好耐無整花膠食啦, 今次唔好嘥, 花膠煲1個鐘湯之後撈番出黎炆蠔是火腩, 入晒味, 正!
花膠螺片雞湯材料: 花膠 (先浸發及出水), 淮山 (先浸半小時), 茨實, 紅蘿蔔, 雞 (先出水), 豬展 (先出水), 瑤魚翅 (先浸軟), 螺片 (先浸軟), 薑片
做法:
1. 所有材料大火煲半小時, 轉慢火再煲1.5小時, 落鹽調味, 即成.
光波椒鹽三文魚皮
材料: 三文魚皮
調味: 味椒鹽
做法:
1. 光波爐底鋪上錫紙, 放上高架, 搽油 (防痴架), 放上三文魚皮, 灑上味椒鹽, 260度焗至熟, 即成.
花膠蠔是炆火腩
材料: 花膠 (已熟), 火腩, 白菜仔, 蠔是(先浸軟), 蒜頭
調味: 水, 蠔油, 糖
做法:
1. 先爆香蒜頭, 加入火腩, 蠔是, 花膠及調味, 其後加入白菜仔, 炆至蠔是林及略為收水, 即成.
屋企有3個雪梨放左好耐都未食, 天氣凍又唔係好想去食, 冰箱又有pack豬展, 媽咪提意我煲雪梨蘋果湯, 清清舊野, 雪梨蘋果無花果紅蘿蔔同粟米, 個湯超甜, 好飲呀! 加埋南北杏仲可以止咳添.
雪梨蘋果無花果湯
材料: 蘋果, 雪梨, 紅蘿蔔, 粟米, 無花果乾, 南北杏, 豬展
做法:
1. 豬展出水; 蘋果及雪梨去核切件; 紅蘿蔔刨皮切件; 粟米切件.
2. 所有材料大火煲半小時, 轉慢火再煲1小時, 落鹽調味, 即成.
趁天氣凍凍地, 快啲煲番啲鹿茸飲下, 又怕太燥, 媽咪教加番啲紅蘿蔔中和下, 用雞黎燉湯, 啲雞肉好滑, 隻雞脾好正呀. 尋晚清下屋企個冰箱, 整左可樂雞翼同蒜茸藍青口, 好好味!
哩排天氣時暖時凍, 豐豐都有啲咳同鼻水, 真係要小心身體!
鹿茸紅蔘燉雞湯
材料: 雞 (去皮), 豬展, 紅蘿蔔, 元肉, 鹿茸片, 紅蔘, 淮山, 薑片
做法:
1. 雞及豬展出水; 紅蘿蔔刨皮切件; 淮山浸半小時.
2. 將所有材料放入電子燉盅, 加滾水, 燉2.5小時, 落鹽調味. 即成.
可樂雞翼
材料: 雞翼, 蒜茸, 薑片
調味: 原味可樂, 水, 生抽, 老抽 (分量因人而異)
做法:
1. 蒜茸及薑片起鑊, 加入雞翼略炒.
2. 加入調味至蓋過雞翼, 中火炆至熟. 即成.
蒜茸藍青口
材料: 藍青口, 蒜茸, 洋蔥
調味: 雞汁
做法:
1. 藍青口洗淨.
2. 蒜茸洋蔥起鑊炒至有香味, 加入藍青口, 雞汁及少少水, 煮至熟. 即成.
Happy New Year!!!!! Wish all the best in 2013!!!!!
不經不覺10幾日聖誕假期就完結啦, 好唔捨得呀, 希望快啲再有長假期啦, hehe
