臘腸滑雞玫瑰煲仔飯

一年一度嘅大閘蟹季節開始左都一段時間, 到目前為止我食左3轉啦, 今年連豐豐都食埋一份, 不過佢好怪, 唔鐘意食蟹膏, 剩係食蟹腳肉, 哈.  有次喺屋企自己蒸大閘蟹食, 再加個香噴噴煲仔飯, 最後煮多個黑糖薑茶湯圓, 真係大滿足.  第一次用玫瑰煲煮煲仔飯, 完全唔痴底呀.

臘腸滑雞玫瑰煲仔飯


材料: 米, 水, 雞件, 臘腸, 薑絲, 蔥粒

醃料: 生抽, 老抽, 糖, 麻油, 米酒, 胡椒粉, 生粉

調味: 煲仔飯豉油

做法:
1. 雞件用醃料加薑絲醃片刻; 臘腸沖洗抹乾後切片; 米加水浸半小時.
2. 將浸過的米放入玫瑰煲, 加入清水 (分量為一杯米加一杯水), 開中火.
3. 滾起後放入雞件及臘腸, 轉中細火, 蓋上蓋煮20分鐘, 熄火焗10分鐘.
4. 最後加煲仔飯豉油及蔥粒, 即成.

鮮蘑菇忌廉湯

試過朋友整嘅蘑菇湯真係好回味, 終於自己都跟utube學整, 真係好好味, 出面嘅餐廳都未必飲到咁濃郁嘅蘑菇湯, 仲要係鮮蘑菇添, 飲過之後唔想再飲罐頭忌廉湯啦haha.

鮮蘑菇忌廉湯

材料: 白蘑菇, 牛油, 洋蔥, 檸檬汁, 麵粉, 淡忌廉, 雞湯, 水

調味: 鹽, mixed pepper

做法:
1. 白蘑菇洗淨後分開蘑菇'頂'備用, 蘑菇切薄片; 洋蔥切薄圈.
2. 先落牛油煮溶, 加蘑菇片及檸檬汁, 煮熟後盛起留汁.
3. 將蘑菇'頂'及洋蔥圈加入汁料中, 煮至洋蔥變軟, 加入麵粉快手攪勻, 加入少許雞湯攪勻, 再加入其餘雞湯及水煮滾.
4. 將(3)放入攪拌機打勻, 再倒回煲中, 加入蘑菇片煮滾, 加調味及忌廉拌勻, 即成.