咸蛋皮蛋肉碎粥, 叉燒炒銀針粉

星期六去完藝術中心, 途經星光大道嘅時候, 見有個小妹妹一路行一路叫媽媽, 我地冇為意, 再行前一陣, 有個內地女人好急, 間中叫住個名, 我地估佢梗係唔見左個女, honey於是走上去問佢, 果然係, honey就帶佢返轉頭搵, 我企埋一邊等, 過左 10幾分鐘, honey返黎, 佢話搵唔到個小妹妹, 佢帶個女人去搵左保安員幫佢.  唔知最後點呢, 希望搵得番啦.  如果係我喺個陌生地方唔見左個小朋友, 都唔知點算好呀.  唔通維港嘅景色真係咁吸引?

星期日之晚餐: 咸蛋皮蛋肉碎粥, 叉燒炒銀針粉

BB日誌 - 第14篇

BB, 星期六爹地同媽咪去左藝術中心睇展覽, 爹地話要培養 BB有藝術細胞喎, 哈哈.  我地去睇左畫展, BB又感唔感受到呢!

26週, 冇再抽筋, 不過個胃好似成日都頂住咁, 唔多舒服.

雲吞沙薑雞拼澳門蝦子麵

打風啦, 真係好希望可以打得成 8號, 有突如其來嘅假期 (不過最重要係要 office hours之內啦, 如果唔係就唔好打啦), 有時覺得望打風好衰, 因為好多人會因為打風好慘, 但係作為一個打工仔黎講, 唔洗返工真係好吸引喎.

尋日煮左澳門買番黎嘅蝦子麵做 dinner, 煮左雲吞沙薑雞拼澳門蝦子麵, 簡單一餐都唔錯架.

鹵水拼盤, 白飯魚乾, 潮州粥

是日晚餐: 鹵水拼盤, 白飯魚乾, 潮州粥.

我個鹵水拼盤好豐富架, 有雞腎, 豆腐, 雞翼, 豬腸, 腩肉同埋蛋.  鹵水汁我用現成鹵水汁.  用真空煲黎整, 好林好入味呀!  白飯魚乾用黎送粥, good!

黑糖香蕉杯仔蛋糕

黑糖香蕉杯仔蛋糕出爐啦!  好香黑糖味呀!  天氣咁熱, 喺屋企開冷氣整蛋糕真係最好嘅選擇.

黑糖香蕉杯仔蛋糕

材料 (12杯)
熟香蕉 2隻, 蛋 2隻, 黑糖 120克, 牛油 85克, 泡打粉 1茶匙, 低筋粉 200克, 鹽少許

做法:
1.  牛油放室溫至軟.  蛋也放室溫.  熟香蕉壓成茸.  焗爐 170度預熱.
2.  將牛油打至軟, 分 2-3次加入黑糖, 拌均至軟.
3.  蛋打均續隻加入, 拌勻.
4.  加入香蕉茸拌勻.
5.  篩入低筋粉, 泡打粉和鹽, 拌勻至沒有粉粒.
6.  將蛋糕糊倒入杯仔紙模至 8成滿.  放入焗爐 170度焗 25分鐘.  即成.

木槺布甸

首先要講下就係 P小姐嘅 BB仔已經出左世啦, 好開心呀, 希望 BB快高長大啦.

好耐之前已經想整木槺布甸, 但係 honey話唔好, 佢話木槺食得架咩, 一定唔好食啦, 真係俾佢激死.  不過上次喺澳門食過之後, 佢話好味, 所以我就試整啦.  其實都真係好易做架, 不過要續層續層整就煩左少少啦.  我整緊嘅時候, honey指住 D餅碎問係咩黎, 我話我整 D木槺俾你食呀 wakakaka.

木槺布甸

材料 (4杯)
瑪莉餅 9塊, 淡忌廉 300克, 煉奶 70克, 可可粉 1湯匙, 雲尼拿香油數滴

做法:
1.  瑪莉餅放入保鮮袋, 用麵粉棒壓爛, 盡碎, 加入可可粉拌勻, 備用.
2.  淡忌廉打起至 7成, 加入煉奶和雲尼拿香油, 打至企身.
3.  放入一層忌廉在杯內, 篩入一層餅碎, 再加一層忌廉, 如此類推, 直至最後一層是餅碎.
4.  放入雪櫃冷藏.  即成.

小貼士:
1.  餅碎要篩入忌廉, 因未必能壓成木槺狀, 可用攪拌機磨碎.

BB日誌 - 第13篇

之前買嘅 BB車尋日送黎啦, 爹地好興奮咁拆箱呀, 仲要媽咪幫佢影底相添, BB梗係好鐘意架車啦, 爹地拆箱嘅時候喺度郁郁下, 梗係同爹地一樣咁興奮啦.  哩架 BB車好易開關, 好方便呀.

25週, 冇再抽筋, yeah!!  到目前為止重左 12-13磅, 暫時進度良好, 繼續加油.

白飯魚乾蒸肉餅, XO醬翠玉瓜炒雞柳

今日同朋友 P小姐傾電話, 佢話我聽佢聽日就入院生 BB啦, 我好登佢緊張呀, 希望佢聽日順順利利, 生個健健康康嘅 BB啦.

天氣真係超熱, 日日都有酷熱警告, 我就黎頂唔順啦, 好想帶埋部冷氣出街.  不過就算係熱, 我都好想煮下野食, 雖然煮完個身好似跌左落水咁全身濕晒.

尋晚煮左 D好簡單嘅餸, 用喺澳門買番黎嘅白飯魚乾蒸肉餅, 然後加碟 XO醬翠玉瓜炒雞柳, 加埋媽咪靚湯, 兩餸一湯, 呀, 仲有健康嘅紅米飯添.

白飯魚乾蒸肉餅

材料:
白飯魚乾, 免治豬肉, 薑絲

做法:
1.  白飯魚乾用水浸軟, 瀝乾水份.
2.  免治豬肉用多生抽, 小老抽, 糖拌勻, 再加入生粉, 油, 麻油拌勻.  然後續少加入水份, 直至豬肉變得輕身.
3.  臨蒸前加入少許酒, 將豬肉倒入已塗油的碟內.
4.  放上白飯魚乾, 加上少許薑絲, 隔水蒸 15分鐘.  即成.

XO醬翠玉瓜炒雞柳

材料:
翠肉瓜, 雞脾肉, XO醬

做法:
1. 翠肉瓜切件.  雞脾肉去皮切成柳, 加生抽, 老抽, 糖, 胡椒粉, 生粉, 麻油, 油略醃.
2. 先煎雞柳, 至 7成熟後加入翠肉瓜炒熟, 可加少許水, 最後加入 XO醬炒勻.  即成.

巴斯光年蛋糕 (Happy Birthday to K & C)

尋日星期六, 未夠 9點已經出左門口, 一早去 QE聽講座, 再去銅鑼灣做檢查, 之後又去旺角行街買野, 夜晚再返銅鑼灣同朋友食飯, 好攰呀, 返到屋企都已經 10點幾啦, 所以今日真係要喺屋企好好休息啦, 俾對腳抖下.

尋晚去左皇室堡食飯, 同我嘅好朋友 K小姐, 仲有契女 Chloe慶祝生日, Chloe媽仲訂左個好得意嘅巴斯光年蛋糕, 不過個蛋糕靚就靚, 質感就真係一般啦.

兩日一夜澳門食食食之旅

今年有左 BB, 冇得搭飛機去旅行, 哩有近近地去下澳門啦. 

兩日一夜, 星期日出發, 成個旅程都係食完再食, 出奇地返黎冇增磅, 可能食得多, 又行得多, 出汗又多.  天氣好熱, 不過又 ok, 唔係好悶熱嗰種, 喺香港反而仲辛苦. 

第一日, 精力充沛, 搭船去澳門, 豪華位好闊落, 仲有簡單食物供應.  去到酒店, upgrade去海景房, 間房唔錯, 個景好靚, 仲可以睇到日落添.  第一日行程豐富, 行左一日都唔覺得好攰. 

第一天行程:
上環港澳碼頭出發 --> 搭 shuttle 去十六蒲酒店 check in --> 議事亭黃枝記 (雲吞麵, 蝦子撈麵) --> 添發 (煲仔翅) --> 喜臨門麵家 (手信蝦子麵) --> 洪韾椰子店 (椰子雪糕, 椰汁) --> 街邊阿伯檔 (手信白飯魚仔乾) --> 榮記豆腐 (豆腐, 豆腐花, 細雜餸) --> 返酒店沖涼休息 --> 黃枝記老店 (水蟹粥, 乾炒肉絲伊麵) --> 大三巴 --> 葡 tart --> 豬扒包 + 桂味荔枝茶 --> 外賣權記豬骨粥 + 勤記綠豆沙 --> 返酒店休息

唔知點解就算幾靚嘅酒店, D床同枕頭都係會令人瞓得唔好, 第 2日我同 honey都冇咩精神, 冇咩 mood四圍行.  我地去左漁人碼頭, 咁岩有個展覽, 因為想涼下冷氣而入左去, 其中一個 booth, 係講關於懷孕, honey仲試穿 20磅嘅大肚裝, 感受下陀住 BB嘅感覺, 好搞笑呀.

第二天行程:
酒店早餐 --> 返酒店房 hea --> 執野 check out --> 搭的士去亞利咖哩屋 (周打魚湯, 血鴨, 咖哩雞, 麥烤餅, 木槺布丁) --> 西灣湖邊休息 --> 搭的士去漁人碼頭 --> 展覽 --> 雪糕 --> 行去碼頭搭酒店 shuttle --> 明記牛雜 --> 佛笑樓 (焗馬介休, 焗葡國雞, 石岐乳鴿) --> 咀香園 (手信杏仁餅, free 鳳凰卷) --> 鉅記 (手信鳥結糖, 花生糖, 魷魚絲) --> 甜香園 (椰汁荔枝南瓜爽) --> 返酒店拎野 --> 搭 shuttle去碼頭

成個旅程我最懷念水蟹粥, 真係超好味, 本來唔應該食蟹嘅我, 真係唔可以忍到口呀, 破例一次咁多啦.

BB日誌 - 第12篇

上星期六, 23週的一個早上, 臨起身之前抽筋呀, 我最驚嘅抽筋都係要發生, 大叫老公, 好彩好快冇事.  我要努力做產前運動, 唔想再抽筋啦. 

So far身體都冇咩野, 媽咪同 BB都好健康.  個肚好似大左好多, 開始有少少 "論盡", 不過哩一個月都冇咩增磅.  前幾日去健康院做檢查, 醫生話 BB冇咩問題, 好正常.  BB而家日日都有郁黎郁去呀.

意大利朱古力蛋糕, 薑汁豆漿

尋日放左一日假, lunch同屋企人去左飲茶, 之後返左屋企, 開行冷氣整蛋糕.  屋企 D材料要清倉啦, 如果唔係就過期架啦, 所以我整左 honey好鐘意嘅意大利朱古力蛋糕, 之後整埋薑汁豆漿, 媽咪教我可以放隻蛋一齊煲, 糖心蛋薑汁豆漿, 正.  休息下睇下雜誌就已經過左一個下晝啦.  今日雖然要返工, 不過今日 summer Friday, 都開心啦, 之後就連放 4日啦, yeah~~~~

意大利朱古力蛋糕 (二德惠課程)

朱古力布甸蛋糕
材料: 牛油 40克, 黑朱古力 40克, 低筋粉 20克, 糖 60克, 蛋 1隻

做法:
1.  牛油和朱古力隔熱水坐溶.  蛋糕模掃油及灑糖.  焗爐 180度預熱.
2.  蛋及糖用電打蛋器打至淡黃色, 加入牛油及朱古力溶液拌勻.
3.  篩入低筋粉, 用手動打蛋器拌勻.
4.  倒入蛋糕模, 放入焗爐 180度焗 12分鐘.  待涼備用.

朱古力慕斯
材料: 淡忌廉 30克, 黑朱古力 60克, rum酒 1湯匙, 淡忌廉 150克, 魚膠粉 3克, 水 30克

做法:
1.  30克淡忌廉加朱古力隔熱水坐溶, 加 rum酒.
2.  魚膠粉加水開溶, 隔熱水坐溶至完成溶開.
3.  150克淡忌廉打至 8成.
4.  倒入朱古力溶液和魚膠水, 拌勻.
5.  倒入朱古力布甸蛋糕, 放入雪櫃雪至凝固.

淋面朱古力
材料:  朱古力 60克, 牛油 15克, 牛奶 38克

做法:
1.  朱古力加牛油隔熱水坐溶.
2.  加入牛奶快手拌勻.
3.  快速淋上朱古力慕斯面.
4.  放入雪櫃片刻.

餅面裝飾
材料:  白朱古力

做法: 
1.  隔水坐溶白朱古力, 放入唧袋唧出線條.  即成.