腸仔包

星期日晚11點, 熱辣辣嘅腸仔包出爐啦

 

蕃茄薯仔紅蘿蔔三文魚骨湯, 瑞士雞脾, 焗卡邦尼大蝦意粉

今日過左一個好 hea嘅星期六, 上晝同豐豐去左公園玩, 食完 lunch就返屋企, 趁豐豐瞓晏覺時去準備晚餐, 搞下搞下, 就咁就過左 1 day啦.

周末晚餐: 蕃茄薯仔紅蘿蔔三文魚骨湯, 瑞士雞脾, 焗卡邦尼大蝦意粉

豐豐＠１４個月

我個寶貝仔豐豐已經 14個月啦, 差唔多14個月嘅時候, 佢終於識行啦, 而家成日喺屋企行出行入, 將啲野搬黎搬去   尋日發現佢腫左一排嘅牙肉露出左小小臼齒, 唔知係咪出牙仔唔舒服, 近幾日夜晚瞓覺瞓得好差, 一晚醒幾次, 搞到我地都冇覺好瞓.

北海道牛奶吐司

哩幾日好凍呀, 今朝得 10度咋, 天氣時凍時熱, 豐豐都病左呀, 流鼻水, 我鼻敏感都發作

因為年尾要清假, 我星期五放左一日假, 豐豐跟左婆婆, 我一個人去左 shopping, 唔洗一個鐘已經掃左 7,8件衫, 平時行街好爽呀, 唔多人, 好耐未試過咁盡情啦, 不過大出血

尋晚終於有機會再試整麵包, 今次整北海道牛奶吐司, 好成功呀!  食譜參考自雪媽媽的 <自家製麵包>.

霸王花鴨腎湯, 薑蔥三文魚頭煲, 燒汁煎豬扒, 蒜茸炒小棠菜

星期六帶豐豐去左德福行街食晚飯, 好有聖誕氣氛呀, 不過好多人, 可能太攰, 豐豐夜晚飲完奶就即刻瞓左, 尋日冇去街, 下晝瞓左 3個鐘晏覺.  見到 12月個 calendar, 好多假期, 好期待呀!



霸王花鴨腎湯
材料: 霸王花, 鴨腎, 豬展骨, 南北杏, 蜜棗, 果皮

做法:
1.  霸王花浸 1小時; 豬展骨出水; 果皮刮去囊.
2.  水滾加入所有材料, 大火煲 30分鐘, 放入真空煲, 飲前再煲 15分鐘, 落鹽調味.  即成.

合掌瓜瑤柱肉碎粥

豐豐近排食少左野, 有時一碗粥或者一碗粉都食唔晒, 唔知係咪因為出緊牙唔舒服, 又成日咬手指, 所以近排又煲番啲稀少少嘅粥俾佢食下.

豐豐 @13個月

13個月啦, 豐豐上次 1歲去健康院打針, 嗰時約 24磅.  豐豐而家識咩呢:

• 自己企一陣
• 自己行 10步左右
• 拖住人地手指周圍行
• 揸車車, 仲識轉彎
• kiss kiss
• 飛吻
• bye bye
• 豬咀
• ear
• 拖手手
• 同佢講舒服佢會瞓底
• 扔野, 成日扔玩具落地
• 自己用飲管杯飲水
• 用叉叉生果食
• 將啲野搬黎搬去
• 叫佢俾俾佢會俾你
• 玩 iphone, 玩 remote
• 睇 DVD半粒鐘都唔郁
• 自己用手拎餅餅食
• 入圈圈落雪糕筒
• 將玩具放入箱
• 攬住公仔, 曖曖公仔
• 我地坐喺梳化, 企喺我地後面彈彈下
• 俾對襪襪佢, 會放喺腳仔上面想著
• 發脾氣, LUR地

阿仔而家學野好快, 教佢啲野好快就學識啦. 希望豐豐繼續做一個精靈而又健康嘅 BB啦.

合掌瓜聖子雞腳湯

上星期老公話幫我部 iphone upgrade喎, 點知 upgrade完, 先發現 backup有問題, 所有野都冇晒, 包括豐豐出世到而家用 iphone影嘅相, video, 仲有記錄底我大肚時嘅體重, 豐豐嘅體重等等, 咩都冇晒, 同一部新機一野 超唔開心, 好想發脾氣, 但係忍住, 因為我知老公都唔想, 好彩我間唔時都有 upload啲相同 video上 facebook咋, 好珍貴架嘛, 影/拍唔番架啦

周末食譜: 合掌瓜聖子雞腳湯

合掌瓜聖子雞腳湯

材料: 合掌瓜, 聖子乾, 雞腳, 金華火腿, 豬展, 元肉, 紅棗, 杞子, 薑片

做法:
1. 合掌瓜去皮切大件; 雞腳及豬展出水.
2. 水滾後放入所有材料, 大火煲 30分鐘, 放入真空煲, 飲前再煲 15分鐘, 加鹽調味.  即成.

娃娃菜雞脾肉湯烏冬

近幾日心情唔多好, 返工又俾同事煩, 老闆又野蠻  阿仔 interview嘅第一間幼稚園收到信只係 waiting list, 雖然預左, 不過都係有少少失望  睇黎都要食番多啲朱古力令自己開心下啦.

豐豐都算可以食大人野啦, 而家煲少左粥, 煮多左烏冬呀, 通粉之類, 方便好多.

泡菜豚肉煱, 燒汁鯖魚

今日終於有少少冬天 feel啦, 不過落雨, 唔係幾鐘意.  尋日又同班姊妹 gathering打邊爐, 雖然間酒樓嘈爆, 不過都好開心, 好開心識到大家, 有講不盡嘅話題, 無所不談, 希望友誼永固啦, 哈哈, 好老土.

周末食譜: 泡菜豚肉煱, 燒汁鯖魚

泡菜豚肉煱
材料: 泡菜, 娃娃菜, 豚肉片, 粉絲, 豆腐, 上湯, 水

做法:
1.  先煲滾上湯及水, 之後加入其他材料, 煮熟後即成.
燒汁鯖魚
材料: 鯖魚柳

做法:
1.  鯖魚柳用胡椒粉及鹽略醃, 煎前撲上生粉, 下鑊煎至兩面金黃, 盛起.
2.  燒汁落鑊煮熱, 淋在鯖魚上.  即成.

久別重逄 @ Angus

尋日同兩位靚女食飯, A小姐揀左佢朋友新開嘅 Angus, 環境唔錯, 服務又好好, 仲有個好靚仔嘅 waiter添 .  老闆仲送左個頭盤同甜品俾我地試.  可能係新開加上尋日係星期一, 好少人, 成個餐廳都係得兩三張枱有人坐.  哩間餐廳都幾岩慶祝 anniversary, 或者幾個朋友靜靜地食下飯傾下計.

瑤柱雞粥, 肉絲炒烏冬

上星期返工唔開心, 本來諗住 weekend寫 blog要寫低, 但係發覺已經唔係好值得再記低, 我真係好希望自己 EQ高啲, 唔好成日為左啲無謂嘅人同事而唔開心.

尋日煲瑤柱雞粥同埋肉絲炒烏冬, 炒烏冬食到老公 lam lam咀

南瓜洋蔥肉碎粥

今日煮南瓜洋蔥肉碎粥俾豐豐食, 南瓜粥真係好甜, 就算唔落鹽都好味, 我忍唔住都偷食左幾啖 不過一定要係圓形南瓜是甜, 長形嗰隻係冇咩味架, 加埋洋蔥, 剩係煮緊嘅時候已經成間屋香噴噴啦.

花膠螺頭燉雞湯, 火腿上湯浸娃娃菜, 白酒煮藍青口

尋日豐豐去完打1歲針, 夜晚比平時扭計左好多, 又瞓得唔好, 唔知會唔會發燒添

周末晚餐: 花膠螺頭燉雞湯, 火腿上湯浸娃娃菜, 白酒煮藍青口.  第一次煮藍青口, 加埋白酒同忌廉煮, 好好味, 又好簡單.

白酒煮藍青口

材料: 急凍藍青口, 白酒, 忌廉, 蒜茸, 牛油

做法:
1. 牛油下鑊煮溶, 加入蒜茸炒香, 之後加入藍青口, 白酒及忌廉略炒, CUP蓋焗數分鐘至青口打開.  即成.

火腿上湯浸娃娃菜

材料: 金華火腿, 娃娃菜, 上湯

做法:
1. 金華火腿切絲備用.
2. 先煲滾上湯, 加金華火腿煮數分鐘, 加娃娃菜及少許油, 煮至菜林.  即成.

花膠螺頭燉雞湯

材料: 花膠 (已發), 螺頭, 雞, 豬展, 金華火腿片, 紅棗, 圓肉, 薑片

做法:
1.  雞及豬展出水.  螺頭去腸及出水.
2.  將所有材料放入電子燉盎, 加入滾水, 燉 3小時, 落鹽調味.  即成.

西蘭花洋蔥肉碎 ABC粉

終於都係要將個 blog升級, 新嘅環境仲未慣, 要慢慢適應.

尋日係我牛一, 不過老公要去飲, 冇慶祝呀, 同平時一樣咁過.  我發現自己過左某個年紀之後, 好似失憶咁, 成日唔記得自己其實幾多歲, 哈哈!

今日放假, 唔明點解一放假樓上樓下梗有人裝修, 激死.  整左西蘭花洋蔥肉碎 ABC粉, 等豐豐起身食 lunch, 之後出去同婆婆歎下午茶, yeah!

豐豐的第一個生日小派對

仲有幾日, 我個寶貝仔就 1歲啦, 尋日我地幫佢搞左個小型派對, 邀請左屋企人同契媽佢地一齊黎幫豐豐預祝佢嘅第一個生日.  成個 party由裝飾到食物差唔多都係我準備架, 希望大家食得開心, 玩得開心啦! 

豐豐, 媽咪為左你個生日會放左好多心思, 雖然你大個左可能對哩個生日會冇咩印象, 不過希望好多年之後, 當你睇番啲相, 你都一樣覺得好開心啦.  I love you!

瑞士雞脾飯配蒜茸炒翠玉瓜, 花膠雞湯

上星期工作有啲唔開心, 充滿負能量, 好彩意料之外打 8號風球, 有一日假期, 真係開心!  唔洗返工, 我喺屋企自製蒜茸, 呵呵!

星期五得我一個喺屋企咋, 老公返左鄉下, 我約左舊同事食 dinner驚夜就冇接豐豐返黎, 難得一晚自由時候, 其實真係好 free架, 不過當上床瞓覺嘅時候又有少少失落, 阿仔唔喺身邊好空虛咁, 當時我諗, 唔知細個我第一次去 camp冇返屋企瞓, 媽咪係咪都有同一樣嘅感受呢?

周末食譜: 瑞士雞脾飯配蒜茸炒翠玉瓜, 花膠雞湯

花膠雞湯

材料: 花膠 (已浸發), 雞, 豬展, 紅蘿蔔, 粟米, 圓肉, 紅棗, 薑片

做法:
1. 雞及豬展出水; 紅蘿蔔刨皮切件; 粟米切段; 花膠切件; 圓肉紅棗洗淨.
2. 水滾後放入所有材料, 大火煲 30分鐘, 放入真空煲, 飲前再大火煲 15分鐘, 落鹽調味.  即成.

自家製蒜茸

材料: 蒜頭, 生油

做法:
1. 蒜頭去衣, 放入攪拌機攪成茸.
2. 加入生油拌勻, 生油需完全蓋過蒜茸.3. 放入雪櫃儲存.

唐生菜瑤柱雞肉粥

上個 weekend煲粥仔, 啲肉試下唔攪碎, 只係切細粒, 豐豐好似都 ok喎.     

椰子海底椰烏雞湯, 瑤柱肉碎蒸水蛋, 魚唇炆小雞翼

好奇怪, 有一啲人, 當你同佢一齊工作嘅時候, 你會對佢好不滿, 但有一日當佢要離開, 你又好似有少少唔捨得, 因為哩個人可能以後都唔再喺你生命出現, 你對佢以往嘅種種不滿好似突然間變得好模糊, 始終曾經相遇, 都係一種緣份.

今日係我親愛媽咪嘅生日, 希望媽咪每一日都過得開心, 身體健康!

週末食譜: 椰子海底椰烏雞湯, 瑤柱肉碎蒸水蛋, 魚唇炆小雞翼.  今次係我第 2次蒸水蛋, 上一次完全失敗左之後冇再整過, 今次有朋友教我加肉碎同瑤柱一齊整, 雖然個樣唔係太靚, 不過好好味呀!

豐豐 @11個月

好快豐豐就一歲啦, 佢而家會 kiss kiss, 又學識餵餅餅俾我地食, 想要人抱會叫 mama,  真係超級心甜呀!  I love you so much my sweetheart.

合掌瓜聖子湯

合掌瓜聖子湯

材料: 合掌瓜, 紅蘿蔔, 粟米, 聖子乾, 豬展, 薑片

做法:
1. 合掌瓜及紅蘿蔔刨皮切件; 豬展出水, 聖子乾浸軟; 粟米切段.
2. 水滾後放入所有材料, 大火煲 30分鐘, 放入真空煲, 飲前再煲 15分鐘, 落鹽調味.  即成.

粟米蕃茄薯仔肉碎湯ABC粉

超讚晚餐@Oro18 Continental Cuisine

前幾日同一班靚太一行 8人 gathering, 去左 W小姐介紹喺中環嘅 Oro18 Continental Cuisine, 環境好好呀, 食左好多好多好野, 有即開生蠔, 牡丹蝦刺身, 帶子, 鵝肝, 羊架, 牛扒, 又厚又林嘅豬扒, parma ham, 煙燻鰻魚, 黑松露意粉, 蘑菇湯, 白酒, 心太軟同埋其他甜品, 真係超級開心呀, 人多可以試多幾款食物, 真係每樣食少少已經好滿足好飽啦, 因為有朋友價, 每人 $500有找, 其實真係算好抵呀, 而家出去食個 buffet 四五百都好平常, 啲食物仲冇咁靚添喎.  我地傾左成晚, 好開心呀, 好開心識左哩班朋友, 期待下一次嘅 gathering  

追月夜晚餐@韓食家

中秋節第 2日係假期唔洗返工, 我地一家三口食完 lunch返屋企瞓晏覺, 夜晚去左 Mega Box食飯, 是旦入左韓食家, 環境都 ok, 有卡位坐, 幾闊落, 啲食物都唔算貴, 又可以慢慢坐, 我地叫左兩個 set, 原隻人蔘雞同埋辣醬豬肉片, 另外仲加個辣醬豆腐, 除左人蔘雞唔係太夠人蔘味之外, 其他都算幾好味, 不過 service就一般, 冇人收野.  我地食左約 $230埋單, 坐左兩粒鐘, 我覺得都幾抵.

南瓜肉碎湯ABC粉

上星期六打算煲粥仔俾豐豐食嘅時候, 先發現屋企原來冇晒米

好彩, 仲有 ABC粉, 用南瓜+肉碎整個湯底煮 ABC粉, 好好味架.

唐生菜肉碎燕麥粥

今日晨早起身同豐豐去排幼稚園遞 form報出年讀 N班, 真係諗都冇諗過原來係咁多人, 聽講頭位係 2am開始排 @_@ 真係好顛呀!

媽咪俾左包燕麥飯我, 我今次加左少少落去一齊煲粥仔俾豐豐試, 都唔錯呀!

青紅蘿蔔海底椰螺片湯, 叉燒炒蛋, 葡汁雞翼

今日好正呀, 同豐豐一齊瞓左成 3粒半鐘晏覺, 開住冷氣真係好舒服呀.  瞓醒覺起身煮飯仔食啦.

周末食譜: 青紅蘿蔔海底椰螺片湯, 叉燒炒蛋, 葡汁雞翼

青紅蘿蔔海底椰螺片湯

材料: 青蘿蔔, 紅蘿蔔, 粟米, 急凍海底椰, 螺片, 元貝, 薑片, 西施骨

做法:
1. 青紅蘿蔔刨皮切件; 西施骨出水, 螺片元貝浸軟.
2.  水滾後放入所有材料, 大火滾 30分鐘, 放入真空煲, 飲前再大火煲 15分鐘, 落鹽調味.  即成.

葡汁雞翼

材料: 雞翼, 薯仔, 甘筍

做法:
1. 雞翼加入薑汁及胡椒粉拌勻, 以去雪味.
2. 先略炒薯仔及甘筍, 加入雞翼略炒.
3. 再加入水, 雞粉, 老抽, 糖, 少少咖哩醬, 椰汁及生粉, 煮至收水, 試味.  即成.

南瓜洋蔥牛肉粥

尋日喺超市見到有法國入口嘅有機迷你南瓜, 買左一個今日煲粥仔俾豐豐試下, 哩隻南瓜煲出黎好甜, 完全唔同長型嗰隻南瓜架.

菜心甘筍肉碎粥

今日豐豐完左 4堂嘅 playgroup啦, 原來仲有張 cert架, 本來打算最後一堂同同學仔逸楓交換 contact, 點知逸楓冇返, 唔知係咪病左呢, 希望有機會再相遇啦.

今日煲左菜心甘筍肉碎粥俾豐豐食, 落左甘筍啲粥仔顏色靚啲, 仲甜啲.

菜心薯仔牛肉粥

星期二同豐豐去 QE覆診, 有個 BB 1歲啦, 佢媽咪話佢食粥仔好慢, 次次要食成粒鐘, 嘩, 好誇張, 豐豐每次都係 15分鐘左右就食晒成碗粥仔架啦.

3歲Alle生日快樂

我個可愛姪女 Alle今年 3歲啦, 今年我地一家冇出去慶祝, 去左嫲嫲屋企煮大餐, Alle 3年嘅生日蛋糕都係姑媽我送架, 今年試下 Pappagallo嘅雪糕蛋糕, 個蛋糕係好靚呀, 不過我覺得一般好味.

Alle, 祝妳生日快樂!!!!

餐蛋魚丸公仔麵

哩兩個 weekend都冇煲湯煮飯呀, 其實間中煮個麵, 睇下碟, 食下雪糕, 都唔錯架! 哩啲魚丸係我老公鄉下嘅特產黎架.

甜睡 BB @10個月

每次見到豐豐瞓得好甜嘅時候, 我就覺得自己好幸福, 佢平時啲搗蛋野都唔記得晒.  幸福唔係必然架, 有啲小朋友係得唔到人愛錫, 甚至連自己嘅父母都唔錫自己, 當自己係一個包袱, 真係好可憐.  不過豐豐一定係一個好幸福嘅 BB

菜心雞肉粥

豐豐個唐細佬 8月20號出左世啦, 星期日我地去左醫院探佢, 好細好可愛呀, 我已經唔係好記得豐豐咁細粒嘅時候係點啦, 好懷念呀!!

粟米洋蔥牛肉粥

媽咪話洋蔥可以殺菌, 所以間唔時我地就會加啲洋蔥落去粥仔一齊煲, 加左洋蔥嘅粥仔係好香架, 今次配粟米同牛粥, yummy!