菜心薯仔牛肉粥

星期二同豐豐去 QE覆診, 有個 BB 1歲啦, 佢媽咪話佢食粥仔好慢, 次次要食成粒鐘, 嘩, 好誇張, 豐豐每次都係 15分鐘左右就食晒成碗粥仔架啦.

3歲Alle生日快樂

我個可愛姪女 Alle今年 3歲啦, 今年我地一家冇出去慶祝, 去左嫲嫲屋企煮大餐, Alle 3年嘅生日蛋糕都係姑媽我送架, 今年試下 Pappagallo嘅雪糕蛋糕, 個蛋糕係好靚呀, 不過我覺得一般好味.

Alle, 祝妳生日快樂!!!!

餐蛋魚丸公仔麵

哩兩個 weekend都冇煲湯煮飯呀, 其實間中煮個麵, 睇下碟, 食下雪糕, 都唔錯架! 哩啲魚丸係我老公鄉下嘅特產黎架.

甜睡 BB @10個月

每次見到豐豐瞓得好甜嘅時候, 我就覺得自己好幸福, 佢平時啲搗蛋野都唔記得晒.  幸福唔係必然架, 有啲小朋友係得唔到人愛錫, 甚至連自己嘅父母都唔錫自己, 當自己係一個包袱, 真係好可憐.  不過豐豐一定係一個好幸福嘅 BB

菜心雞肉粥

豐豐個唐細佬 8月20號出左世啦, 星期日我地去左醫院探佢, 好細好可愛呀, 我已經唔係好記得豐豐咁細粒嘅時候係點啦, 好懷念呀!!

粟米洋蔥牛肉粥

媽咪話洋蔥可以殺菌, 所以間唔時我地就會加啲洋蔥落去粥仔一齊煲, 加左洋蔥嘅粥仔係好香架, 今次配粟米同牛粥, yummy!

可愛鬆弛熊蛋糕

今日放工同契女同埋佢媽咪一齊去公司附近間 C for Cake學整 3D蛋糕, 好好玩呀, 整出黎好可愛, 真係唔係好捨得食呀.

豐豐的第一堂 playgroup @ 10個月

上星期六踏入 10個月, 豐豐上左佢人生嘅第一堂 - playgroup, 其實都係同其他 BB一齊玩下, 佢似乎好鐘意喎

豐豐已經識得扶住啲傢私行黎行去, 又坐底又企起身, 喺屋企周圍爬, 最鐘意要人地扶住佢兩隻手行, 一有得行就好開心, 而家佢真係冇時停, 日頭又瞓少左, 成日湊住佢都幾攰架, 所以我覺得婆婆真係好勁.  食野方面都幾乖, 暫時未有一樣野佢係唔食既, 叻仔, 見佢次次都食得咁滋味, 媽咪同婆婆先有動力諗多啲新花款嘅粥粥架

老黃瓜南北杏鱆魚豬展湯, 焗孜然雞脾, 薑蔥三文魚頭煲

星期日下晝老公去左黃金行街, 我同阿仔喺屋企開住冷氣瞓晏覺, 真係好正呀, 難得阿仔又可以瞓成兩粒鐘, 爽.

今個周末煮嘅一餐飯我好滿意呀, 連老公都食到 lam lam咀.  我發覺用焗爐黎焗雞真係好好架, 啲皮又脆, 肉又嫩滑, 不過我遲左鋪錫紙遮住兩隻雞脾, 搞到燶左少少添. 

焗孜然雞脾

材料: 雞脾

醃料: 雞粉, 生抽, 老抽, 糖, 生粉, 辣椒粉, 花椒, 八角, 酒, 胡椒粉, 油, 薑汁, 蒜茸, 孜然粉

做法:
1.  雞脾洗淨, 用刀界幾下, 放入保鮮袋, 加入所有醃料, 綁好袋後搖勻, 放入雪櫃雪過夜.
2.  焗爐預熱 250度, 焗盤鋪上錫紙, 掃上油, 雞脾雞皮向上放上焗盤, 入爐焗 30分鐘至熟.  即成.

小貼士:
1.  雞脾界幾下才加醃料可幫助入味.
2.  如果怕太燶, 可在雞脾上放上鍚紙.

薑蔥三文魚頭煲

材料: 三文魚頭, 蔥段, 薑片

汁料: 水, 生抽, 老抽, 糖

做法:
1. 三文魚頭用胡椒粉及鹽略醃, 撲上少許生粉.
2. 先略煎三文魚頭, 盛起.
3. 用煲仔落油爆香蔥段及薑片, 下三文魚頭略炒, 加入汁料, 試味, 蓋上蓋煮至熟.  即成. 

老黃瓜南北杏鱆魚豬展湯

材料: 老黃瓜, 鱆魚, 豬展, 南北杏, 薑片

做法:
1. 老黃瓜連皮洗淨去囊切大件; 豬展出水.
2. 水滾後放入所有材料, 中大火煲約 30分鐘, 放入真空煲, 飲前大火再煲 15分鐘, 落鹽調味.  即成.

功效: 老黃瓜清熱利水、解毒消炎

芝士菜心肉碎粥

第一次將芝士放入粥仔一齊俾豐豐食, 之前豐豐都已經有食開芝士, 不過係用匙仔就咁餵佢食, 成日聽人話整芝士粥, 咪又貪得意試下囉.

膏蟹粥 @ 譽居

岩岩過左個星期一, 我同老公都放假, 撇甩豐豐一日我地去拍下拖, 好耐冇睇戲啦, Harry Potter結果篇又點可以唔睇呢

第一次去 iSquare睇戲, 睇早場, 平啲嘛

睇完戲我地去左譽居食 lunch, 見到有蟹粥喎, 仲係特價添, 30幾蚊膏蟹粥好抵呀, 仲平過澳門啲水蟹粥, 佢地啲燒味飯都唔錯架

猴頭菇紅蘿蔔瑤柱烏雞湯

炎炎夏日, 條街好似火爐一樣, 今日同豐豐去完 playgroup試堂, 即刻返屋企開行冷氣瞓晏瞓, 出面真係好曬同好熱, 好希望秋天快啲到.

今個 weekend冇煮飯, 只係煲左湯咋: 猴頭菇紅蘿蔔瑤柱烏雞湯

猴頭菇紅蘿蔔瑤柱烏雞湯

材料: 烏雞, 瘦肉, 猴頭菇, 紅蘿蔔, 乾瑤柱, 薑片

做法:
1. 紅蘿蔔刨皮切件; 乾瑤柱浸軟; 猴頭菇浸軟洗淨揸去水份; 烏雞瘦肉出水.
2. 水滾後放入所有材料, 中大火煲 30分鐘, 放入真空煲, 飲前再煲 15分鐘, 加鹽調味.  即成.

節瓜三文魚粥

又係三文魚啦, 今次配節瓜

之前我會用三文魚刺身煮粥仔, 因為一定唔怕有骨.  而家我轉左用三文魚腩, 一來平啲, 而且我覺得三文魚腩比較多魚油.  雖然三文魚腩應該都冇骨, 不過都要小心檢查下架.

又熱又曬的澳門痴住之旅

老公星期五要去澳門聽 seminar, 有 free船飛酒店, 仲要係 Grand Hyatt, 聽人講哩間酒店好正, 仲好貴架, 平時要自己俾錢一定唔捨得住, 所以星期五晚放底豐豐俾婆婆, 我過去澳門 join老公, 痴酒店住.  今次係我第一次自己搭船過澳門.

Grand Hyatt真係好正呀, 間房超大, 係 suite黎架, 好開心呀!!  哩兩日都係集中喺氹仔嗰邊行,  我之前未去過氹仔, 氹仔同澳門另一邊好唔同, 我都幾鐘意, 感覺舒服啲.  今日天氣好好, 不過真係超熱同超曬.

上年去澳門係陀住豐豐, 今年再去澳門豐豐冇份去啦, 雖然只係同豐豐分開一晚咁多, 但係我都好掛住佢, 所以真係唔捨得放低佢飛去旅行幾日, 希望遲啲可以帶埋佢一齊去玩啦.

沙薑果皮蒸雞, 咖喱蘿蔔煮鯖魚, 合掌瓜鱆魚豬骨湯

哩個 weekend我地節目豐富呀, 星期六一早契媽搵左豐豐去幫手拍片, 其實導演都係親豐豐玩嘅時候拍, 好快就搞掂啦.  之後約左公公婆婆 E仔舅父舅母表姐去飲茶, 難得係公公請呀, haha.  飲完茶返屋企沖涼, 休息一陣又出去同 Baba啲朋友打邊爐, 返到屋企都 10點幾11點啦.  到左星期日, 天氣太好啦, 藍天白雲, 真係游水嘅好日子, 我地落左樓下泳池游水, 初時俾 Baba一下就放入水, 搞到豐豐大喊, 之後雖然有水泡都成隻樹熊咁攬住我, 好彩慢慢可以放開下咋, 後來唔知係咪因為攬住個水泡喺水入面浮浮下太舒服, 佢竟然瞓覺呀, 好搞笑.

周末食譜: 沙薑果皮蒸雞, 咖喱蘿蔔煮鯖魚, 合掌瓜鱆魚豬骨湯

沙薑果皮蒸雞

材料: 雞件, 果皮

醃料: 生抽, 老抽, 糖, 沙薑粉, 胡椒粉, 生粉, 酒

做法:
1. 果皮浸軟, 刮去囊, 切條.
2. 雞洗淨後加果皮, 用醃料醃數小時.
3. 隔水大火蒸約 30分鐘至熟.  即成.

咖喱蘿蔔煮鯖魚

材料: 蘿蔔, 鯖魚柳, 薑片

做法:
1. 鯖魚柳切件, 用薑汁及胡椒粉略醃; 蘿蔔刨皮切件.
2. 鯖魚下鑊煎至 8成熟, 盛起備用
3. 蘿蔔及薑片原鑊下鑊, 略炒, 加少少水, 雞粉, 糖, 咖哩醬, 蓋上蓋煮至林, 加入鯖魚略煮.  即成.

合掌瓜鱆魚豬骨湯

材料: 合掌瓜, 豬骨, 鱆魚, 南北杏

做法:
1. 鱆魚浸軟切件; 合掌瓜刨皮切件; 豬骨出水.
2. 水滾後放入所有材料, 大火煲 30分鐘, 放入真空煲, 飲前大火再煲 15分鐘, 落鹽調味.  即成.

粟米甘筍三文魚粥

粟米洋蔥肉碎粥