黑蒜紅蔘燉雞湯

天氣忽冷忽暖, 好容易病, 阿仔都咳左幾日, 不過好彩一向身體都好好, 只係好小事啫.  見屋企仲有紅蔘, 加埋黑蒜, 糯米, 紅棗等去燉雞, 味道有點似韓國嘅人蔘雞湯, 啲雞燉完勁嫩滑, 好好味呀, 聽講紅蔘對病後都好有幫助添.

黑蒜紅蔘燉雞湯

材料:
紅蔘片, 黑蒜, 蒜頭, 糯米, 雞(去皮), 紅棗, 圓肉, 瘦肉, 瑤柱

做法:
1. 糯米洗淨用水浸數小時; 雞及瘦肉跑水; 蒜頭去衣; 其他材料洗淨.
2. 將所有材料加入滾水, 放入電子燉盅, 燉3小時, 下鹽調味, 即成.

紅螺頭沙蔘玉竹花膠雞湯

開始轉天氣, 要飲多啲湯水滋潤下啦.

紅螺頭沙蔘玉竹花膠雞湯

材料:
紅螺頭乾, 花膠(已浸發), 沙蔘, 海玉竹, 雞(去皮), 豬展, 乾瑤柱, 紅蘿蔔

做法:
1. 雞及豬展跑水; 紅蘿蔔去皮切件; 紅螺頭乾, 沙蔘及海玉竹浸半小時.
2. 水滾放入所有材料中火煲30分鐘, 轉慢火煲1.5小時, 落鹽調味, 即成.

沙蔘海玉竹淮山茨實鵪鶉湯

經過某店, 見到急凍鵪鶉話係無激素, 媽咪話我地細個都成日飲鵪鶉湯, 可以滋補強生, 補而不燥, 見特價買黎試下, 我用兩隻鵪鶉, 加紅蘿蔔沙蔘海玉竹淮山茨實煲, 藥材舖教海玉竹比普通玉竹甜啲, 又唔會有酸味, 的確個湯好甜呀.

沙蔘海玉竹淮山茨實鵪鶉湯

材料:
鵪鶉, 豬展, 沙蔘, 海玉竹, 淮山, 茨實, 紅蘿蔔, 無花果, 乾百合, 金華火腿, 瑤柱, 薑片

做法:
1.  鵪鶉及豬展出水; 紅蘿蔔去皮切件; 沙蔘海玉竹淮山茨實無花果乾百合浸半小時.
2.  水滾後放入所有材料, 中火煲滾15分鐘, 轉小火煲2小時, 落鹽調味, 即成.

蟲草花鮑貝雞粥

終於等到罐頭鮑貝特價啦, 鮑貝雞粥真係好味到震呀, 今次加埋蟲草花, 滋補有益.  用玫瑰煲煲粥好方便, 唔怕痴底.

蟲草花鮑貝雞粥

材料:
米, 雞件, 蟲草花, 罐頭鮑貝, 薑片

做法:
1.  米洗好, 用水加少許油, 浸半小時; 蟲草花用水浸半小時, 期間過水數次.
2.  雞件用鹽及胡椒粉醃半小時.
3.  米連水加入玫瑰煲內, 加水, 中火煲滾, 之後轉中小火煲至米開花.
4.  之後加入雞件, 薑片及蟲草花, 再煲至粥綿, 最後加入鮑貝略煲, 即成.

小貼士:
1. 罐頭鮑貝及已醃的雞已有咸味, 因此不需要另加鹽.

芒果芝士蛋糕 - 細妹賀壽篇

豐豐下巴輕輕同姨仔講送個生日蛋糕俾佢, 當然係搵我整啦, 姨仔指明要芒果蛋糕, 我只係買到細芒果, 不過又香又甜, 今次用左5個芒果, 真係啖啖芒果肉.

芒果芝士蛋糕

材料:
清蛋糕2片
cream cheese 130g
糖 30g
魚膠粉8g
凍滾水 30g
淡忌廉 110g
芒果 5個細 (切粒, 留部份做餅面裝飾)

做法:
1. 蛋糕模底放上1張底咭及圍邊備用; 魚膠粉加水拌勻, 坐熱水至完全溶解.
2. 淡忌廉打至8成備用.
3. cream cheese放回室溫至軟 (或微波爐叮20秒), 加入糖打至軟滑.
4. 將芒果粒加入芝士漿拌勻.
5. 然後加入已打起的淡忌廉拌勻.
6. 最後加入魚膠粉水快手拌勻.
7. 組合: 將1片清蛋糕放入蛋糕模, 將一半芒果芝士漿倒入, 再放上另1片清蛋糕, 最後倒入剩下的芒果芝士漿掃平.
8. 放入雪櫃雪最少1小時, 起模及裝飾, 即成.


清蛋糕食譜可參考以下食譜 (參巧自韋太烹飪教室)

材料:
低筋粉 40g
糖 40g
蛋白 2隻
蛋黃 2隻
牛油 / 橄欖油 20g

做法:
1.  雞蛋放回室溫.  蛋糕模鋪上焗爐紙.  焗爐 180度預熱.
2.  蛋白打起, 分 2-3次加入糖, 打至企身.
3.  加入蛋黃, 用橡皮刀快手拌勻.
4.  篩入低筋粉, 用手動打蛋器拌勻.
5.  加入油, 快手拌勻.
6.  倒入蛋糕模, 放入焗爐 180度焗 20分鐘.  
7.  出爐後倒扣.  待涼後去面, 切成2片, 將圓周切入約1cm, 備用.

豆豉洋蔥腩肉片煲仔飯, 胡椒沙白, 蜜糖煎金蠔, 合掌瓜百合豬展湯

兩父子好鐘意食豆豉, weekend我煮左豆豉洋蔥腩肉片煲仔飯, 我分得兩啖咋, 睇黎下次要加多啲米先得.

豆豉洋蔥腩肉片煲仔飯

材料: 豆豉, 洋蔥, 腩肉片, 米, 水, 煲仔飯豉油, 蔥粒

調味料: 生抽, 糖, 味醂, 麻油, 生粉

做法:
1. 腩肉片用調味料醃半小時; 洋蔥切條.
2. 洗淨米, 倒入玫瑰煲, 加入水, 比例1:1, 蓋上蓋, 開中火, 水滾後轉中細火.
3. 15分鐘後加洋蔥及腩肉片, 煮多5分鐘, 熄火, 焗15分鐘, 加煲仔飯豉油及蔥粒, 即成.

胡椒沙白

材料: 沙白, 薑片, 蔥段, 雞湯, 水, 白胡椒粒

做法:
1. 沙白放入鹽水略浸.
2. 煲滾雞湯及水, 加薑片, 蔥段及白胡椒煲10分鐘.
3. 加沙白, 煮至開口, 即成.

小貼士: 花甲味道更佳.

蜜糖煎金蠔

材料: 金蠔, 蜜糖

做法:
1. 金蠔洗淨, 蒸10分鐘, 盛起印乾.
2. 將金蠔兩邊略煎, 熄火, 加蜜糖拌勻, 即成.

合掌瓜百合豬展湯

材料:
合拳瓜, 百合, 豬展, 粟米, 南北杏, 花膠仔, 蜜棗, 螺片, 薑片

做法:
1. 豬展飛水; 合掌瓜粟米切件; 百合, 花膠仔, 螺片用水浸半小時.
2. 水滾放入所有材料, 中火煲30分鐘, 轉細火再煲1.5小時, 落鹽調味, 即成.

士多啤梨乳酪芝士蛋糕 - 朋友賀壽篇

今次好似係我第一次整蛋糕賀朋友生日, 今次個乳酪芝士蛋糕層次多左, 所以做法複雜咗, 但口感更豐富更好味, 如果想簡單啲可以參考我之前個食譜架.

士多啤梨乳酪芝士蛋糕 (6")

材料:
清蛋糕2片
cream cheese 200g
原味乳酪約一杯半
糖 60g
魚膠粉 6g
凍滾水 36g
士多啤梨果醬適量
士多啤梨茸適量
士多啤梨粒適量


做法:
1. 慕士模底包好保鮮紙, 放上1張底咭備用; 魚膠粉加水拌勻, 坐熱水至完全溶解.
2. cream cheese放回室溫至軟, 加入糖打至軟滑.
3. 加入乳酪及士多啤梨茸拌勻.
4. 加入魚膠粉水快手拌勻成芝士漿.
5. 將1片清蛋糕塗上士多啤梨果醬, 放入慕士模, 鋪上適量士多啤梨粒, 將一半芝士漿倒入.
7. 將另1片清蛋糕塗上士多啤梨果醬, 放在芝士漿上, 鋪上適量士多啤梨粒, 將餘下芝士漿倒入.
8. 放入雪櫃雪最少1小時, 起模及裝飾, 即成.

小貼士:
1. 起模時可用風筒吹蛋糕模兩圈, 會較易甩模. 
2. 士多啤梨可先切細粒, 再用湯匙將士多啤梨粒壓成茸.
3. 可自製士多啤梨果醬: 將士多啤梨切成細粒, 放入易潔煲內開細火, 加入糖及檸檬汁, 邊煮邊攪成漿, 試味, 待涼即成.  詳細可參考自家製士多啤梨果醬

清蛋糕食譜可參考以下食譜 (參巧自韋太烹飪教室)

材料:
低筋粉 40g
糖 40g
蛋白 2隻
蛋黃 2隻
牛油 / 橄欖油 20g

做法:
1.  雞蛋放回室溫.  蛋糕模鋪上焗爐紙.  焗爐 180度預熱.
2.  蛋白打起, 分 2-3次加入糖, 打至企身.
3.  加入蛋黃, 用橡皮刀快手拌勻.
4.  篩入低筋粉, 用手動打蛋器拌勻.
5.  加入油, 快手拌勻.
6.  倒入蛋糕模, 放入焗爐 180度焗 20分鐘.  
7.  出爐後倒扣.  待涼後去面, 切成2片, 將圓周切入約1cm, 備用.

OREO芝士蛋糕 (免焗)

跟谷友食譜稍為改良嘅OREO芝士蛋糕, 係軟芝士嘅質感, 唔太甜, 我好鐘意, 連食兩件, yummy!

OREO芝士蛋糕 (免焗)

材料:
OREO餅 (大約12塊)
牛油20克
忌廉芝士100克
糖霜20克
淡忌廉250克
1/4 茶匙雲尼拿香油
OREO餅 (大約8塊, 餅面用)

製法:
1. 將約12塊OREO餅放入保鮮袋, 用麵粉棒輾碎, 倒入碗中, 留起約2湯匙餅碎, 餘下加入已溶牛油拌勻, 將餅碎放在模底壓平, 放進雪櫃冷藏一小時.
2. 淡忌廉打起備用.
3. 將忌廉芝士及糖霜打成軟滑狀.
4. 將打起淡忌廉, 加入(3)混合, 加入雲尼拿香油及留起的2湯匙餅碎拌勻.
5. 將混好的餡料例入餅模內, 放入雪櫃雪至凝固.
6. 將餅面用的餅壓碎, 灑在餅面上, 脫模後即成.

小貼士:
1. 可用慕斯模代替蛋糕模, 於模底包上保鮮紙.
2. 脫模時, 可先用風筒吹模邊或用熱毛巾包裹片刻, 會較易脫模.
3. 忌廉芝士先放回室溫效果更佳.

迷你朱古力蛋糕卷

前排跟本食譜再試整迷你蛋糕卷, 終於卷到啦, 細條啲可能真係易啲, 下次再試.

唧花曲奇

媽咪屋企有罐jenny bakery曲奇, 老公食到津津有味, 落order叫我整, 以前其實都整過一次, 方法大同小異, 係分量有啲唔同, 真係好味呀, 超鬆化, 同jenny bakery曲奇好似呀, 食到停唔到口, 但我唧花技術真係有待改善, 仲要最後個唧袋都爛埋, 唯有就咁一羹羹麵糊不落焗盤焗, 又出奇地令我滿意喎, 哈.

唧花曲奇

材料: (可做約50塊曲奇)
金桶牛油 340g (一罐)
低筋粉 255g
粟粉 85g
糖霜 75g

做法:
1. 金桶牛油加糖霜打至軟滑.
2. 篩入低筋粉及粟粉, 打至均勻.
3. 將一匙麵糊隨意放在焗盤上, 如是者放上所有麵糊, (或將麵糊放入已放唧花咀的唧袋內唧出曲奇) 放入雪櫃定型15分鐘.
4. 焗爐180度預熱, 放入曲奇焗12分鐘, 出爐後將曲奇放上鐵架待涼, 待至完全涼透後即成.

豆豉排骨臘腸煲仔飯

平時我唔多煮排骨, 因為我怕煮得太鞋唔好食, 今次又膽粗粗試, 出乎意料之外好好食, 排骨好林, 老公都話正.

豆豉排骨臘腸煲仔飯

材料: 腩排, 臘腸/潤腸, 豆豉, 米, 水, 煲仔飯豉油

醃料: 生抽, 老抽, 胡椒粉, 糖, 酒, 生粉, 油少許, 水

做法:
1. 腩排切粒, 用醃料醃1小時, 加豆豉.
2. 將米放入玫瑰煲, 加水(比例為1:1), 開中火.
3. 水滾後加豆豉排骨及已切片的臘腸/潤腸, 轉中小火煮20分鐘.
4. 熄火再焗10分鐘, 加煲仔飯豉油, 即成.

士多啤梨忌廉蛋糕

Happy 2015!

除夕整左哩個士多啤梨忌廉蛋糕, 中間除左有忌廉, 仲用左自製士多啤梨醬, 好好味呀, 用百力枝圍邊我都係參考網友嘅idea, 用黎遮醜確係唔錯, hehe.

士多啤梨忌廉蛋糕

材料:
清蛋糕 3 片
甜忌廉打起
士多啤梨醬
士多啤梨, 百力枝, 粉紅朱古力碎及糖霜作裝飾

6"清蛋糕材料:
低筋粉 40克
糖 40克
蛋白 2隻
蛋黃 2隻
牛油 / 橄欖油 20克

清蛋糕做法:
1.  雞蛋放回室溫.  蛋糕模鋪上焗爐紙.  焗爐 180度預熱.
2.  蛋白打起, 分 2-3次加入糖, 打至企身.
3.  加入蛋黃, 用橡皮刀快手拌勻.
4.  篩入低筋粉, 用手動打蛋器拌勻.
5.  加入油, 快手拌勻.
6.  倒入蛋糕模, 放入焗爐 180度焗 20分鐘. 
7.  出爐後倒扣.  待涼後去面, 切成 3片備用.

士多啤梨醬材料:
士多啤梨
沙糖
檸檬汁

士多啤梨醬做法:
1. 士多啤梨切粒, 放入煲內, 加糖及檸檬汁, 邊攪邊煮至杰身, 待涼備用.

組合:
1.  預備一張墊底卡紙, 放上一片蛋糕片, 塗上士多啤梨醬, 放上士多啤梨粒, 塗上打起的甜忌廉 .
2.  將另一片蛋糕片放上, 塗上士多啤梨醬放上士多啤梨粒, 塗上甜忌廉.
3.  將最後一片蛋糕片塗上士多啤梨醬, 反轉放在蛋糕上.
4.  將整個蛋糕都塗上忌廉, 抹平滑.
5.  圍邊加上百力枝, 蛋糕面放上士多啤梨及粉紅朱古力碎作裝飾, 灑上糖霜  即成.