BB日誌 - 第1篇

2010年2月23日, 上次M係1月24日, 我嘅cycle一般係35日.  仲有幾日先到M, 不過我已經急不及待自己用棒棒驗孕, 結果係中左呀! 

2月25日, 醫生confirm左啦!  2月27日, 我地去QE登記左啦!

我同honey都決定唔咁早通知屋企人, 直至我地check到BB心跳, 因為唔想佢地擔心呀.  而家唯有去baby kingdom同其他網友分享下啦!

老實講, 我真係有 D擔心 BB唔知健唔健康呀, 不過都控制唔到, 唯有叫自己放鬆D啦.

我的第一樽咸柑桔

媽咪幫我買左柑桔啦, 終於可以試下醃咸柑桔!

咸柑桔


做法:
 
 1.  柑桔洗淨, 用食水浸若15分鐘.  記得要用食水浸.

2.  擎乾水.

3.  放在抹手紙上風乾表面.

4.  玻璃器皿用熱滾水消毒, 記得要凍水落, 大火水滾煲5分鐘, 熄火.  如果蓋不是玻璃, 可熄火才放落熱水略浸.

5.  器皿放在抹手紙上風乾.

6.  首先在樽底放一層粗鹽, 上面放上柑桔.

7.  之後再放上一層鹽, 再放柑桔, 如似類推.

8.  最後鋪上保鮮紙, 蓋上蓋, 在面寫上日期作記錄, 放在陰涼處.  完成.

小貼士:
1.  柑桔一定要揀完整, 要有粒"的", 沒有爛.
2.  咸柑桔一年後可加溫水或加蜜糖水飲用, 可止咳, 化啖, 止口喉痛.
3.  咸柑桔醃越久, 功效越好.

自家製滋補靚湯

終於等到星期六可以休息休息啦.  今日好開心, 睇左想睇好耐嘅<72家租客>同埋食左好耐冇食嘅譚仔米線, 夜晚又同 honey一齊睇左成晚<超級巨聲畢業音樂會> (佢平時好少睇電視架).


今朝出門口之前用真空煲煲落湯, 今晚一邊睇電視一邊飲湯, 正!  飲咩湯呢? 我都唔知叫咩名喎.  我放左好多材料落去, 有竹絲雞啦, 豬肉啦, 花膠啦, 急凍鮑螺啦, 螺頭啦, 急凍魚翅群啦, 金華火腿啦, 紅棗啦, 杞子啦, 仲有圓肉添... 好多材料已經俾我煲到溶晒落煲湯入面, 飲晒真係覺得好滋補呀, 真係飲多 D, 人都靚 D架!!

靚靚韓國紫菜禮盒

天氣超潮濕呀, 你話冇左抽濕機點算呢, 廁所個天花板仲有霉菌添呀!


有個韓國同事黎左香港, 為左多謝我幫佢安排酒店, 佢送左盒紫菜俾我, 好精美呀, 一盒有兩罐.  韓國 D紫菜咸咸地, 好味架!  多謝晒 Su!  有個同事同我講, 用哩 D韓國紫菜加午餐肉做壽司, 係好好味喎, 真係信不信尤你啦!

沙薑炆雞, 叉燒炒三色蛋

今日虎年第一日返工呀, 開工大吉!!  本來以為放左咁耐假, 今日應該會好忙, 點知又唔係喎, 無無聊聊咁過左一日.

今晚食乜餸呢?  就係沙薑炆雞加叉燒炒三色蛋啦.  沙薑炆雞 honey話好味好香呀, 而叉燒炒三色蛋就太多餡唔夠雞蛋, 所以賣相冇咁靚, 不過就夠晒足料.  兩個餸都好易整架!!

沙薑炆雞

材料:
雞件 (我買左兩隻走地雞脾同雞翼斬件)

醃料:
沙薑粉, 胡椒粉, 鹽, 薑茸薑汁

調味:
水, 生抽, 老抽, 鹽, 糖, 沙薑粉, 麻油

做法:
1.  雞件用醃料醃數小時 (我就尋晚醃今晚煮).
2.  雞件落鑊略炒, 加調味炆至收水, 加蔥段.  最後加少許米酒, 熄火.  即成.

叉燒炒三色蛋

材料:
叉燒粒, 雞蛋, 咸蛋, 皮蛋

做法:
1.  咸蛋皮蛋先蒸熟, 切粒備用.
2.  雞蛋打勻, 加鹽, 糖, 生粉, 蔥粒, 咸蛋粒, 皮蛋粒拌勻.
3.  叉燒粒先落鑊略炒, 加 (2) 炒熟.  即成.

出埸啦 - 鮑汁花膠扒鮑魚

終於出埸啦!  之前我同 honey喺大昌見到急凍嘅南澳青邊鮑, honey話好想試, 兩隻都要成 500蚊架, 佢好闊佬咁話佢請, 我梗係讚成啦.  我未煮過 D咁貴嘅材料架, 都好驚會整衰左, 所以要諗清諗楚先開工.  尋晚已經開始炆啦, 用真空煲同明火輪流咁炆左 1日1夜架啦.  睇落係咪都似模似樣呢... D汁都唔錯架, 花膠 "索" 晒 D汁好好味呀, 不過隻鮑魚可以再林 D添, 我諗唔好太貪心, 細隻少少應該會好味 D.  冇錢食乾鮑, 食住急凍飽頂住先啦, 呵!

鮑汁花膠扒鮑魚

材料:
急凍鮑魚
花膠

調味:
鮑魚汁, 蠔油, 生抽, 糖, 八角 1粒 (我岩岩冇晒八角, 落左少少五香粉代替), 薑 1片, 水

做法:
1.  花膠浸發後用薑蔥出水.
2.  鮑魚洗淨去內臟, 用薑出水.
3.  調味要蓋過鮑魚, 大火炆若 30分鐘, 放入真空煲, 期間間中轉用明火炆, 炆至鮑魚林.
4.  加花膠炆若 20分鐘至花膠林, 加生粉水埋獻.  即成.

小貼士:
1.  大昌職員話鮑魚要凍水落.
2.  調味試味後因個人喜好調較分量.
3.  鮑魚裙邊可剪去, 較為美觀.

清糕行動 - XO醬炒蘿蔔糕

話咁快個農曆年長假就黎到最後一日啦, 聽日又要返工啦!!

見屋企 D自家製蘿蔔糕仲未食晒, 趁今日喺屋企就拿拿臨食埋去.  我用左 XO醬黎炒, 都好野味架, 唔洗成日都係就咁煎咁悶嘛.

XO醬炒蘿蔔糕

材料:
蘿蔔糕

做法:
1.  蘿蔔糕切粒, 落鑊炒至金黃, 加 XO醬略炒.  即成.

情人節@小肥羊

年初一情人節嗰日, 我同 honey去左小肥羊慶祝.  今次應該係我地第二次情人節去小肥羊啦, 因為食西餐多數好多人, 又貴, 無謂啦.  當日小肥羊唔係好 full喎, 又唔趕, 可以慢慢食, 食到好飽呀!  小肥羊個清湯底真係好正呀!  兩個人食左 300蚊, 哩個情人節餐都算抵啦!

小肥羊
尖沙咀金巴利道26號1樓
Tel: 2722 7633
http://www.openrice.com/restaurant/sr2.htm?shopid=13085

白朱古力榛子

初二唔洗拜年, 去完外家食開年飯就返屋企 hea, 冇咩野做無無聊聊就練習下之前學嘅朱古力榛子.  唉, 原來上堂學同喺屋企自己整真係好唔同.  今次用左白朱古力整, 上面 D朱古力裝飾真係好難唧, 可能天氣又凍, 好快個唧咀 D朱古力就凝固左, 好難唧, 梗加唔好話要靚啦.  不過都算整到啦!!

白朱古力榛子 (食譜參考自二德惠朱古力糖班)

材料: (分量大約有20粒白朱古力榛子)
原粒榛子 60粒
紗糖 大約4湯匙
白朱古力

做法:
1.  先將榛子放入焗爐150度焗12分鐘, 放涼去衣, 備用.
2.  枱面準備一張焗爐紙, 塗橄欖油.
3.  紗糖白鑊細火煮至完全溶解, 期間不停攪拌, 變至焦糖色, 微滾, 即熄火.
4.  倒入榛子快手拌勻.
5.  趁熱將焦糖榛子放在已塗油的焗爐紙上.
6.  雙手塗油, 快手將每 3粒榛子黏在一起分為一份, 過程要快.
7.  白朱古力隔熱水座溶.
8.  待白朱古力微涼, 將一份份焦糖榛子續一沾上白朱古力溶液.
9.  唧上朱古力作裝飾, 即成.

小貼士:
1.  焦糖榛子要趁熱快手分為一份份, 冷卻後很難黏在一起.  小心燙手.
2.  分量只是約數, 請自行調較.

虎年第一記

岩岩踏入虎年啦, 恭喜發財, 希望大家心想事成!!  今年好特別呀, 大年初一亦都係情人節, 所以都祝大家情人節快樂, 同另一半甜甜蜜蜜.


今日我好忙呀, 忙住最後衝刺整蘿蔔糕, 足足整左 3底呀!  去完奶奶屋企做節返黎, 就要準備我地個情人節蛋糕.  今次我整左藍莓芝士凍餅, 不過岩岩先整起, 仲喺雪櫃呀, 遲 D先影相啦!!


今年過年我覺得特別有氣氛呀, 唔知係咪因為結左婚呢, 舊年過年前忙結婚, 之後又去左 honeymoon, 咩都冇搞, 今年就真係有辦下年貨, 大掃除, 整下糕, 買定禮物去拜年, 自己寫揮春, 仲有洗左碌油葉添... 舊年我同 honey都好黑仔呀, 希望新一年事事順利啦.


恭喜恭喜!

所托非人

終於等到放新年長假啦, 初九先開工呀!!

今晚外家做節, 我負責整一味鮑汁花膠海参冬菇鮑螺炆鵝掌, 聽個名就知正啦, 諗住整好就拎埋過媽咪嗰邊食.  我尋晚已經開始炆架啦, 真係搞左一日一夜架, 仲好香, 聞到都好想食架... 點知.... 臨埋尾, 衰左... 因為我所托非人, 我叫 honey幫我睇火, 然後落街修甲, 點知就出事啦, 我返黎一出 lift, 就聞到一陣燶味, 已經心感不妙, 果然.... 我煲香噴噴嘅餸.. 燶左.  真係好激氣呀, 晒左我一番心機, 仲要媽咪臨時加多一樣餸添呀!

Anyway啦, 今晚餐團年飯食得好開心!!

伯爵紅茶檸檬慕士蛋糕 by QQ

QQ整左個伯爵紅茶檸檬慕士蛋糕俾我地試, 清清地, 幾好味喎!  如果個蛋糕再鬆軟 D, 咁就 very good 啦!

學朱古力記

今日我出左灣仔 3次, 真係攰死人, 因為我要幫我個麻煩老闆做佢 D私人野.  一早要我去幫佢搞越南 visa, 返到公司都未坐定, 又叫我去入境處幫佢延長佢同佢個仔嘅留港簽證... 老實講, 我真係唔係幾願意做架, 不過唔同 say no 咩, 佢仲問我介唔介意, 真係 "啤"一聲囉, 唔同我話介意咩 ~~~ 老闆!!!!!


期間有個小插曲, 話說我上的士嘅時候, 見到座位上面有部電話, 我咪同司機大佬講囉, 佢就好勞氣咁話 D客好唔小心, 我就提議不如我幫佢拎番個電話返去啦, 佢個客應該都係喺我公司附近返工, 咁佢梗係話好啦, 唔洗佢又揸番架車返去搵個客嘛.  之後電話嘅主人打黎, 我咪約佢俾番部電話佢囉... 件事就係咁啦, 我都算做左件好事啦.


放左工, 我同朋友 W小姐一齊去二德惠學整朱古力, 好開心呀, 我想學整好耐架啦, 上網睇 D食譜, 睇黎睇去都唔係好明點整, 真係要親自去學先識架.  今日教整 3款朱古力, 分別係軟心朱古力, 榛子朱古力同埋酒心朱古力. 

整野食真係開心, 之前返工 D唔開心野都唔記得 lu.

二德惠
課程名稱: 朱古力糖
導師: Ken Law
http://www.twinsco.com/

沙爹小雞翼

今日上左全日 training, 不過覺得都幾好, 星期一通常都冇咩 mood做野, 而且一路上 training, 一路都可以上網同 msn.

今晚整左沙爹小雞翼, 我覺得家樂牌沙爹醬麻麻地, 偏甜同好重嘅花生醬味, 聽講利川好好味, 希望快 D食晒屋企個樽可以試下利川啦.

沙爹小雞翼

材料:
雞翼, 甘荀, 洋蔥

醃料:
沙爹醬, 雞粉, 胡椒粉, 生粉, 麻油

調味料:
水, 生抽, 老抽, 糖, 沙爹醬

做法:
1.  雞翼加少許檸檬汁, 10分鐘後清洗, 一開二.  甘荀切件, 洋蔥切絲, 備用.
2.  雞翼用醃料略醃.
3.  洋蔥落鑊炒熟, 加洋蔥炒香, 盛起.
4.  雞翼略煎, 下甘荀和洋蔥同炒.
5.  加調味料, 待至收水, 加少許酒, 即成.

小貼士:
1.  雞翼洗前加少許檸檬汁, 可去雪味, 或於醃料加薑汁也可.
2.  不同牌子沙爹醬的味道都有不同, 請試味後再自行調味.

超正小籠包@上海婆婆

今日好大雨呀.  下個星期日就係大年初一啦, 今個 weekend 好忙咁要買定 D 糖果同禮物, 又大雨, 真係好鬼狼狽呀!!

今晚我同 honey 去左上海婆婆度食 dinner 呀, 好掛住 D 小籠包呀, 我地每人食左 4隻咁多, 仲有食左好鬼辣嘅麻辣粉皮, 宋嫂魚羹, 外婆紅燒肉...  不過最好味都係小籠包, 真係超級推介呀, 埋單 200蚊多 D.  最衰就係冇得訂枱, weekend 都幾多人架.

上海婆婆地址: 將軍澳新都城中心二期二樓2010號舖

一年一度大掃除

今日我同 honey 喺屋企大掃除呀, 好攰呀, 好彩我地平時都算 keep 得乾淨, 如果唔係真係抹到傻呀!!  不過見到屋企抹到乾乾淨淨, 又幾開心既.

今日 Toffee 同 Milka 都要去寵物店沖涼呀, 其實係剃毛先岩, 因為開始天氣潮濕啦, 費時成日有皮膚病啦, 而家當堂靚仔晒.  不過寵物店今日個水制有問題喎, 我地 1 點帶佢地兩隻去, 要夜晚 10 幾先有得走呀. 

今日真係好攰呀!!

魔鬼的引誘

今日都幾準時放工, 見有時間, 就走去書局行下啦, 點知一去, 就俾一本本食譜吸引左, 仲要 85折添呀, 好過份, 想引誘我買, 其實有幾本我真係好想買架, 個心喺度掙扎, 買好定唔買好呢 到最後, 我好忍心咁放低晒, 拿拿臨走啦 .  事實上, 我屋企又真係已經有好多本, 根本有排都未學得晒...

蝦醬西芹炒蝦球

話咁快又過左個 weekend, 真係好想快 D 放農曆年假呀.  今晚餐飯 honey 食得好開心, 因為我滿足左佢 3個願望, 就係 1碟餸有齊佢鐘意食嘅蝦啦, 西芹同埋蝦醬, 佢食到豎起兩隻手指公話好味呀.

蝦醬西芹炒蝦球

材料:
蝦
西芹
甘筍

做法
1.  蝦去殼去腸, 加少許鹽和胡椒粉拌勻, 略醃片刻.
2.  西芹去表面硬皮, 切片.  甘筍切薄片備用.
3.  蝦球落鑊炒至 8成熟, 盛起.
4.  西芹和甘筍片落鑊炒片刻, 加蝦醬及少許糖.  蝦球回鑊, 炒至熟透.  即成.