2012好快成為歷史, 希望唔開心嘅事永遠過去, 好事接種而黎, 最緊要身體健康, 事事順利!
30號同班朋友開PARTY, 一早用真空煲煲落湯, 玩完返黎夜晚有得飲, 哩款湯好甜好好味!
紅螺頭無花果湯
材料: 紅螺頭, 豬展骨, 紅蘿蔔, 無花果, 淮山, 元貝
做法:
1. 豬展骨出水; 淮山用水浸半小時; 紅螺頭浸軟; 紅蘿蔔刨皮切大件.
2. 所有材料大火煲半小時, 放入真空煲, 飲前再大火煲滾, 加鹽調味, 即成.
之前買左個南瓜一直都未食, 尋日用左成個黎煲湯, 一大個南瓜煲到溶晒, 加埋蜆肉, 好鮮甜呀!
蜆肉南瓜湯
材料: 南瓜, 蜆, 雞湯
做法:
1. 蜆先煲至剛開口, 盛起拆肉備用.
2. 南瓜去皮去芯, 切細粒.
3. 先將南瓜加水煲至完全溶解, 加入蜆肉及雞湯, 滾後即成.
自從之前有人教我煲湯落蘋果, 我而家都鐘意, 哩個天氣可以潤下, 代替紅蘿蔔都唔錯.
蟲草花蘋果湯
材料: 蟲草花, 蘋果, 雞, 豬展, 淮山, 魚唇, 無花果乾, 薑片
做法:
1. 雞去皮出水; 豬展出水; 淮山用水浸半小時去硫磺; 蘋果去皮去芯; 蟲草花及魚唇略浸; 其他材料洗淨.
2. 水滾後加入所有材料, 大火煲30分鐘, 轉慢火再煲1.5小時, 落鹽調味, 即成.
