豐豐領洗 @ 6個月

尋日2011年4月24日, 復活節, 喺豐豐領洗嘅大日子, 豐豐係喺我地結婚行禮嘅聖安德肋堂領洗, 仲係同一樣係盧伯榮神父主禮添, 契媽係豐豐嘅代母, 有好多人黎觀禮呀, 好開心, 有 61個 BB領洗呀, 神父話係有史以黎最多 BB領洗嘅一次, 最特別係 P同學個 BB都係一齊領洗呀.

西蘭花三文魚粥

食左 3日雞肉, 試三文魚啦, 煲緊西蘭花三文魚粥仔嘅時候已經好香啦, 豐豐好快食晒一大碗, 呵呵!

節瓜雞肉粥

婆婆話節瓜正氣呀, 食多 D都唔怕, 哈, 就整番個節瓜雞肉粥俾豐豐試下啦.

節瓜肉碎粥

尋日帶豐豐去健康院打針, 之前已經知 6個月要打 3支針, 好擔心豐豐會喊到飛起, 好肉赤嘛, 點知豐豐好叻仔, 只係哇左幾秒, 出番去已經冇再喊啦, 連姑娘都贊佢叻仔呀, 豐豐而家重 8.87kg.  尋日喺健康院好多人走埋黎話豐豐好得意呀!  姑娘話豐豐進展良好, 一日食 3餐奶兩餐粥好好, 可以繼續呀!

過左個星期六日, 我煲左節瓜肉碎粥俾豐豐食, 好味架!

給一位朋友的信

給一位朋友的信:

近排見你喺FB留言, 令到我好擔心你呀, 見到你寫低你爸爸離開時嘅經過, 我個心都好痛, 好替你難過, 唔知講咩去安慰你, 不過希望你要堅強, 我相信你爸爸會因為有你哩個孝順女而自豪, 你哩幾年為佢做嘅事佢一定知道架, 佢去到天堂會保佑你地, 雖然佢而家離開左, 不過佢時時刻刻都喺你心入面, 陪你面對將來嘅一切, 你唔係一個人架, 你仲有媽媽, 細佬同埋我地一班朋友架, 你要加油呀!

自家製藥饍蒸雞, 陳皮蒸黃花魚, 冬瓜粟米螺頭湯

星期五晚同幾個舊同事食飯, 吹水吹得好開心, 北京樓 D野又好味, so good!!  返到屋企, 豐豐已經瞓左覺啦, 話時話, 豐豐出左世之後, 我好似係第一次夜返咋.

星期日天氣超好呀, 有太陽, 又有少少微風, 咁好天梗係要帶豐豐出去行下公園啦, 不過更係太耐冇行咁多路, 返到屋企好攰呀, 豐豐就爽啦, 有車仔坐.

週末食譜: 自家製藥饍蒸雞, 陳皮蒸黃花魚, 冬瓜粟米螺頭湯

自家製藥饍蒸雞

材料: 雞件, 紅棗, 當歸片, 黨蔘, 杞子, 薑絲

做法:
1. 雞件用胡椒粉及雞粉拌勻, 加入剩餘材料, 醃數小時.
2. 大火隔水蒸 30分鐘至全熟.  即成.

陳皮蒸黃花魚

材料: 黃花魚, 陳皮, 蔥粒

做法:
1. 陳皮用水浸軟, 刮去囊, 切絲.
2. 黃花魚洗淨抹乾, 加上陳皮絲及蔥粒, 大火隔水蒸 10分鐘, 倒去魚水.
3. 生抽及糖加熟油, 倒在黃花魚上.  即成.

冬瓜粟米螺頭湯

材料: 冬瓜, 粟米 1條, 螺頭, 豬展, 薑片

做法:
1. 螺頭去腸出水, 豬展出水, 冬瓜去囊, 連皮切大件.
2. 除冬瓜外, 其他材料煲滾後轉慢火煲 1小時.
3. 加入冬瓜, 再煲 1.5小時, 加鹽調味.  即成.

豉汁蒜茸蒸排骨, 鮮人蔘鹿茸燉雞湯

上星期五我同 honey 一齊唔洗返工, 放低豐豐俾婆婆, 我地一早去左街去到夜晚先返, 好攰呀, 平日唔洗返工去行街真係好爽呀, 嗰日天氣仲要好好添喎.

Honey 今日返新工啦, 希望佢事事順利啦!

週末食譜: 豉汁蒜茸蒸排骨, 鮮人蔘鹿茸燉雞湯

豉汁蒜茸蒸排骨

材料: 排骨粒, 豆豉, 蒜茸, 辣椒粒

醃料: 生抽, 老抽, 糖, 胡椒粉, 生粉, 油

做法:
1. 豆豉切碎. 
2. 排骨加入醃料, 豆豉, 蒜茸, 辣椒粒, 醃數小時.
3. 蒸前加入少少水拌勻.  大火隔水蒸約 10分鐘.  即成.

鮮人蔘鹿茸燉雞湯

材料: 鮮人蔘, 鹿茸片, 紅棗, 圓肉, 杞子, 薑片, 雞

做法:
1. 雞出水, 鮮人蔘切片.
2. 所有材料放入電子燉盎, 加入滾水, 燉 3小時, 落鹽調味.  即成.

紅蘿蔔米糊

紅蘿蔔米糊豐豐喺婆婆度已經食過好多次啦, 媽咪今日第一次整, 豐豐一樣食清光, good boy!!

紅蘿蔔米糊

材料: 紅蘿蔔一小件, 米粉, 奶

做法:
1. 紅蘿蔔刨皮, 切細粒, 加少少滾水, 隔水蒸至林, 壓成茸.
2. 米粉用奶開成奶糊, 加入紅蘿蔔茸.  即成.