終於試左蜜糖芥末豬扒, 果然係唔錯, 用光波爐整豬扒好正, 火喉岩岩好, 又唔會彈油, 又唔鞋. 我懶, 如果開爐煮個汁再淋上豬扒面應該仲好味.
紅螺頭淮杞雞腳豬尾骨湯
材料: 紅螺頭乾, 淮山, 杞子, 蜜棗, 雞腳, 豬尾骨, 紅蘿蔔, 粟米, 薑片
做法:
1. 紅螺頭浸軟; 雞腳及豬尾骨出水; 淮山浸水半小時, 紅蘿蔔刨皮切件; 粟米切件; 其他洗淨.
2. 將所有材料落水, 大火煲30分鐘, 再轉慢火煲1.5小時, 落鹽調味, 即成.
豆醬豆腐蒸黃花魚
材料: 豆腐, 黃花魚, 薑片, 豆醬, 蔥粒, 滾油, 蒸魚豉油
做法:
1. 黃花魚洗淨印乾, 將薑片放入魚肚內.
2. 豆腐切件, 連魚一齊放上碟, 鋪上豆醬.
3. 水滾後蒸10分鐘, 倒去蒸魚水, 加上蔥粒, 淋上滾油及蒸魚豉油, 即成.
小貼士:
1. 沒有蒸魚豉油, 可用生抽加糖拌勻而成.
2. 蒸魚時間視乎魚的大小而定.
光波蜜糖芥末烤豬扒 (食譜參考自大蚊廚房)
材料: 豬扒
醃料: 生抽, 老抽, 糖, 蛋白, 生粉, 酒
汁料: 蜜糖, 黃芥末醬, 奶, 糖, 鹽少許
做法:
1. 豬扒用刀背拍鬆, 用醃料醃半小時; 汁料拌勻備用.
2. 光波爐底放上錫紙, 再放低架, 205度預熱.
3. 放上豬扒光10分鐘, 反轉塗上汁料, 再光9分鐘, 即成.
上星期日帶豐豐出去玩, 途經一個泊左好多船嘅海邊, 見到有個漁家賣魚, 我地又貪得意買左條游水黃立倉, 劏好晒承為25蚊, 本來打算返屋企用蒜頭豆豉蒸, 點知返到去先發現原來無晒豆豉, 又無蔥喎, 靈機一觸以前用過海鮮醬黎蒸魚, 今次都照板煮碗先, 蒸左出黎個味好夾呀.
海鮮醬蒜茸蒸黃立倉
材料: 黃立倉, 蒜茸, 海鮮醬, 蒸魚豉油, 滾油, 薑片
做法:
1. 魚劏好洗淨抹乾, 將薑片塞入魚肚, 魚面塗上海鮮醬, 再放蒜茸.
2. 水滾放上魚蒸10分鐘.
3. 倒去蒸魚水, 淋上蒸魚豉油及滾油, 即成.
小貼士:
1. 蒸魚時間視乎魚的大小而定.
2. 沒有蒸魚豉油可用生抽加少少糖拌勻而成.
買左pack雞軟骨好耐, 係時候要食左去, 尋日是是旦旦落左啲調味料再光波, 好味呀, 送啤酒最岩.
光波孜然雞軟骨
材料: 雞軟骨
醃料: 雞粉, 孜然粉, 胡椒粉, 花椒粉, 糖, 酒
做法:
1. 雞軟骨用檸檬汁醃10分鐘, 再清洗, 以去雪味.
2. 用醃料醃數小時.
3. 高架加有孔盤塗上少許油, 放上雞軟骨, 260度光8分鐘, 反轉再光至香脆, 即成.
豐豐哩幾日又咳又有鼻水, 尋日仲咳到嘔, 醒起之前聽講燉洋蔥汁可止咳, 岩岩屋企仲有半個洋蔥, 一試無防, 飲左一次又好似真係好啲, 咳少左, 夜晚瞓覺都無乜咳, 哩幾日燉多幾次先, 燉出黎嘅洋蔥汁都幾清甜架. 洋蔥可以殺菌, 好有益, 豐豐BB時食嘅粥仔經常加入洋蔥, 聽朋友講, 西醫都話病時可以食多啲洋蔥, 好有幫助.
燉洋蔥汁
材料: 洋蔥1個
做法:
1. 洋蔥去皮切片, 放在碗內, 碗內不用加水, 隔水燉30分鐘就有少量洋蔥汁, 即成.
小貼士:
1. 燉出來的洋蔥汁只有少量.
2. 成人可連洋蔥一起食, 效果更好.
Day 5: 札幌
話咁快就要返香港啦, 去機場前趕去一轉二条市場間近藤昇商店食番多次刺身飯.
搭飛機返到去東京, 喺成田機場食左餐吉列豬扒, 好好味. 之後我地喺機場散盡所有yen, 買晒手信, 我地總共唱左100000 yen, 最後用剩5 yen, yeah!
北海道之行就此完結.
Day 4: 札幌 (圓山公園, 北海道神宮 - 圓山動物園 - JR Tower T38展望室)哩日去遠少少去左圓山公園站嗰邊, 其實都唔係遠, 幾個subway站, hehe. 去到圓山公園站, 見到一班小朋友, 個個著住夾那衣, 好可愛呀. 圓山公園站行出黎好似無咩好食, 求其入左KFC食早餐.
圓山公園就喺附近, 入到去真係要嘩一聲, 好靚呀, 成張post card咁, 根據資料入面種左1500棵櫻花樹, 我相信如果所有櫻花樹一齊開花, 一定靚到爆呀, 真係好想好想睇到哩個情景呀.
行行下行左去北海道神宮, 入面好寧靜好舒服, 我去日本都好鐘意參觀啲神舍, 感覺好平靜.
見有時間, 我地去埋圓山動物園, 以為好近啦, 原來都要行一陣架. 圓山動物園真係一個真正嘅動物園, 講得出嘅動物都有, 獅子, 老虎, 北極熊, 企鵝, 猴子, 猩猩, 弧狸, 斑馬, 長頸鹿, 兔仔, 袋鼠, 羊, 駝鳥, 河馬.....真係好勁呀, 不過好可惜, 可能天氣太凍啦, 大部份動物都縮埋瞓覺, 相信夏天去會開心好多.
去完動物園都差唔多3,4點, 喺圓山公園站附近個shopping mall入面一間餐廳食野休息下.
原本食完野想去藻岩山睇夜景, 不過搵唔到條纜車線, 諗諗下睇夜景可以返去JR Tower, 佢有個T38展望室一樣可以360度睇晒札幌嘅夜景, 果然真係值得一去, 好靚.
睇完夜景, 又未肚餓, 我地就行路返去hotel附近, 今次揀左另一間好local嘅居酒屋食串燒, 其實哩個燒鳥本舖正正喺hotel對面, 我地經過好幾次, 估唔到喺札幌最後一晚會去幫襯. 佢個menu又係全日文, 唯有都係亂叫啦, 其中一個串燒, 食落去肥肥地, 望真啲原來係雞pat pat黎架, haha. 原本間居酒屋無其他客人架, 過左一陣, 有個日本男人入左黎, 佢同個waiter知我地由香港黎好似好有興趣, 但佢地英文又唔好, 我地日文又唔得, 用幾個單字英文溝通, 好搞笑, 後來佢仲請我地飲野添呀! 日本人真係好友善.
Day 3: 小樽
哩日搭JR去小樽, 一到站就見到落雪啦, 本來都唔恨有雪, 不過小樽哩個地方加埋落雪又真係幾開心, 好襯呀!
我地先去搵野食, 行左去小樽運河對角一間細細的類似居酒屋嘅地方食野, 個老闆好搞笑, 成日用唔咸唔淡嘅廣東話話老闆好好人, 啲野好好食, 不過我覺得佢煩左啲囉, hehe. 個魚生飯真係份量十足, 正爆.
食完野出去, 開始大雪啦, 我地喺小樽運河影左好多相.
我地漫無目的周圍逛, 小樽基本上10間有8間店都係買玻璃, 好似間間都差唔多咁, 啲玻璃工藝品真係好靚, 同埋一啲都唔平, 我地揀左一個好靚但又唔貴嘅玻璃盒做紀念. 我地去過北一哨子, 小樽浪漫館等等, 途經食左碗拉麵暖胃.
由於想等入黑再去影小樽運河, 但已經好似無咩地方好去, 又凍又大雪, 於是去番4年前honeymoon去過嘅一間餐廳食cake, hea下.
好快入黑啦, 條街開左暗暗嘅燈, 落住雪, 無咩人, 有啲music box嘅音樂傳出, 真係好浪漫呀. 夜晚嘅小樽運河真係靚好多, 無咩人, 我地可以任影.
影完已經差唔多8點, 搭番JR返札幌食dinner, 行黎行去都唔知食咩, 於是行番去hotel附近食串燒, 佢話係用備長炭黎燒, 估唔到又幾好味喎, 啲餐牌係全日文, 我地都係亂咁指咋, haha.
Day 2: 札幌 (二条市場 - 大通公園 - 時計台 - JR Tower - 北海道道廳紅磚樓 - 北海道大學 - 雪華亭)
今次個trip咁短, 都唔想浪費時間去遠嘅地方, 所以今次只留札幌同去小樽, 行下食下影下相, relax relax, 今次去左好多上次honeymoon無去嘅地方. 老公之前買左部新相機, 今次去旅行影左好多靚相.
一早就去二条市場食番個刺身飯做早餐, 我地揀左旅遊書推介嘅近藤昇商店, 老公唔食刺身, 佢order嘅野都好正呀! 原來二条市場就喺狸小路附近, 而hotel行去狸小路只係約5分鐘.
食完野就行去大通公園, 上次honeymoon都有去大通公園, 上次好凍好大風同埋圍住晒整野, 今次見順路好近唔洗搭車又再去, 一遍白雪, 我地企起電視塔前影左好多相, 旅遊資料話大通公園夏天好熱鬧架.
我地由大通公園打算行去JR Tower, 途經一個建築物幾靚, 原來係時計台, 係景點之一.
行到去JR Tower, 老公想去Big Camera睇下啲Canon鏡頭會唔會平啲, 點知仲貴過香港, 一場黎到就行下ESTA, 去到玩具部, 買左幾架Tomy車仔俾豐豐, 210 Yen一架咋, 原來香港要買30幾蚊架, 早知買多啲啦.
JR Tower上面有層有好多餐廳, 我地揀左一間食咖哩湯飯嘅餐廳, 啲咖哩湯好好味呀, 老公嗰碗仲加左椰汁, 正!
食飽繼續出發, 先去紅磚樓, 紅磚樓係美國巴洛克式嘅磚造建築, 入面有得免費參觀, 介紹下日本咁, 不過好悶, hehe, 我地喺出面影下相就行去北海道大學啦.
見啲旅遊情報話北海道大學係札幌重要的觀光景點, 所以去睇下, 原來嗰度真係好靚架, 兩旁種晒樹, 加上白雪, 又清靜, 好舒服呀.
睇旅遊書推介雪華亭哩個食蟹宴嘅餐廳, 出發前先上網book左, 佢全部都係房, 幾雅致, 個toilet都好靚架, 不過隔音就差啲, 聽到晒隔離房啲人講野, 有個識講國語嘅waitress招呼我地, 介紹下有咩食, 成個餐食左2個半鐘, 隻毛蟹好多膏, 好味.
回酒店嘅路上又經過大通公園, 夜晚開左燈嘅電視塔好靚呀, 每個鐘仲會轉色添. 哩日嘅行程基本上唔洗搭車, 係去完北海道大學出黎迷路, 搭左轉subway去雪華亭.
Day 1 : 香港 - 東京成田機場 (JL736) - 札幌新千歲機場 (JL3049)
Hotel: APA Hotel Sapporo Susukino Ekimae
日元對換率: 約81
今次哩個免費trip係4日3夜之旅, 但由於安排我地要去東京轉機, 頭尾已經無左兩日, 所以我地stay behind多一日, 如果唔係掛住阿仔, 真係想stay耐啲呀. 已經浪費時間要轉機, 由於東京好大風, 班機仲要delay, 初時仲話有可能要轉飛其他機場, 好彩唔洗, 去到東京得一個鐘左右趕去下一班機, 仲要過海關拎行李再check in, 真係趕到甩碌, 到左札幌已經夜晚8點幾, 搭JR去札幌站再轉subway去APA Hotel settle down已經差唔多10點. 好橋呀, 原來今次offer我地住間hotel, 就係4年前我地去honeymoon住嗰間呀, 不過已經轉左名, 但係一切都好有親切感, hotel好方便呀, exactly喺豐水薄野站其中一個出口隔離, 唔係好靚嘅hotel, 細細間, 都ok架. Check in完拿拿臨出去搵食, 行下行下去左一間拉麵店叫北一, 坐低之後發現我地當年都黎過架, hahaha, 啲拉麵好味呀.
