聖誕印模曲奇

哩一兩個星期都同豐豐一齊整曲奇, 當親子活動, 又有得玩又有得食, 岩岩今次仲整左好多請同學仔食, 大家都好開心.

椰子螺肉雞湯

上星期凍凍地, 煲下椰子雞湯暖下, 買左超市去左殼嘅椰子, 貴少少但方便, 加埋螺肉同瑤柱, 好甜好好飲, 今次用左稻香雞, 煲完啲雞肉仲好滑.

椰子螺肉雞湯

材料: 椰子肉, 急凍螺肉, 雞, 豬展, 紅蘿蔔, 粟米, 瑤柱, 百合, 紅棗(去核), 薑片

做法:
1. 雞, 豬展及螺肉出水; 紅蘿蔔及粟米切段.
2. 將所有材料放入水, 中煲滾15分鐘, 轉中細火煲2小時, 落鹽調味, 即成.

小貼士:
1. 玫瑰煲不宜大火.

臘腸滑雞玫瑰煲仔飯

一年一度嘅大閘蟹季節開始左都一段時間, 到目前為止我食左3轉啦, 今年連豐豐都食埋一份, 不過佢好怪, 唔鐘意食蟹膏, 剩係食蟹腳肉, 哈.  有次喺屋企自己蒸大閘蟹食, 再加個香噴噴煲仔飯, 最後煮多個黑糖薑茶湯圓, 真係大滿足.  第一次用玫瑰煲煮煲仔飯, 完全唔痴底呀.

臘腸滑雞玫瑰煲仔飯


材料: 米, 水, 雞件, 臘腸, 薑絲, 蔥粒

醃料: 生抽, 老抽, 糖, 麻油, 米酒, 胡椒粉, 生粉

調味: 煲仔飯豉油

做法:
1. 雞件用醃料加薑絲醃片刻; 臘腸沖洗抹乾後切片; 米加水浸半小時.
2. 將浸過的米放入玫瑰煲, 加入清水 (分量為一杯米加一杯水), 開中火.
3. 滾起後放入雞件及臘腸, 轉中細火, 蓋上蓋煮20分鐘, 熄火焗10分鐘.
4. 最後加煲仔飯豉油及蔥粒, 即成.

鮮蘑菇忌廉湯

試過朋友整嘅蘑菇湯真係好回味, 終於自己都跟utube學整, 真係好好味, 出面嘅餐廳都未必飲到咁濃郁嘅蘑菇湯, 仲要係鮮蘑菇添, 飲過之後唔想再飲罐頭忌廉湯啦haha.

鮮蘑菇忌廉湯

材料: 白蘑菇, 牛油, 洋蔥, 檸檬汁, 麵粉, 淡忌廉, 雞湯, 水

調味: 鹽, mixed pepper

做法:
1. 白蘑菇洗淨後分開蘑菇'頂'備用, 蘑菇切薄片; 洋蔥切薄圈.
2. 先落牛油煮溶, 加蘑菇片及檸檬汁, 煮熟後盛起留汁.
3. 將蘑菇'頂'及洋蔥圈加入汁料中, 煮至洋蔥變軟, 加入麵粉快手攪勻, 加入少許雞湯攪勻, 再加入其餘雞湯及水煮滾.
4. 將(3)放入攪拌機打勻, 再倒回煲中, 加入蘑菇片煮滾, 加調味及忌廉拌勻, 即成.

光波蜜糖香檸燒雞槌

好耐無用光波爐啦, 整燒雞槌梗係要光波啦, 唔怕彈到周圍油, 清洗方便. 

事關哩個餸我已經整左好耐但一直無post, 我都唔記得左用咩醃啦, hahahaha, 其實我不嬲醃野都好求其, 有咩落咩, 剩係記得有用叉燒醬.  先光一面15分鐘, 再反轉光另一面10分鐘左右, 用叉插入最厚肉嘅位無血水出就代表熟晒, 最後塗上檸檬汁加蜜糖, 再光2分鐘, 咁就搞掂啦.

紅螺頭金腿雞湯

喺超市見到芝麻雞$26好抵, 買黎煲湯岩晒, 去晒皮再出水, 煲出黎唔油, 仲好滑添.

紅螺頭金腿雞湯

材料: 紅螺頭乾, 雞, 瘦肉, 紅蘿蔔, 粟米, 淮山, 茨實, 金華火腿, 蜜棗, 瑤柱, 薑片

做法:
1. 瘦肉及雞出水; 紅蘿蔔刨皮切件; 粟米切段; 紅螺頭浸軟; 淮山及茨實浸水數次.
2. 水滾放入所有材料, 中火煲30分鐘, 轉慢火再煲1.5小時, 落鹽調味, 即成.

小貼士:
1. 玫瑰煲不宜大火.

茶樹菇鱆魚蠔是湯

已經好耐無煲湯煮飯, 原因屋企前排出現好多小強, 搞到我無心機煮野, 最重要係我唔敢去搞啲煲, 好驚有小強彈出黎, 後來搵咗滅蟲公司上門殺小強, 暫時兩星期都無再見到生勾勾嘅小強出沒, 安落晒, 又可以再戰廚房啦.  玫瑰煲真係好鎖水, 以前用不锈鋼煲好快無晒水, 要不停加水, 玫瑰煲完全係哩個問題, 好正.

茶樹菇鱆魚蠔是湯

材料: 茶樹菇, 鱆魚, 蠔是, 紅蘿蔔, 粟米, 花膠仔, 豬展骨, 南北杏, 蜜棗, 薑片

做法:
1. 豬展骨出水; 茶樹菇浸水及換水數次; 花膠仔及鱆魚浸軟; 紅蘿蔔刨皮切件; 粟米切段.
2. 水滾放入所有材料, 中火煲30分鐘, 轉小火再煲1.5小時, 落鹽調味, 即成.

小貼士:
1. 玫瑰煲不宜大火.  

蒜茸辣椒醬煮蜆

簡簡單單用蒜茸辣椒醬同豆瓣醬煮蜆原來已經好好味.  不過因為用玫瑰煲, 驚蜆殼刮花個煲, 所以盡量輕手.
  

蒜茸辣椒醬煮蜆
 
材料: 蜆, 薑片

調味:  蒜茸辣椒醬, 豆瓣醬, 雞粉, 糖

做法:
1. 蜆用水略浸.
2. 開爐放薑片及蜆, 加少許水, 蓋上蓋煮至蜆打開, 加入調味拌勻, 即成.

天麻首烏魚頭湯

聽聞天麻對頭痛好有幫助, 雖然我係頭暈唔係頭痛(哈哈), 都不況一試, 加上見中醫開俾我嘅中藥都有天麻, 問佢話岩我食, 就試下煲天麻魚頭湯, 跟樓上嘅食譜煲, 都幾好飲喎.

幼稚園10週年慶典 - K1

時間過得好快, 咁快K1就完結啦, 今年係天主教聖安德肋幼稚園10週年生日,我地參加咗祈禱慶典, 因為baba作嘅標語設計得到季軍, 豐豐仲有機會領獎添.  哩個慶典令我覺得哩間幼稚園真係好用心教小朋友, 我好慶幸豐豐喺哩間幼稚園讀書, 哩一年豐豐學到好多野, 學識祈禱, 老師各方面都教得好好, 小朋友每天都開心咁學習, 校長友善, 姐姐又愛錫小朋友, 豐豐每日都會同我講好多學校發生嘅事, 感恩豐豐可以喺哩個天主嘅大家庭裡成長.

 

新加坡(+馬來西亞)之旅 - 3歲8個月

第2次帶豐豐搭飛機去旅行, 比起上年去台灣, 今次豐豐應該覺得更開心, 因為大部份活動都好岩佢玩, 新加坡係好熱, 但我覺得比香港還好, 我地好好彩, 去4日都無落過雨, 乾熱點都好過香港濕熱咁辛苦. 帶小朋友去旅行, 新加坡確實係個值得推介嘅地方.

Day 1: 魚尾獅, Singapore Flyer

Day 2: Legoland, The Little Big Club

Day 3: Singapore Zoo, Garden By The Bay, 珍寶

 

 

Day 4: 牛車水

泰式紅咖喱雞翼

老公前幾個月去曼谷出差, 買左好多Blue Elephant咖哩返黎俾我, 我試整左紅咖哩, 真係好食, 唔算太辣, 豐豐都食左兩隻雞翼.

麻辣鮑魚雞煲

我好鐘意食麻辣架, 食完出身汗好爽, 近年興食雞煲, 我都有試煮, 但要比較多調味料, 朋友介紹一包麻辣醬, 又簡單又好好味, 用玫瑰煲煮仲唔怕痴底, 成煲上, 食完又易洗.

麻辣鮑魚雞煲

材料: 雞件, 新鮮鮑魚, 芹菜, 蒜頭, 辣椒, 薑片

調味: 麻辣雞醬, 花椒油

做法:
1. 鮑魚去殼, 刷洗乾淨; 芹菜洗淨切段, 分開莖及葉.
2. 先爆香薑片及蒜頭, 加雞件炒至5成熟.
3. 加入辣椒, 芹菜莖, 麻辣雞醬及花椒油, 炒勻, 加入少少水, 炆至雞件差不多熟透.
4. 加入鮑魚, 煮約7分鐘, 加入芹菜葉略兜.  即成.

小貼士:
1. 鮑魚不能煮得過久, 會變老.

腐竹薏米雞蛋糖水

好耐無出post, 先post番個腐竹薏米雞蛋糖水潤下先. 

腐竹薏米雞蛋糖水

材料: 蛋, 腐竹, 白果 (我懶, 買現成已去殼去衣的白果), 薏米, 冰糖

做法:

1. 蛋放室溫, 凍水落, 加少許白醋, 煮至半熟, 放入凍水待涼後去殼備用.
2. 開一煲水, 將一半腐竹撕成小塊凍水落, 水滾放入剩餘腐竹, 白果及薏米, 慢火煲約半小時, 最後加冰糖及蛋, 即成.

小貼士:
1. 我鐘意腐竹唔會完全溶晒, 所以一半凍水落, 一半水滾先落.

芝士蕃茄豬柳飯, 花膠螺頭雞湯, 上湯豆苗

搭朋友買左兩個Chef Topf La Rose韓國玫瑰煲, 超好用, 又易洗.  尋日整左芝士蕃茄豬柳飯, 由煎豬柳至炒蛋炒飯完全唔洗落油, 又唔痴底又可以免油, 好正.  加多煲花膠螺頭雞湯同上湯豆苗, 已經夠晒豐富啦.

芝士蕃茄豬柳飯

材料: 豬柳, 白飯, 蕃茄, 洋蔥, 雞蛋, 罐頭蕃茄濃湯, 芝士碎

醃料:  生抽, 糖, 胡椒粉, 生粉, 味醂, 少許油

做法:
1. 醃好豬柳; 蕃茄及洋蔥切件.
2. 分別煎熟豬柳及爆香蕃茄洋蔥, 盛起.
3. 先炒蛋, 半熟後加入白飯炒至均勻, 可適量加入水, 之後加入洋蔥及蕃茄, 將罐頭蕃茄濃湯加入少量滾水攪勻, 將部份蕃茄汁淋在飯上炒勻.
4. 放上豬柳, 再淋上其餘蕃茄汁, 灑上芝士碎, 蓋著焗數分鐘, 即成.

花膠螺頭雞湯

材料: 花膠 (已發), 螺頭, 雞, 豬展, 紅棗, 圓肉, 淮山, 紅蘿蔔, 薑片

做法:
1.  雞及豬展出水; 螺頭去腸及出水; 紅蘿蔔刨皮切件.
2.  水滾放入所有材料, 大火滾30分鐘, 轉慢火再煲1.5小時, 落鹽調味.  即成. 

QQ芝士波

哩排好懶寫blog, hehe.  等我post番之前整嘅QQ芝士波先, 我用預伴粉整, 好簡易, 第一次整第一次食QQ波, 原來好好味架, 岩岩出爐外脆內軟, 我同豐豐食到停唔到口, 過氣左之後雖然唔再脆, 似麵包, 但都仲好味架.

粟米斑塊

粟米斑塊

材料: 急凍斑柳, 罐頭粟米湯

醃料: 胡椒粉, 鹽, 生粉, 蛋液
 
做法:
1. 急凍斑柳解凍, 切件, 吸乾水份, 用胡椒粉及鹽略醃, 之後撲上生粉.
2. 燒滾油, 斑塊沾上蛋液, 放入油半煎炸至金黃色, 盛起, 用廁紙吸油.
3. 另煮滾粟米湯, 可同時加入剩餘蛋液, 淋在斑塊上, 即成.

情人節餐之朱古力慕斯杯

情人節餐最滿意嘅係甜品朱古力慕斯杯, 令整個晚餐劃上完美嘅句號, 呵呵.

朱古力慕斯杯

材料: 淡忌廉 30g, 朱古力 60g, 咖啡酒 1湯匙, 淡忌廉 150g, 魚膠粉 3g, 水 30g

做法:
1.  30g淡忌廉加朱古力隔熱水坐溶, 加咖啡酒拌勻.
2.  魚膠粉加水開溶, 隔熱水坐溶至完成溶開.
3.  150g淡忌廉打至 8成.
4.  加入朱古力溶液和魚膠水, 拌勻.
5.  倒入甜品杯, 放入雪櫃雪至凝固, 灑上可可粉後加裝飾.

小貼士:
1. 可用rum酒或其他酒代替咖啡酒.

情人節餐之煎鵝肝脆多士

情人節餐之一嘅鵝肝, 係第一次煎, 好驚兩塊鵝肝俾我煎溶咗, 好彩都幾成功, 本來想買法包, 點知行咗幾間麵包舖都無得賣, 最後買左袋法式小多士, 返黎再烘脆, 我鐘意鵝肝配多士, 好正.

煎鵝肝脆多士

材料: 急凍鵝肝, 多士

做法:
1. 多士烘至脆.
2. 慢火煎鵝肝至兩邊金黃, 放在多士上享用.

小貼士:
1. 不用落油, 因為鵝肝會一直出油.
2. 不要煎得太耐, 否則鵝肝會溶, 兩邊約2分鐘就足夠.

我買咗哩隻法國急凍鵝肝.

2014情人節遇上元宵

今日係一年一度嘅情人節, 遇岩19年先同一日嘅元宵佳節, 不但止, 元宵節亦係我地拍拖紀念日, 真係應該好好慶祝.  我地無出去食, 選擇留喺屋企一家三口一齊過. 

祝大家情人節快樂!























P.S. 係咪好奇怪得兩份食物呢? 哈哈, 因為放工返黎先煮, 煮得黎都夜啦, 豐豐一早食左啦.
 

鮮人蔘煲雞

老公一向好鐘意人蔘雞湯, 見超市成日有韓國鮮人蔘賣, 就買黎自己試下, 我落左兩包共4條去煲, 用左原隻雞, 因為無落肉, 我怕唔夠味, 就加左啲清雞湯, 唔洗再落鹽, 煲出黎都有蔘味, 啲雞肉仲好滑添.

鮮人蔘煲雞

材料: 雞, 鮮人蔘, 糯米, 無核紅棗, 元肉, 元貝, 清雞湯, 薑片, 蒜頭

做法:
1. 糯米用水浸3小時, 洗淨; 雞出水; 其他材料洗淨.
2. 將糯米, 薑片及蒜頭放入雞肚內.
2. 清雞湯加水煲滾, 加入所有材料, 大火煲30分鐘, 轉慢火再煲1.5小時, 即成.

檸檬鬆餅

工展會時買左好幾盒美玫牌鬆餅預伴粉, 試左盒原味, 用黎整檸檬鬆餅, 效果唔錯喎, 又簡單又好味.

檸檬鬆餅

材料: 
原味預伴粉一包250g
蛋1隻
水65g
牛油65g
檸檬半個

做法:
1. 刨少許檸檬皮成茸, 另揸檸檬汁備用.
2. 蛋回室溫; 牛油隔熱水坐溶; 焗爐180度預熱; 鬆餅杯塗上油.
3. 將預伴粉加入水及牛油打勻, 加入檸檬皮及檸檬汁拌勻, 最後加入蛋液快手打勻.
4. 將蛋糕漿倒入鬆餅杯至8成滿.
5. 放入焗爐180度焗約25分鐘.

小貼士:
1. 用牙簽插入蛋糕中央如沒有沾上粉漿即表示熟透. 

關東煮

關東煮係日本人嘅一種料理, 台灣都好流行, 而家7-11都見有得賣, 今次試自己煮, 雖然多步驟, 但真係好味, 關東煮無指定材料, 自己鐘意食咩就加咩, 不過蘿蔔非落不可, 入晒味好正架, 我煮左一大煲湯底, 剩番用黎打邊爐, yummy!

關東煮

湯底材料: 昆布, 木魚花, 水, 醬油, 糖, 味醂, 米酒

其他材料: 蘿蔔, 炸魚蛋, 獅子狗卷, 乾豆腐等

做法:
1. 先煮蘿蔔, 蘿蔔去皮切件, 放入滾水煮熟, 盛起沖凍水備用.
2. 然後準備湯底, 昆布加入凍水, 慢火煮至微滾, 熄火, 撈起昆布, 時間約10分鐘.
3. 加入木魚花, 開火煮至滾即熄火, 待木魚花沉底就撈起.
4. 加入醬油, 糖, 味醂, 米酒煮滾, 先加入需要吸味的食材如蘿蔔及乾豆腐, 然後加入其他食材, 煮至熟, 即成.

小貼士:
1. 昆布不宜煮太久, 煮得太久粘液會煮出來.
2. 木魚同樣不宜煮太久, 會煮出腥味, 加入米酒可去除腥味, 也可用清酒代替.

 

醉乳鴿

臨過年前整左醉乳鴿俾自己歎, 哈哈, 好味.  雖然我只係用現成醉雞汁, 但我覺得都夠味呀.

醉乳鴿

材料: 急凍乳鴿, 薑片, 杞子

醃料: 雞粉, 醉雞汁

做法:
1. 乳鴿清洗乾淨, 抹乾, 雞粉均勻塗在乳鴿外面及內面, 略醃一會.
2. 薑片放在乳鴿上, 隔水蒸約20分鐘或至熟透.
3. 將乳鴿放入凍滾水沖洗.
4. 杞子用熱水略浸, 盛起備用.
5. 將乳鴿切件放入保鮮盒內, 加入醉雞汁至完全蓋過乳鴿, 加入杞子, 放入雪櫃雪最少數小時, 即成.

去蛇迎馬

又一年啦, 過去嘅蛇年我嘅事業好反覆, 遇到低潮, 但好快又有高潮, 慶幸年尾時搵到一份好工, 公司好, 老闆好, 人工又幾好, 真係好開心呀, 希望馬年一切順利, 事事如意, 最緊要健健康康啦!


尋日係立春, 一起身就見到由種子開始種嘅百合開花呀, 好靚呀, 希望寓意今年花開富貴啦.

菜乾鴨腎豬展骨湯, 香煎鱈魚扒

前排去南丫島玩順道買左包菜乾煲湯, 幾好喎, 無沙, 啲湯又唔會好深色, 煲出黎都好清, 應該係靚菜乾. 


另外, 我今次終於煎到我覺得見得人嘅鱈魚扒啦, 重點係要忍手, 煎好一邊先好反去另一邊, 咁就會好靚仔唔會散晒架啦.

菜乾鴨腎豬展骨湯


材料: 菜乾, 鴨腎乾, 蜜棗, 元貝, 紅蘿蔔, 豬展骨, 南北杏, 薑片

做法:
1.  菜乾浸軟洗淨; 紅蘿蔔刨皮切件; 豬展骨出水; 其他沖洗乾淨.
2.  凍水落菜乾及所有材料, 大火煲20-30分鐘, 轉慢火再煲1.5小時, 落鹽調味, 即成.

小貼士:
1. 有雜貨舖老闆教我煲菜乾要凍水落, 我唔知點解, 總之照跟啦, 哈哈.

香煎鱈魚扒

材料: 鱈魚扒

調味: 蒜鹽, 胡椒粉, 生粉

做法:
1. 鱈魚扒洗淨抹乾, 用蒜鹽及胡椒粉略醃.
2. 鱈魚扒兩邊沾上生粉, 先將一面煎至金黃, 再反轉煎另一面至金黃, 即成.

栗子螺頭湯

朋友介紹我加栗子同螺頭一齊煲湯, 果然好甜, 明明食到好飽都忍唔住飲番幾碗.

栗子螺頭湯


材料: 栗子肉 (去殼去衣), 急凍螺頭, 豬展骨, 無花果, 紅蘿蔔, 元貝, 薑片

做法:
1. 急凍螺頭解凍, 去腸, 加薑片出水; 豬展骨出水; 紅蘿蔔刨皮切伴.
2. 水滾放入所有材料, 大火煲20-30分鐘, 轉慢火再煲1.5小時, 落鹽調味, 即成.

無花果淮山茨實螺頭湯

買左急凍螺頭煲湯, 個湯勁鮮甜, 豐豐都飲一大碗.

無花果淮山茨實螺頭湯


材料: 無花果, 淮山, 茨實, 急凍螺頭, 豬展骨, 元貝, 紅蘿蔔, 薑片

做法:
1. 豬展骨出水; 螺頭解凍, 去腸, 加薑片出水; 紅蘿蔔刨皮切件; 其他沖洗備用.
2. 水滾放入所有材料, 大火煲30分鐘, 放入真空煲數小時, 飲前大火煲滾, 落鹽調味, 即成.