胡椒豬肚雞湯, 香蒜雞翼, 潤腸炒芥蘭

上星期進行清倉大行動, 想清左屋企啲臘腸同胡椒粒, 所以整左哩餐飯

紅菜頭蕃茄三文魚湯

又係紅菜頭啦, 今次試下煲魚湯, 好正呀, 本來想煲大眼雞, 媽咪俾左PACK三文魚我, 就煲左三文魚, 超多魚油, 豐豐飲左一大樽, 老公都飲左3大碗

紅菜頭淮山茨實湯

哩排街市好多紅菜頭賣, 上星期又買左黎煲湯.  之前老公嫌紅菜頭湯有泥味, 今次我冇要啲葉同莖, 又真係冇泥味喎, 唔知關唔關事呢?   今次個湯唔係鮮紅色啦, 唔知係因為我用真空煲放耐左, 定因為我加左淮山茨實呢? 



紅菜頭淮山茨實湯
材料: 紅菜頭, 淮山, 茨實, 粟米, 紅蘿蔔, 豬展

做法:
1.  紅菜頭刨皮, 切片.  淮山浸半小時.  紅蘿蔔刨皮切件.  豬展出水.  粟米切段.
2.  所有材料加入水, 大火煲30分鐘, 放入真空煲, 飲前再煲15分鐘, 加鹽調味.  即成.

紅蘿蔔鮑魚雞湯, 泡菜海鮮炒飯, 焗香草春雞

近排天氣好潮濕, 搞到個人周身唔舒服, 屋企又濕濕立立咁, 真係唔可以冇抽濕機, 希望快啲有太陽啦.

Weekend兩日都冇去街, 只係出過去飲茶食飯, 天氣唔好, 人都好懶, 唔想周圍去, 成個星期冇睇電視, 一次過喺屋企煲劇.  尋晚又焗春雞, 最好味係個泡菜炒飯, 老公都話好好味.

 

餃子波菜麵

豐豐已經16個月, 有好多牙仔啦, 而家唔一定煲粥仔, 有時懶, 用兩隻餃子煮個烏冬又一餐, 所以屋企冰箱都要買定包餃子, 今次煮左壽桃牌嘅兒童波菜麵, 都唔錯喎, 唔太咸, 又夠淋, 阿仔好鐘意

花生眉豆螺頭湯

上星期姨媽件事搞到我都冇心機, 加上又病, 所以冇煮飯, 只係一早起身煲落湯, 飲湯叫外賣就算啦.  今次煲左花生眉豆螺頭湯, 上次去大家樂食飯老公話花生眉豆湯好飲, 原來我又未煲過, 所以試下, 好味.



花生眉豆螺頭湯材料: 花生眉豆, 紅蘿蔔, 急凍螺頭, 雞腳, 豬展, 薑片

做法:
1. 螺頭去腸, 連同雞腳及豬展出水.
2. 所有材料大火煲 30分鐘, 放入真空煲, 飲前再煲 15分鐘, 落鹽調味.  即成.