我同同事平時間中都會去食lunch, 最欣賞佢地嘅胡椒豬肚湯, 夠晒辣.  我地叫左個二人餐, 加多碟鵝肉腩肉雙拼, 好飽.

尚膳潮州小廚
地址: 太古城智星閣地下G1016-17號
Tel: 2886 2100

光波燒味雙拼 - 叉燒, 燒肉

端午節做節又到我個光波爐出場啦, 第一次整叉燒同燒肉, 好簡單呀.

叉燒
材料: 梅頭豬肉

醃料: 叉燒醬, 糖, 少少老抽, 玫瑰露酒

做法:
1.  豬肉洗淨後印乾水, 用醃料醃數小時或過夜.
2.  光波爐260度預熱3分鐘, 先將一面光8分鐘, 塗上蜜糖再光2分鐘.  反轉另一面光8分鐘, 塗上蜜糖再光2分鐘.
3.  待稍涼後切件即成.

燒肉
材料: 五花腩

醃料:
肉- 五香粉, 雞粉, 蒜茸, 少許生抽, 糖
皮- 1/4匙梳打粉, 鹽

做法:
1.  五花腩用竹簽好似井字咁插住, 插較低位置, 防止卷起.
2.  放入滾水烚20分鐘, 皮向上.
3.  盛起沖凍水至完全涼透.
4.  用豬插狂插豬皮, 不要插穿豬皮.
5.  用醃料分別醃豬皮及肉, 醃2小時.
6.  洗或刮去豬皮的醃料 (不用洗肉醃料).
7.  光波爐先230度預熱3分鐘, 豬皮向下光20分鐘, 再轉260度反轉光豬皮.
8. 稍涼後切件.  即成.

一號風球下的彩虹

打風唔成, 尋日轉返一號風球, 臨放工時好多朋友喺facebook post左張彩虹相, 於是一夠鐘我拿拿臨放工, 真係俾我喺lift口見到彩虹, 好耐冇見過彩虹啦, 即時令全日沉悶嘅生活添上一點點色彩

去濕茶

繼上次煲竹庶茅根後, 今次煲去濕茶, 唔太甜岩岩好, 放入雪櫃當水飲, 正.

光波豬手, 孜然雞翼, 麻辣三文魚頭

光波爐真係好好用, 好方便呀, 極力推介.  星期六叫左屋企人上黎試光波餸, 整左豬手, 孜然雞翼同麻辣三文魚頭.  光雞翼真係好正, 唔洗落油, 又快又唔怕彈油, 仲光得好靚添噃, 老豆同老公都讚好味呀, 咁岩係父親節前夕, 哩餐就當係孝敬老豆啦, 正日就出左街打邊爐慶祝啦.

光波雞翼 - 蜜糖燒雞翼

我好鐘意食燒臘檔啲橙色燒雞翼架, 見好多光波友成日光雞翼, 我都要光下, 老公讚好味過燒臘檔嗰啲呀

蜜糖燒雞翼 (光波版)
材料: 雞全翼

醃料: 雞粉, 生抽, 老抽, 胡椒粉, 糖, 叉燒醬

做法:
1. 雞翼先落檸檬汁拌勻約5分鐘, 再沖洗抹乾.
2. 用醃料醃1小時.
3. 光波爐260度預熱3分鐘, 將雞翼一面塗上叉燒醬, 光約13分鐘, 之後反轉塗上叉燒醬再光13分鐘.
4. 其中一面塗上蜜糖, 再光2-3分鐘, 反轉同樣塗上蜜糖, 光2-3分鐘.  即成.

小貼士:
1. 檸檬汁可去雪味.
2. 中途可將雞翼尖包上錫紙以防過燶.

竹庶茅根

Weekend除左光波之外, 仲煲左竹庶茅根, 好易煲, 夏天煲多啲放入雪櫃, 好過飲其他飲品.  媽咪話唔好落馬蹄, 因為好寒涼, 唔岩豐豐飲.

竹庶茅根
材料: 竹庶茅根, 甘筍, 粟米, 糖冬瓜

做法:
1.  竹庶破開兩邊; 甘筍刨皮切件; 栗米切段.
2.  所有材料加入水, 煲約1.5小時.  即成.

我的光波爐第一回 - 粟米, 蒜茸包, 燒春雞

記得幾年前有次行街見有人示範用光波爐燒雞, 覺得好正, 不過當時賣成3千幾, 當然冇買啦, 近期見平左好多, 一直都好想買, 上星期五終於到手啦, 好開心呀!  weekend兩日都不停光, 光左粟米, 蒜茸包同埋燒春雞 hohoho.  用光波爐燒雞最大好處係容易清洗, 以前用焗爐啲油彈到周圍都係, 抹餐死.

麻辣孖寶

真係犯賤啦, 明明熱氣到牙肉都腫左, 但係仲要繼續食辣野 hohoho, 屋企樓下商場一間細舖仔, 佢啲麻辣青瓜同麻辣豬耳真係好好味, 牙肉痛都要繼續食, 最多之後勁飲涼茶啦

蕃茄濃湯通粉

而家啲蚊真係好搶狂, 同埋好毒囉, 豐豐哩排成日俾蚊針到腫起一舊舊, 好耐都唔散, 好可憐, 冇用防蚊帶就針佢對腳, 好啦, 用左防蚊帶就針佢塊面同頸, 真係好衰囉, 而家要衫領貼防蚊貼, 腳戴防蚊帶先可以出街

尋日煲左一煲仔蕃茄薯仔紅蘿蔔雞肉湯, 煲到好濃用黎煮通粉, 連鹽都可以唔洗落, 豐豐食清光, 仲連湯都飲到一滴不剩, 真係好LIKE喎

第一句謝謝

教左豐豐好耐講謝謝, 一直都唔成功, 佢都只係用手勢做出謝謝嘅意思, 星期日喺屋企玩緊嘅時候, 我照例同佢講話謝謝啦, 點知佢真係開聲講, 仲講得好準, 我真係好開心呀, 嗰一刻覺得好感動, 哩幾日佢識講多左野, 好肯跟我地講, 佢仲嘗試跟我地數1-10添, 加油呀豐豐!

P.S, 我嘅好朋友雲妮喺5月20號生左BB啦, 好開心呀, 希望B女健健康康, 聽教聽玩啦!

媽媽節2012

今天係第二年同豐豐一齊過母親節啦

做左媽咪之後, 真係深深體會媽咪真係好錫我地, 好似我好錫豐豐, 好愛佢一樣.

媽咪, 多謝你咁錫我地, 多謝你同樣好錫豐豐, 希望你每一日都過得開心, I love u!  期待豐豐都好快同我講一句: mami, I love u!

雞蛋牛肉飯, 茄汁牛肉飯

上星期五好開心同16個朋友一齊食飯, 好熱鬧, 哩班朋友喺親子王國認識, 估唔到大部分而家變左好朋友, 每次同佢地gathering都好開心, 大家知道大家嘅background, 有差唔多嘅經歷, 咩都可以傾一餐, 所以好投契呀, 好期待下一次嘅聚會呀

尋日買左一pack免治牛肉, 整左兩餐唔同嘅牛肉飯俾豐豐食, 一餐雞蛋牛肉飯, 一餐茄汁牛肉飯, 好好味, 啲免治牛肉好滑呀, 豐豐食唔晒最後我包尾