火腿雞絲炒烏冬

天文台講左咁多日話落雨, 今日終於落餐飽.  今晚去完媽咪度食飯返屋企, 要經過一條兩邊都係樹嘅路, 初時見到地下有好多枯葉枯枝都冇理, 後來發現, 原來嗰 D係蟲黎架, 係一條條好似筷子咁長咁粗嘅蟲, 好多條, 好恐怖呀.

講番星期一煮嘅晚餐, 因為都冇咩胃口食飯, 所以都係煮下麵啦, 炒下烏冬都唔錯, 今次係火腿雞絲炒烏冬呀!

五香雞腳

好彩天文台不嬲都唔準, 岩岩過左個 weekend冇落雨, 星期六仲好好天添喎, 真係好. 

上個星期留番左 D五香汁, 加多少少調味再整五香雞腳, 唔好晒嘛!

五香雞脾拼湯烏冬

Honey不嬲都好鐘意五香野, 所以買左兩隻新鮮雞脾整五香雞脾.  星期日晚整定 D雞脾, 浸一日就更入味啦, 第二晚放工返黎, 煮埋烏冬就一餐啦.  D五香汁我留番喺雪櫃, 今個weekend用黎整下其他野.

五香雞脾

材料:
雞脾

調味料:
雞湯, 水, 蔥段, 薑茸, 花椒 1/2茶匙, 八角 2粒, 肉桂皮 1片, 丁香 1/2茶匙, 陳皮 半片, 生抽, 老抽, 糖, 麻油

做法:
1.  將雞湯及水煮滾, 下調味料, 再放入雞脾, 慢火煮至雞脾熟透, 合上蓋, 建議浸過夜會更入味, 食前煮滾.  即成.

BB日誌 - 第6篇

星期一等左成日電話, 希望收到診所打黎話我知 BB個唐氏報告結果, 等左成日都冇, 心諗可能都要第二日先知啦, 點知 4點幾有電話, 來電顯示係診所, 個心真係緊張到跳出黎, 姑娘仲要用個好 cool嘅語氣講, 個結果係 BB有唐氏嘅機會係 ~~ 微, 數字係 3463份之 1.  鬆晒啦, 又過左一關啦.

燒春雞, 肉丁炒飯

星期日要留喺屋企睇大結局, 所以喺屋企食就最好啦.  我第二次整燒春雞啦, $14一隻春雞真係好抵, 焗完出黎又香又脆.  其實醃料我都係是旦落, 不過又幾好味喎.  因為有上次嘅經驗, 焗雞嘅時候我直頭搵張錫紙封住個焗盤, D油就冇彈到周圍都係, 而雞皮竟然都仲卜卜脆喎, good!!  燒春雞配肉丁炒飯, ichiban!

燒春雞

材料:
急凍春雞一隻

醃料:
生抽, 老抽, 糖, 胡椒粉, 黑胡椒粉, 蒜粉, 味椒鹽, 玫瑰露酒, 麻油, 油, 生粉

做法:
1.  雞解凍後用檸檬汁僻去雪味, 清洗乾淨.
2.  用醃料將雞內內外外塗勻, 醃數小時.
3.  焗爐預熱 250度.  焗盤鋪好錫紙.
4.  將雞放上焗盤, 皮向上, 再用另一張錫紙封著焗盤.
5.  入爐 250度焗 45分鐘.  即成.

BB日誌 - 第5篇

今日又去王醫生度照 BB啦, 嘩, BB大隻左好多呀, 而家似個 BB形狀啦, 仲見到 BB手仔 fing fing添, 好開心呀!  今日仲 check埋唐氏, 要等幾日先有結果, 希望一切正常啦 !

BB 而家有 5.91cm長.

鹽燒鯖魚, 乾蔥豆豉雞, 老公白粥

近排好懶, 放左工返到屋企都冇上網, 睇完電視就沉迷玩塞爾達傳說, 今日終於的起心肝 post番 weekend煮嘅野食.  清清雪櫃, 整左鹽燒鯖魚, 乾蔥豆豉雞, 仲有就係老公白粥, 老公白粥唔洗講就係 honey煲嘅潮州粥啦.

BB日誌 - 第4篇

今日一早 9點就去到 QE做產檢啦, 其實第一次都冇咩野做, 只係度高, 抽血同問下問題咁, 唉, 連結構都話 full晒冇得做, 真係唔係好知之後仲有咩好 check囉.

皮蛋酥與蛋黃酥 by QQ

QQ整左皮蛋酥同蛋黃酥, 好勁呀!  不過蛋黃酥好味 D, 皮蛋酥唔夠味.

羅漢果水

哩幾日放假真係好 happy呀, 晚晚又唔洗趕住去瞓, 第二日又可以瞓到自然醒, 好爽呀, 最衰就係天氣唔好啦, 第一日上左山頂, 原來諗住去完杜莎夫人蠟像館, 食埋 Burger King, 就去行下山, 不過落雨, 又凍, 結果都係走左.  第二日約埋班 friend入左 K小姐屋企打邊爐.  尋日原本又 plan左去南丫島行山, 不過好大霧, 又濕都冇去 lu, 真係掃興, 不過算啦, 唔洗返工已經好開心, honey又買左部 NDS俾我, 哩兩日都喺屋企打機.

睇完 <蘇 GOOD>, 知道羅漢果水好有益, 又易煲, 媽咪俾左兩個羅漢果我, 今日見得閒, 煲左一大煲俾 honey當水飲, 佢唔 like飲無味嘅水, 哩個羅漢果水岩晒佢啦.

羅漢果水 (食譜參考自 <蘇 GOOD>)

材料:
羅漢果 2個
水 4公升

做法:
1.  羅漢果略洗, 用手整爛, 放入凍水, 大火煲, 滾起計煲 20分鐘, 待涼.  即成.

小貼士:
1.  靚的羅漢果, 搖它的時候內裡沒有聲嚮, 表面有光澤, 顏色不要太黑.
2.  記得羅漢果一定要凍水落.
3.  待涼後放入雪櫃可保存一個月.