麻辣孖寶

真係犯賤啦, 明明熱氣到牙肉都腫左, 但係仲要繼續食辣野 hohoho, 屋企樓下商場一間細舖仔, 佢啲麻辣青瓜同麻辣豬耳真係好好味, 牙肉痛都要繼續食, 最多之後勁飲涼茶啦

蕃茄濃湯通粉

而家啲蚊真係好搶狂, 同埋好毒囉, 豐豐哩排成日俾蚊針到腫起一舊舊, 好耐都唔散, 好可憐, 冇用防蚊帶就針佢對腳, 好啦, 用左防蚊帶就針佢塊面同頸, 真係好衰囉, 而家要衫領貼防蚊貼, 腳戴防蚊帶先可以出街

尋日煲左一煲仔蕃茄薯仔紅蘿蔔雞肉湯, 煲到好濃用黎煮通粉, 連鹽都可以唔洗落, 豐豐食清光, 仲連湯都飲到一滴不剩, 真係好LIKE喎

第一句謝謝

教左豐豐好耐講謝謝, 一直都唔成功, 佢都只係用手勢做出謝謝嘅意思, 星期日喺屋企玩緊嘅時候, 我照例同佢講話謝謝啦, 點知佢真係開聲講, 仲講得好準, 我真係好開心呀, 嗰一刻覺得好感動, 哩幾日佢識講多左野, 好肯跟我地講, 佢仲嘗試跟我地數1-10添, 加油呀豐豐!

P.S, 我嘅好朋友雲妮喺5月20號生左BB啦, 好開心呀, 希望B女健健康康, 聽教聽玩啦!

媽媽節2012

今天係第二年同豐豐一齊過母親節啦

做左媽咪之後, 真係深深體會媽咪真係好錫我地, 好似我好錫豐豐, 好愛佢一樣.

媽咪, 多謝你咁錫我地, 多謝你同樣好錫豐豐, 希望你每一日都過得開心, I love u!  期待豐豐都好快同我講一句: mami, I love u!

雞蛋牛肉飯, 茄汁牛肉飯

上星期五好開心同16個朋友一齊食飯, 好熱鬧, 哩班朋友喺親子王國認識, 估唔到大部分而家變左好朋友, 每次同佢地gathering都好開心, 大家知道大家嘅background, 有差唔多嘅經歷, 咩都可以傾一餐, 所以好投契呀, 好期待下一次嘅聚會呀

尋日買左一pack免治牛肉, 整左兩餐唔同嘅牛肉飯俾豐豐食, 一餐雞蛋牛肉飯, 一餐茄汁牛肉飯, 好好味, 啲免治牛肉好滑呀, 豐豐食唔晒最後我包尾

豐豐歲半了

好耐冇UPDATE BB日誌啦.  我個BB豐豐不經不覺已經歲半, 而家已經唔再係BB, 係個小朋友啦, 好想佢快高長大, 但係又唔想佢咁快大, 好矛盾.

歲半時去健康院重12.3kg, 92.5cm高.  除左講野仲係唔叻之外, 其他野都學得好快, 顏色啦, 形狀啦, 數字都差唔多識晒, 已經識自己用匙食飯, 開始用杯飲水.  湊豐豐真係少啲心機都唔得呀, 佢要你全天侯陪佢玩, 唔俾你睇書睇報紙, 唔准你用iphone, 唔准你對眼望電視.  哩幾個月豐豐幾乎晚晚半夜扎聲都要過黎同我地瞓, 不單止係迫, 佢仲會出無影拳, 飛毛腿, 床頭瞓到床尾, 360度轉.

而家個個星期都會上playgroup, 老師啲指令都可以跟到, 最鐘意幫手搬櫈同收碗仔,  不過仲係比較怕羞, 如果喺屋企同佢唱playgroup唱嘅歌, 佢會跳舞, 但係一返playgroup就唔會跟, 眼定定望住人.  

之前我一直好擔心豐豐好似唔鐘意睇書, 不過經過我多番努力, 買左好多唔同類型嘅書俾佢, 引起佢嘅興趣, 佢終於養成鐘意睇書啦, 而家日日都會主動拎啲書出黎叫我地陪佢睇, 好開心呀!

希望豐豐越黎越進步啦.

椰汁紫米露

五一勞動節喺屋企勞動, 天氣太熱, 差唔多全日喺屋企歎冷氣, 順便執下啲冬天衫收埋, 下晝有啲時間, 諗起買左包紫米好耐, 於是整左椰汁紫米露.

椰汁紫米露
材料: 椰漿, 紫米, 水, 冰糖/片糖

做法:
1. 紫米洗淨用水浸約1小時.
2. 將紫米連同約7-8碗水大火煲滾, 轉慢火煲約30分鐘, 給蓋焗約45分鐘
3. 開火再煲滾, 加糖調味, 食時加入椰漿.  即成.