瑤柱雞粥, 肉絲炒烏冬

上星期返工唔開心, 本來諗住 weekend寫 blog要寫低, 但係發覺已經唔係好值得再記低, 我真係好希望自己 EQ高啲, 唔好成日為左啲無謂嘅人同事而唔開心.

尋日煲瑤柱雞粥同埋肉絲炒烏冬, 炒烏冬食到老公 lam lam咀

南瓜洋蔥肉碎粥

今日煮南瓜洋蔥肉碎粥俾豐豐食, 南瓜粥真係好甜, 就算唔落鹽都好味, 我忍唔住都偷食左幾啖 不過一定要係圓形南瓜是甜, 長形嗰隻係冇咩味架, 加埋洋蔥, 剩係煮緊嘅時候已經成間屋香噴噴啦.

花膠螺頭燉雞湯, 火腿上湯浸娃娃菜, 白酒煮藍青口

尋日豐豐去完打1歲針, 夜晚比平時扭計左好多, 又瞓得唔好, 唔知會唔會發燒添

周末晚餐: 花膠螺頭燉雞湯, 火腿上湯浸娃娃菜, 白酒煮藍青口.  第一次煮藍青口, 加埋白酒同忌廉煮, 好好味, 又好簡單.

白酒煮藍青口

材料: 急凍藍青口, 白酒, 忌廉, 蒜茸, 牛油

做法:
1. 牛油下鑊煮溶, 加入蒜茸炒香, 之後加入藍青口, 白酒及忌廉略炒, CUP蓋焗數分鐘至青口打開.  即成.

火腿上湯浸娃娃菜

材料: 金華火腿, 娃娃菜, 上湯

做法:
1. 金華火腿切絲備用.
2. 先煲滾上湯, 加金華火腿煮數分鐘, 加娃娃菜及少許油, 煮至菜林.  即成.

花膠螺頭燉雞湯

材料: 花膠 (已發), 螺頭, 雞, 豬展, 金華火腿片, 紅棗, 圓肉, 薑片

做法:
1.  雞及豬展出水.  螺頭去腸及出水.
2.  將所有材料放入電子燉盎, 加入滾水, 燉 3小時, 落鹽調味.  即成.

西蘭花洋蔥肉碎 ABC粉

終於都係要將個 blog升級, 新嘅環境仲未慣, 要慢慢適應.

尋日係我牛一, 不過老公要去飲, 冇慶祝呀, 同平時一樣咁過.  我發現自己過左某個年紀之後, 好似失憶咁, 成日唔記得自己其實幾多歲, 哈哈!

今日放假, 唔明點解一放假樓上樓下梗有人裝修, 激死.  整左西蘭花洋蔥肉碎 ABC粉, 等豐豐起身食 lunch, 之後出去同婆婆歎下午茶, yeah!

豐豐的第一個生日小派對

仲有幾日, 我個寶貝仔就 1歲啦, 尋日我地幫佢搞左個小型派對, 邀請左屋企人同契媽佢地一齊黎幫豐豐預祝佢嘅第一個生日.  成個 party由裝飾到食物差唔多都係我準備架, 希望大家食得開心, 玩得開心啦! 

豐豐, 媽咪為左你個生日會放左好多心思, 雖然你大個左可能對哩個生日會冇咩印象, 不過希望好多年之後, 當你睇番啲相, 你都一樣覺得好開心啦.  I love you!

瑞士雞脾飯配蒜茸炒翠玉瓜, 花膠雞湯

上星期工作有啲唔開心, 充滿負能量, 好彩意料之外打 8號風球, 有一日假期, 真係開心!  唔洗返工, 我喺屋企自製蒜茸, 呵呵!

星期五得我一個喺屋企咋, 老公返左鄉下, 我約左舊同事食 dinner驚夜就冇接豐豐返黎, 難得一晚自由時候, 其實真係好 free架, 不過當上床瞓覺嘅時候又有少少失落, 阿仔唔喺身邊好空虛咁, 當時我諗, 唔知細個我第一次去 camp冇返屋企瞓, 媽咪係咪都有同一樣嘅感受呢?

周末食譜: 瑞士雞脾飯配蒜茸炒翠玉瓜, 花膠雞湯

花膠雞湯

材料: 花膠 (已浸發), 雞, 豬展, 紅蘿蔔, 粟米, 圓肉, 紅棗, 薑片

做法:
1. 雞及豬展出水; 紅蘿蔔刨皮切件; 粟米切段; 花膠切件; 圓肉紅棗洗淨.
2. 水滾後放入所有材料, 大火煲 30分鐘, 放入真空煲, 飲前再大火煲 15分鐘, 落鹽調味.  即成.

自家製蒜茸

材料: 蒜頭, 生油

做法:
1. 蒜頭去衣, 放入攪拌機攪成茸.
2. 加入生油拌勻, 生油需完全蓋過蒜茸.3. 放入雪櫃儲存.