恭喜 G小姐生左個 BB仔呀, 一女一仔, 一個好字, 希望 BB快高長大, 身體健康!!
成日都有人叫我快啲生多個女, 最衰唔可以揀, 如果一定係女, 我都會生, hehe, 不過我驚我買靚衫俾佢會買到破產喎, haha. 雖然有左豐豐嘅時候, 我都好希望佢係女仔, 但係而家見到豐豐我都好開心既.
周末食譜: 淮山黨蔘百合蓮子湯, 中式豬扒, 金銀蛋莧菜
淮山黨蔘百合蓮子湯
材料: 淮山, 黨蔘, 百合, 蓮子, 南北杏, 雞, 豬展, 薑片
做法:
1. 淮山及黨蔘分別用水浸30分鐘; 雞及豬展出水; 其他材料洗淨.
2. 水煲後落全部材料, 滾後轉慢火煲1.5小時, 落鹽調味. 即成.
中式豬扒
材料: 豬扒, 洋蔥, 李錦記中式豬扒醬
調味:
(A) 生抽, 老抽, 糖, 蛋白
(B) 麻油, 油, 生粉
做法:
1. 豬扒先用調味(A) 醃半小時, 之後加調味(B)略醃; 洋蔥切件.
2. 先將豬扒煎至金黃, 盛起切件.
3. 洋蔥炒香, 加入李錦記中式豬扒醬及少許水, 加入豬扒, 快手拌勻. 即成.
金銀蛋莧菜
材料: 莧菜, 皮蛋, 咸蛋, 蒜頭
做法:
1. 莧菜先浸30分鐘, 洗淨去根; 皮蛋切件
2. 煲滾水, 加入蒜頭, 咸蛋, 皮蛋, 雞粉及少許油, 煮至熟. 即成.
我個髮型師話, 如果想 BB第日啲頭髮多啲靚啲, 一歲之前最好剃左原本啲毛毛頭髮, 等啲毛囊 strong啲, 不過佢唔建議帶 BB去 salon剪, 最好自己同佢喺屋企剪, 佢以為係玩, 就唔會咁驚, 剪多幾次先去 salon就唔會喊啦. Baba weekend幫豐豐剃左頭髮啦, 佢真係冇反抗喎, 好順利就搞掂左, 而家變左做光頭 BB啦, hehe.
哩個世界真係好細呀, 上星期喺 Baby Kingdom見到有個 forum, 個 mami想搵同佢個 BB女同一日出世, 同一間醫院嘅 BB, 咁岩同豐豐一樣, 於是我留言啦, 點知發覺原來佢就係豐豐契媽個朋友, 最岩就係, 原來豐豐幾日人仔去醫院照燈, 同一間病房嘅其中一個 BB就係佢, 哈哈, 真係好興奮呀!
8個月嘅豐豐, 已經識得爬, 識得扶住床邊企, 仲成日搞搞陣, 有脾氣, 仲未識講 "Baba", Baba好唔 happy, wakakakaka.
以前整肉碎粥都好煩惱點樣可以拎啲肉碎放落啲粥到煲唔會痴番埋一舊, 上網 search, 原來好簡單, 只要將啲肉碎加少少水拌勻, 然後先再放入啲粥入面煲, 咁就唔會痴埋一舊架啦
豐豐今日食冬瓜肉碎粥.
6月22號係我最愛嘅老公嘅生日, 我請佢去鯉景灣食飯, 我係喺 Open Rice 搵到哩間中意仿, 我之所以揀佢, 係因為有人 post左 D甜品相, 真係非常吸引, 加上老公一向比較鐘意食中菜. 嗰日係 3號風球, 中意仿又比較近海, 超大風呀. 見係老公生日, 我地叫左個比較貴嘅套餐, 加多一條凍魚, 仲可以試 6款甜品, 佢地 D甜品真係好特別, 真係睇到都已經好開心, 其他餸同燉湯都好正呀, 佢地 D服務都好好呀, 值得推介. 我同老公都好滿意哩餐 
菠菜含有多種維生素和鐵、鈣等礦物質, 而三文魚就有 omega3, 兩樣都好有益, 今日豐豐就食菠菜三文魚粥啦.
豐豐嘅太爺爺走左啦, 前兩日終於完成佢嘅身後事, 因為太爺爺已經 95歲啦, 靈堂門前係掛上一對紅燈籠, 好多來自唔同地方嘅家人都返晒黎送太爺爺最後一程. 雖然係笑喪, 但係靈堂入面都不時聽到哭泣聲, 太嫲嫲係未停過飲泣, 聽家人講, 原來太爺爺同太嫲嫲係由 BB已經開始一齊生活架啦, 一個同自己一齊過左 90幾年嘅最親比自己先行一步, 我諗佢嘅心情其他人真係好難理解, 唔理多年黎兩夫婦有幾多埋怨, 幾多爭吵, 哩一刻都必定係好難過, 太爺爺蓋棺嗰一刻, 差唔多全部人都喊, 連我雖然對太爺爺嘅感情好淺, 我都忍唔住我嘅眼淚.
相信太爺爺會安息, 喺天國眷顧住一家.
今個 weekend冇周圍去呀, 都係落街食下野, 行下公園, 返屋企開行冷氣瞓晏覺, 出面太熱啦, 行一陣已經成身濕晒.
周末食譜: 蕃茄紅蘿蔔薯仔三文魚骨湯, 焗蜜糖雞翼, 清蒸紅油
蕃茄紅蘿蔔薯仔三文魚骨湯
材料: 蕃茄, 紅蘿蔔, 薯仔, 三文魚骨, 薑片
做法:
1. 蕃茄, 紅蘿蔔, 薯仔切大件.
2. 將所有材料放入滾水大火煲 15分鐘, 轉慢火煲 45分鐘, 落鹽調味. 即成.
焗蜜糖雞翼
材料: 雞翼
醃料: 生抽, 胡椒粉, 糖, 生粉, 蜜糖
做法:
1. 雞翼用檸檬汁醃 5分鐘, 洗淨, 可去雪味.
2. 雞翼用醃料醃數小時或過夜.
3. 入焗爐 220度焗 15分鐘, 取出掃上蜜糖, 再焗 3-5分鐘. 即成.
清蒸紅油
材料: 紅油魚一條, 薑絲, 蔥花, 豉油熟油糖
做法:
1. 紅油洗淨印乾水, 鋪上薑絲及蔥花.
2. 水滾隔水蒸 10分鐘, 倒去魚水, 淋上豉油熟油糖. 即成.
老公轉左工之後近左我公司, 雖然我地食 lunch時間有 D唔同, 不過我公司比較彈性, 加上如果老闆唔喺度就仲 free添. 岩岩個 happy Friday, 我地去左 Misocool 食拉麵, 聽同事講好好味, 不過好多人排隊架, 我 12:15就出去霸位, 坐底冇耐就已經 full晒啦. 哩間 D野食都唔錯架, 我地叫左豬軟骨拉麵, 牛奶湯海鮮墨魚汁麵同埋嫲嫲餃子. Total食左 $180左右連埋加一.
間中喺 Baby Kingdom就會見到有 D媽咪好愁 BB唔肯食粥仔, 好彩豐豐好乖, 又好為食, 未試過唔肯食架, 次次都差唔多清晒, 唔知係咪因為婆婆同媽咪煮得好味呢, hehe. 尋日我煮左紅蘿蔔粟米牛肉粥, 我自己試味都覺得好好食, 豐豐食晒一大碗呀!
