Honey有個好朋友今日結婚呀, 祝對新人執子之手, 與子皆老.
Honey今日一早要起身去做兄弟, 所以尋晚好早就去瞓啦, 我又瞓唔著, 於是哩埋喺被竇用 iphone睇番我地兩年前去北海道同東京 honeymoon D相, 真係好懷念好想再去呀, 不過而家 D yen真係太高啦, 睇怕有排都唔可以再去 lu.
因為今晚我地一家 3口要去飲呀, 所以尋日冇去街, 喺屋企煮飯仔煲碟. 尋晚煮左韓式金沙骨, 照燒鯖魚, 合掌瓜鱆魚雞腳湯. 我今次用左現成醃醬, 真係好方便, 仲好好味添.
韓式金沙骨
材料: 金沙骨, 李錦記韓式醃醬
做法:
1. 金沙骨用韓式醃醬醃數小時.
2. 用平底鑊煎熟金沙骨.
3. 剩餘醃醬加少少水, 倒入金沙骨拌勻. 即成.
照燒鯖魚
材料: 急凍鯖魚柳, 李錦記照燒醃醬, 薑汁
做法:
1. 鯖魚加入薑汁及照燒醃醬醃一小時.
2. 焗盤鋪上錫紙, 灑上少許油, 焗爐預熱 180度.
3. 將鯖魚皮向上放上焗盤, 入爐焗 25分鐘. 即成.
小貼士:
1. 薑汁可將薑磨成茸, 再用手揸出薑汁.
2. 我用 200度焗 20分鐘, 魚皮有點過燶, 用 180度焗 25分鐘應該比較好.
合掌瓜鱆魚雞腳湯
材料: 合掌瓜, 鱆魚乾, 雞腳, 豬展骨, 南北杏, 薑片
做法:
1. 合掌瓜刨皮切件, 鱆魚乾用水浸軟, 豬展骨及雞腳出水.
2. 將所有材料放入水, 大滾後轉慢火煲 2小時, 落鹽調味. 即成.
喺公司做到嬲嬲地, 食下岩岩買嘅品客蜜糖芥末味薯片 relax下, 真係超好味, 食到我停唔到口, 要試就快手啦, 期間限定黎架.
有朋自遠方來, 不亦樂乎, 壽生兩公婆帶埋對仔女返左黎香港, gathering好開心, 而家影大合照真係好大棚人呀, 哈哈!
有個好朋友近排唔開心呀, 我地旁觀者冇野可以幫到佢, 不過希望佢知道, 我地好支持佢架, 要加油呀!!!
Honey話而家出面食飯好貴呀, 又唔健康, 佢又想帶飯返工食, 於是我尋晚就煮左 D方便帶飯嘅餸, 有豆醬炆雞, 豆瓣醬翠玉瓜炒豬頸肉, 再加胡椒花甲粉絲湯. 估唔到豆醬炆雞係咁好味架.
豆醬炆雞
材料: 雞一隻斬件, 薑一片
調味: 普寧豆醬, 胡椒粉, 糖, 老抽, 水
做法:
1. 先落薑片起鑊, 再落雞件略炒.
2. 加水至蓋過雞, 再加其他調味.
3. 收慢火炆至收水. 即成.
豆瓣醬翠玉瓜炒豬頸肉
材料: 翠玉瓜, 豬頸肉片
醃料: 生抽, 老抽, 胡椒粉, 糖, 油, 麻油, 生粉
做法:
1. 翠玉瓜刨皮切片, 豬頸肉加醃料略醃, 煮前加少少水拌勻.
2. 先煎豬頸肉至 8成熟, 加翠玉瓜, 豆瓣醬及雞粉快炒. 即成.
小貼士:
1. 翠玉瓜易出水, 快炒數下就可以盛起.
胡椒花甲粉絲湯
材料: 花甲, 粉絲, 薑兩片, 白胡椒
做法:
1. 花甲用水加鹽浸令其吐沙, 備用. 粉絲用水浸軟. 白胡椒盎爛.
2. 水加鹽, 薑片及白胡椒碎煲滾.
2. 加花甲, 煲至開口, 加粉絲, 數分鐘後熄火. 即成.
小貼士:
1. 白胡椒盎爛可以令其更出味.
豐豐已經 4個月啦, 試食過幾次糊仔, 有時可以自己坐一陣, 不過好快就會 "臨"左, 瞓喺床上面會想轉身. 每晚大約10點左右就飲奶奶瞓覺, 一覺瞓到天光, 有時仲要叫佢起身添. 而家識得揸住 D玩具玩, 又成日伸條脷出黎玩, 食手仔, 流好多口水. 前幾日去健康院, 而家有 7.85kg, 姑娘話係大 B, 不過都係合格 
今年 2月14情人節, 我地一如以往都係揀食中菜, 因為唔洗同人迫, 又唔洗迫住食 D貴夾唔飽嘅套餐. 今年近近地去左東海食, 食完去埋聰嫂度食甜品都只係 9點左右, 唔洗咁夜返去揍豐豐嘛.
我地嘅情人節晚餐好豐富呀:
山珍佛跳牆
沙薑焗聖子
蒜茸焗開邊龍蝦仔
片皮鴨
龍眼豆腐花 / 龍眼椰果冰 @聰嫂私房甜品
東海海鮮酒家
地址: 將軍澳貿業路8號新都城中心三期商場一樓137舖
Tel: 2367 1136
聰嫂私房甜品
地址: 將軍澳運亨路1號新都城第一期地下G28舖
Tel: 2706 9955
情人節快樂!!!! 祝有情人天天都咁溫馨, 冇情人繼續享受單身嘅幸福!
聽到身邊有朋友, 花左好多心思送禮物俾對方, 真係好感動呀, 希望你地嘅另一半會體會到你地嘅心意啦.
尋日我同 QQ已經一齊整左朱古力同埋蛋糕, 有橘子茶玫瑰花朱古力, 心型熱情果紅桑子脆脆朱古力同埋我最拿手嘅 mini意大利朱古力蛋糕, 原來調溫朱古力都幾複雜架, 我下次都係整番免調溫朱古力算啦 hoho, 其實免調溫朱古力都一樣好好味架. 暫時唔好問我調溫朱古力點整, 因為我都好亂, wakaka, 意大利朱古力蛋糕就可以參巧 <意大利朱古力蛋糕>
今晚會飛起豐豐同 honey去撐枱腳 hehe.
今日係豐豐 4個月大啦!
星期六我帶埋豐豐同朋友食 lunch buffet, 雖然有 D "呢hea", 不過都算冇咩問題, 我仲可以趁豐豐瞓覺覺嘅時候整指甲添, 哈. 閉啦, 我又對新玩意有興趣啦, 又想學玩印花甲呀.
今日天氣好差呀, 又凍又落雨, 本來都唔係好想出街, 不過星期一係情人節, 好想趁機學下調溫朱古力, 所以冒住雨推埋豐豐過去媽咪度, honey就 happy, 可以靜靜地瞓下覺. 今晚好想開住暖爐瞓, 但係又驚豐豐 D皮膚爆拆.
週末食譜: 茶香雞翼, XO醬炒海参, 紅蘿蔔粟米魚唇烏雞湯.
茶香雞翼
材料: 雞翼, 薑 2片
調味: 茶香老抽, 生抽, 雞粉, 糖, 胡椒粉, 麻油, 水
做法:
1. 先落薑片, 再落雞翼略煎兩面.
2. 落水至蓋過雞翼, 再落其餘調味, 炆至雞翼熟透, 即成.
今年要揍住豐豐, 冇時間整蘿蔔糕同年糕, 不過都有人俾糕我地. 尋日年初二去完媽咪度開年就冇節目啦, 返左屋企休息下, 夜晚 honey就煎左 D年糕同蘿蔔糕, 配埋我煲嘅瑤柱白粥當係晚餐, 簡單得黎又好味!
恭喜發財, 祝大家身體健康, 心想事成, 讀緊書嘅學業進步, 做緊野嘅升職加薪 (不過唔好加辛
), 未有拖拍嘅快 D搵到 honey, 拍緊拖嘅甜甜蜜蜜, 想生 BB嘅今年生個兔 B, 有小朋友嘅小朋友就快高長大
今年係豐豐第一個農曆年, 尋日大年初一去左好多地方拜年, 逗左好多利是呀
因為要上車落車又要上落樓梯, 所以唔方便推車仔, 尋日全日都係抱住豐豐, 你知啦, 抱住個超過 16磅嘅 BB真係好攰架, 雖然最主要係 Baba抱, 我只係有幾次抱豐豐瞓覺, 但係我今日對手臂都好酸痛呀. 豐豐尋日去街冇覺好瞓, 尋晚 10點幾瞓到今朝 9點幾呀
