印象中好似都好多年未試過連續凍咁耐, 間中上番 14,5度, 竟然已經覺得好暖, 晚晚瞓覺都差唔多開住暖爐, 好 warm, 但係又好乾, 放杯水喺隔離都唔見得好有幫助, 不過冇辦法啦, 唔想 BB冷親, 佢已經病左啦, 咳咳, 有痰, 3個月人仔已經要去睇醫生食藥啦, 好彩佢都仲好精靈, 如果唔係就擔心死啦, 希望 BB快D好番晒啦, 我自己嘅鼻敏感都未有好轉, 睇黎我都要諗下係咪要去睇下醫生啦.
尋日同屋企人飲完茶, 行左陣, 之後返屋企抹下屋, 貼左 D揮春, 夜晚煮飯仔, 咁就過左一日啦, 放假 D時間真係過得特別快.
週末菜單 : 西芹炒魚柳, 玫瑰露五香雞翼, 南北杏青紅蘿蔔聖子湯
西芹炒魚柳
材料: 西芹, 魚柳
做法:
1. 西芹去硬皮, 切粗條, 魚柳用鹽及胡椒粉略醃, 切件.
2. 魚柳沾上生粉, 煎至兩面金黃, 盛起.
3. 西芹略炒, 加雞粉, 拌勻後再加入魚柳, 略炒, 即成.
玫瑰露五香雞翼
材料: 雞翼, 蔥段
調味: 花椒一茶匙, 八角一粒, 生抽, 老抽, 冰糖小粒, 糖, 胡椒粉, 玫瑰露酒一湯匙
做法:
1. 雞翼, 花椒, 八角, 略煎.
2. 加入蔥段, 調味及水至蓋過雞翼, 炆至熟及收水, 即成.
南北杏青紅蘿蔔聖子湯
材料: 南北杏, 青蘿蔔, 紅蘿蔔, 聖子乾, 貴妃骨, 杞子
做法:
1. 貴妃骨出水, 青紅蘿蔔去皮切大件.
2. 所有材料落水煲至大滾, 轉慢火煲兩小時, 加鹽調味, 即成.
1月17號係我地結婚兩週年紀念, 真係眨下眼就兩年啦, 今年有埋豐豐, 不過我地冇帶豐豐出去慶祝呀, 我地去左九龍酒店食 buffet撐枱腳, 哩度嘅 buffet都唔錯, 好多野食, 不過就真係超級多人同嘈左 D囉, 星期一都咁多人食 buffet, 仲要唔算平喎, 真係唔明.
週末好煮意: 栗子螺頭煲唐排湯, 蠔油炆豬手, 上湯浸津白
栗子螺頭煲唐排湯
材料: 淮山, 杞子, 栗子, 急凍螺頭, 唐排, 紅棗, 果皮
做法:
1. 栗子去衣, 螺頭出水去內臟, 唐排出水, 淮山浸一小時.
2. 所有材料煲兩小時, 落鹽調味, 即成.
豐豐 3個月啦, 我已經開始返工, 豐豐都好叻叻, 多數可以一覺瞓天光, 就算間中起左身, 拍下佢, 或者俾 D水水佢飲, 佢就會再瞓過, 而家每朝早我同 honey返工之前就帶佢俾婆婆揍.
豐豐頸仔已經硬淨啦, 可以抱直, 趴喺度嘅時候會鄂高頭, 成日啜手仔, 有時啜啜下會發脾四, 抱佢企喺度佢會彈彈下, 鐘意同人地傾計, 會 "e e 呀呀"咁, 有時會笑到 "卡卡" 聲, 真係氹到我地好開心呀!
今個星期開始返工啦, 第一日返去, 張枱亂到顛, 好似打完仗咁, 收拾完殘局, pick up番 D工作, 話咁快就過左一日, 因為太多野做啦, 係冇時間掛住豐豐囉, 放左工先想飛快番去見下我個乖 B.
岩岩過左個星期日有煮飯呀, 仲有靚湯添, 兩餸一燉湯 : 鮑汁炆雞, 帶子三文魚配周打蜆汁, 北芪黨蔘淮杞燉雞湯.
帶子三文魚配周打蜆汁
材料 : 帶子, 三文魚扒, 罐頭周打蜆湯一罐
做法 :
1. 帶子及三文魚用鹽及胡椒粉略醃.
2. 先煎熟帶子及三文魚, 盛起.
3. 周打蜆湯加少許水煮滾, 淋在帶子及三文魚上, 即成.
北芪黨蔘淮杞燉雞湯
材料 : 北芪, 黨蔘, 淮山, 杞子, 圓肉, 瘦肉, 雞, 薑片
做法 :
1. 淮山用水浸一小時.
2. 所有材料放入燉盅, 加滾水, 燉 2.5小時, 加鹽調味, 即成.
有一次同朋友去飲野, 佢 order左杯甘菊茶, 我覺得甘菊茶都幾香, 有一次行 supermarket見到有得買, 於是就買盒返屋企試下, 我覺得加埋蜜糖好好飲, 飲左個感覺好舒服, 好岩而家又凍又乾嘅時候飲. 上網 search, 原來常飲甘菊茶可以起到抗感冒、抗炎症、緩解婦女經期痙攣痛楚等很多功效 (http://news.bbc.co.uk/chinese/trad/hi/newsid_4180000/newsid_4185100/4185171.stm), 加上蜜糖可以舒緩鼻敏感, 岩晒我呀.
Happy New Year!!!
今年除夕冇出去倒數呀, 嗰晚豐豐本來一早瞓左落床仔, 不過一直扭計唔肯瞓, 到最後 10幾秒, 我地抱左佢一齊出廳, 睇住電視倒數.
仲有一個星期我就放完假要返工啦, 真係超唔想返, 而家已經開始有假期後症後群, 點算?!
周末晚餐: 醉雞翼, 五香豬頸肉炒娃娃菜, 淮山杞子紅蘿白螺頭湯
醉雞翼
材料:
雞翼, 李錦記醉雞汁一支
做法:
1. 雞翼加薑片及雞粉煲 15分鐘, 熄火焗至全熟.
2. 用凍滾水沖水, 待涼.
3. 放入醉雞汁, 分量要蓋過雞翼, 放入雪櫃數小時, 即成.
淮山杞子紅蘿白螺頭湯
材料: 淮山, 杞子, 圓肉, 紅蘿白, 急凍螺頭, 元貝, 貴妃骨, 薑片
做法:
1. 淮山用水浸一小時, 螺頭去內臟及用薑片出水, 貴妃骨出水, 其他材料食淨備用.
2. 大火煲滾, 轉細火煲兩小時, 落鹽調味, 即成.
