因為豐豐哩幾日病左, 我地哩個 weekend都冇周圍去, 今日仲成日留喺屋企添, 我地一家三口一齊瞓晏覺, 都好舒服架.
周末食譜: 何首烏淮山紅棗燉雞湯, 咖哩雞翼, 椒鹽多春魚
何首烏淮山紅棗燉雞湯
材料: 雞, 何首烏, 淮山, 紅棗, 圓肉, 元貝, 薑片
做法:
1. 雞出水; 淮山浸 1小時; 其他材料沖洗備用.
2. 將所有材料放入電子燉盎, 加入滾水, 燉 3小時, 落鹽調味. 即成.
咖哩雞翼
材料: 雞翼, 薯仔, 甘筍
做法:
1. 雞翼加檸檬汁拌勻, 5分鐘後沖洗, 可去雪味.
2. 薯仔甘筍切件.
3. 先略炒薯仔甘筍, 加入咖哩醬拌勻, 加水至蓋過材料的 2/3, 然後加雞翼, 可加少許糖及雞粉調味, 慢火燜至收水. 即成.
椒鹽多春魚
材料: 多春魚
做法:
1. 多春魚洗淨抹乾, 用胡椒粉及鹽醃 1小時.
2. 焗爐 180度預熱, 焗盤鋪上錫紙, 塗上油.
3. 將多春魚放上焗盤, 洒上味椒鹽, 入爐焗 12分鐘. 即成.
豐豐病左幾日啦, 發燒最高 39度, 第一日好扭計, 哩兩日不停瞓, 今日叫做好 D啦, 冇再發燒, 但係個人仲係好似好呆咁. 醫生話佢可能係吽牙仔, 但係我地都唔見佢隻牙仔個蹤影. BB病左, 佢唔舒服之餘, 我地又擔心, 半夜都要起身同佢探熱, 好驚太高燒會燒壞腦呀.
我啲咳仲未斷呀, 雖然唔係好嚴重, 不過一到夜晚瞓落床就會咳多幾聲, 於是 weekend煲左南北杏羅漢果菜乾煲西施骨湯試下止唔止到咳. 嘩, 哩個湯係我咁耐之黎, 煲過最 "難飲" 嘅湯, 真係甘到呢.... 連老公都頂唔順, 我硬住頭皮飲左兩碗, 飲嘅時候都冇乜野, 飲完之後真係甘到落口喉嚨頂. 不過話時話, 我尋晚瞓覺真係咳少左喎, 呵!
南北杏羅漢果菜乾煲西施骨湯
材料:
南北杏少許, 羅漢果 1個, 菜乾 1朼, 西施骨約 $30
做法:
1. 菜乾浸軟洗淨; 西施骨出水.
2. 所有材料大火煲 30分鐘, 轉慢火再煲 2小時, 落鹽調味. 即成.
小貼士:
1. 羅漢果要用手整爛才出味.
2. 羅漢果及菜乾要凍水落.
Weekend哩兩日都落大雨呀, 星期六帶豐豐出去食 tea buffet, 第一次同小虎見面, 一落車就超大雨呀, 不過 gathering都好開心呀!!!
紅蘿蔔煲粥仔真係幾好, 粥仔煲出黎顏色又靚, 食落又甜甜地, 好味!
豐豐 7個月啦, 已經算坐得穩, 成日四圍碌, 由床頭碌去床尾, 再碌番轉頭, 有次一不留神, 被佢由大人床碌左落地, "呯"一聲, 好彩冇事, 不過勁肉赤呀, 而家睇少一眼都唔得呀. 佢而家成日"講野", 前幾日, 我對住佢不停講 "MA MA", 佢望住我冇反應, 我一轉身, 佢就叫 "MA MA MA MA", 真係好心到呢...雖然佢係冇意識 "MA MA"係咩, 不過我已經好開心啦, 之後佢仲成日叫 "MA MA"添, Baba 好呷醋呀, 呵呵!
上星期尾開始有幾聲咳, 驚傳染俾豐豐, 即刻拿拿臨去睇醫生. 聽講海底椰可以止咳, 經過凍肉舖買左 pack急凍嘅試下煲湯. 上網 search過話而家買到嘅都唔係真正嘅海底椰, 冇止咳作用, 不過都可以滋潤下, 於是我煲左紅蘿蔔粟米螺片海底椰湯, 好清甜呀!
紅蘿蔔粟米螺片海底椰湯
材料: 紅蘿蔔一條, 粟米一條, 螺片一片, 元貝 3粒, 急凍海底椰 3粒, 豬展, 薑片
做法:
1. 螺片及元貝浸軟; 紅蘿蔔刨皮切大件; 粟米切件; 豬展出水.
2. 將所有材料大火煲滾 30分鐘, 轉慢火再煲 2小時, 下鹽調味. 即成.
煲湯係我嘅專長, 母親節嗰日嘅晚餐雖然係老公準備, 不過靚湯都係我嘅作品, 老公話好夠味呀, 落鹽之前我都俾左一碗仔豐豐飲呀!
猴頭菇螺片雞腳湯
材料: 猴頭菇, 螺片, 元貝, 雞腳, 豬展, 薑片
做法:
1. 螺片及元貝浸數小時至軟; 猴頭菇浸半小時, 洗淨後搾乾水; 雞腳切去腳指, 與豬展一同出水.
2. 所有材料大火煲半小時, 轉慢火煲 2小時, 下鹽調味. 即成.
今日係佛誕假期, 我地一早去左銀線灣玩呀, 係豐豐第一次去沙灘, 好開心, 好攰呀, 今日天氣好好, 藍天白雲好正呀, 仲好熱添.
是日粥仔: 粟米瘦肉粥
士多啤梨果醬 <食譜參考自 Shirley@原味生活>
材料: 士多啤梨 300g, 糖 110g, 檸檬 1/3個
做法:
1. 士多啤梨洗淨切細粒, 加糖拌勻, 放入雪櫃雪數小時或過夜.
2. 將檸檬汁加入(1), 細火不停慢慢攪拌, 至變成漿, 熄火, 待涼後放入樽內, 放入雪櫃保存.
小貼士:
1. 糖的份量約為士多啤梨重量的1/3, 可待滾起後試味再加以調整.
2. 注意果醬雪凍後會更杰.
3. 建議用易潔煲, 比較易清洗.
4. 用一個較深的煲, 以免滾瀉.
5. 一般可於雪櫃保存 2星期.
嘩, 估唔到雞肝粥係咁好味架, 連我都忍唔住要偷食豐豐 D粥仔, hehe
我初初都擔心咁細個 BB食內臟驚唔驚, 不過聽講好有營養架, 有蛋白質, 必要嘅脂肪酸, 酵素, 多種營養素好似硒, 鋅, 鎂, 維生素 B, 維生素A同埋 D等等, 間中食下唔怕啦. 我加埋少少雞肉同菜心一齊煮, 不過雞肝我只係要 D味, 冇俾豐豐食. 佢食到唔停得口, 我俾慢 D佢都 er er聲, 哈.
今年係我第一次以媽咪嘅身份慶祝母親節, 多謝老公代豐豐為我準備嘅晚餐同蛋糕, I love you both!!! 祝所有媽咪日日都咁快樂!
哩個五一假期, 同左媽咪提前慶祝母親節, 又同左老爺佢地飲茶, 仲帶豐豐去過公園打千秋, 好似唔係好多街去, 但係又日日都出左街, 都算過得幾充實啦. 哩排煮少左飯呀, 因為好懶, 揍豐豐都好攰架, 佢近排又唔知點解扭計左, 我地放假想瞓晏 D都唔得, 佢辰咁早就醒左喊, 但係飲完水, 換完片又要再瞓, 一想瞓就扭計, 真係好攰呀. 不過哩個假期都煮左一餐架.
五一假期食譜: 沙薑雞腳, 海鮮醬豬扒, 蕃茄薯仔肉片湯
沙薑雞腳
材料: 雞腳兩磅, 沙薑粉 2包, 薑片
調味料 A: 1/3包沙薑粉, 鹽, 胡椒粉, 麻油, 凍滾水少許
做法:
1. 雞腳切去腳指, 加薑片出水 (凍水落雞腳), 盛起用開水沖至涼, 隔水待完全涼透.
2. 雞腳放入保鮮袋, 加入一包沙薑粉, 雞粉, 胡椒粉, 拌勻後放入雪櫃醃數小時.
3. 準備雞湯, 加入凍水, 2/3包沙薑粉, 雞粉, 鹽, 糖, 胡椒粉, 麻油拌勻, 加入雞腳, 煮約 15分鐘, 熄火合上蓋焗 20分鐘, 盛起隔水.
4. 加入調味料 A拌勻. 即成.
小貼士:
1. 沙薑粉要用凍水開才易溶解.
海鮮醬豬扒
材料: 豬扒, 海觧醬
做法:
1. 豬扒用生抽, 老抽, 糖, 胡椒粉醃 30分鐘, 加麻油, 油, 生粉拌勻再醃 30分鐘.
2. 先煎熟豬扒, 盛起.
3. 將醃豬扒剩餘醃料加入海鮮醬及水拌勻, 落鑊煮滾, 加入豬扒快速拌勻. 即成.
蕃茄薯仔肉片湯
材料: 蕃茄, 薯仔, 肉片, 薑片
做法:
1. 蕃茄切角, 薯仔去皮切角.
2. 肉片用生抽, 糖, 胡椒粉, 油, 生粉略醃.
3. 水滾放蕃茄薯仔薑片, 滾後轉慢火煲 30分鐘, 加肉片再煲 15分鐘, 加鹽調味. 即成.
上星期先一連放左 4日 Easter假, 今個星期就一連 3日勞動假, 真係開心, 雖然冇咩特別地方去, 休息下都好!
下星期日就係母親節, 我地通常早 D慶祝, 廢事多人, 又被迫食 D貴價套餐, 尋日我地一家人已經去左打邊爐慶祝啦, 成家人一齊食飯真係好開心. 豐豐平時好少有認人, 但係哩兩次見舅母都喊, 仲係一望到就喊添, 唔知 why呢?
哩個 weekend我都係整三文魚俾豐豐食, 今次就加菜心, 上網聽人講買魚生嗰種三文魚好, 我今次都係買哩種, 好方便, 唔洗驚會有小骨.
